ຮັກສາສຸຂະພາບຈິດ ຍາມໂຄວິດລະບາດ

ໂດຍ:​ມຶກບໍ່ແຫ້ງ

ການແຜ່ລະບາດຂອງໂຄວິດ 19 ພາເຮົາສະທ້ານຢ້ານກົວ ໂດຍສະເພາະ ເມື່ອຍາມໄດ້ຮັບຂ່າວສານ ທີ່ບໍ່ມູນ ຄວາມຈິງ ຍິ່ງເພີ່ມທະວີຄວາມກັງວົນຫຼາຍຂຶ້ນ.

ຜູ້ຂຽນຂໍແລກປ່ຽນ ບາງຂໍ້ສຳຄັນ ທີ່ອົງການອະນາໂລກ ໄດ້ແນະນຳ ພວກເຮົາວ່າໃນຊ່ວງວິກິດນີ້ ເພື່ອຮັກສາສຸຂະພາບຈິດ, ຫຼຸດຜ່ອນຄວາມກັງວົນຄື:

ຄວນຕິດຕາມຂ່າວສານ ມື້ລະ 2 ເທື່ອກໍພໍແລ້ວ ໂດຍສະເພາະ ແຫຼ່ງຂ່າວ ທີ່ສາມາດເຊື່ອຖືໄດ້, ໃນລະດັບສາກົນ ພວກເຮົາກໍສາມາດ ຕິດຕາມຂ່າວຈາກເວບໄຊ໌ ຂອງ ອົງການອະນາໄມໂລກ (https://www.who.int/emergencies/diseases/novel-coronavirus-2019) ຫຼື ແຫຼ່ງຂ່າວອື່ນທີ່ເຊື່ອຖືໄດ້ ແລະ ໃນ ສປປລາວ ພວກເຮົາກໍສາມາດ ຕິດຕາມຂ່າວສານທີ່ເປັນທາງການ ແລະ ຖືກຕ້ອງ ຕາມເວບໄຊ໌ ຂອງຄະນະສະເພາະກິດ ເພື່ອຄວບຄຸມ, ປ້ອງກັນ ແລະ ແກ້ໄຂ ການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID 19) (https://www.covid19.gov.la/notice.html)

ຫຼຸດຜ່ອນການເບິ່ງ, ການອ່ານ ແລະ ການຟັງຂ່າວສານ ກ່ຽວກັບ ໂຄວິດ 19 ທີ່ເຮັດໃຫ້ ພວກເຮົາຢ້ານກົວ, ກັງວົນໃຈ, ຊອກຂໍ້ມູນຈາກແຫຼ່ງທີ່ສາມາດເຊື່ອຖືໄດ້ ແລະ ຊອກຫາບັນດາຂັ້ນຕອນ ທີ່ສາມາດ ນຳໃຊ້ໄດ້ ໃນການ ປົກປ້ອງຕົນເອງ ແລະ ຄົນອ້ອມຂ້າງ, ຫຼີກລ່ຽງບັນດາ ຂ່າວລື ຂ່າວທີ່ເຮັດໃຫ້ ສັງຄົມແຕກຕື່ນ, ຂໍ້ມູນທີ່ຖືກຕ້ອງ ສາມາດຫຼຸດຜ່ອນຄວາມຢ້ານກົວ ແລະ ຄວາມກັງວົນໄດ້.

ນອກນັ້ນ, ເພິ່ນຍັງແນະນຳ ພວກເຮົາ ໃຫ້ເບິ່ງໂລກໃນແງ່ດີ ວ່າ ເຊື້ອພະຍາດດັ່ງກ່າວສາມາດປິ່ນໃຫ້ຫາຍຂາດໄດ້ ເຊິ່ງ ສະແດງ ອອກ ທີ່ຈຳນວນ ທີ່ຜູ້ຕິດເຊື້ອ ແລ້ວປິ່ນປົວຫາຍດີ ແລ້ວຈຳນວນຫຼວງຫຼາຍກວ່າ ຜູ້ເສຍຊີວິດ ແລະ ພວກເຮົາ ກໍຍັງເຊື່ອວ່າ ອີກບໍ່ດົນ ນັກວິທະຍາສາດ ຈະສາມາດໃນການຄິດຄົ້ນການປິ່ນປົວທີ່ດີ ມີປະສິດທິພາບກວ່າເກົ່າ ເຊັ່ນ ການຜະລິດ ຢາວັກຊິນ.

ພ້ອມນັ້ນ, ເພິ່ນກໍຍັງບບອກອີກວ່າ ເຖິງວ່າ ຄວາມພວກເຮົາຈະຢູ່ ຫ່າງໄກທາງດ້ານຮ່າງກາຍ ແຕ່ ພວກເຮົາກໍສາມາດ ຕິດຕໍ່, ຖາມຂ່າວຄາວ ຜູ້ອື່ນຜ່ານທາງ ໂທລະສັບ, ທາງ ອອນລາຍ, ທາງອີເມລ ແລະ ອື່ນໆ.

ພ້ອມນັ້ນ, ເມື່ອນາຍົກລັດຖະມົນຕີ ອອກສັ່ງ (ເລກທີ 06/ນຍ, ວັນທີ 29 ມີນາ 2020) ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 (COVID-19) ໂດຍໄດ້ເນັ້ນໜັກ ໃຫ້ປະຊາຊົນ ເຮົາຕ້ອງມີສະຕິໃນການປ້ອງກັນ ໂດຍການຢູ່ໃນຂອບເຂດທີ່ຢູ່ ອາໄສຂອງຕົນ ແລະ ບໍ່ໃຫ້ ອອກໄປຂ້າງນອກ ຖ້າບໍ່ມີຄວາມຈຳເປັນ ເຊິ່ງເວົ້າອີກແນວໜຶ່ງກໍແມ່ນນະໂຍບາຍ ໃນການປິດເມືອງ.

ສິ່ງດັ່ງກ່າວເປັນຖືກຕ້ອງ ເພື່ອປ້ອງກັນການລະບາດ ທົ່ວປະເທດ ທີ່ຈະກາຍເປັນໄພອັນຕະລາຍແກ່ປະເທດເຮົາ ແນ່ນອນ ນະໂຍບາຍດັ່ງກ່າວ ອາດສົ່ງຜົນກະທົບ ຊີວິດປະຈຳວັນພວກເຮົາບໍ່ຫຼາຍກໍໜ້ອຍ, ກະທົບທາງດ້ານຈິດໃຈ ແຕ່ ມັນເປັນເລື່ອງ ທີ່ຈຳເປັນໃນການປະກອບສ່ວນ ເພື່ອສັງຄົມ, ເພື່ອຊາດ ເພາະສະນັ້ນ, ພວກເຮົາ ຕ້ອງຮຽນຮູ້ ໃນການຫາກິດຈະກຳ ທີ່ເປັນປະໂຫຍດ ແລະ ພັກຜ່ອນໃນຊ່ວງໄລະຍເວລາ ດັ່ງກ່າວ.

ເຊັ່ນ ການໃຊ້ເວລາໃນການເຮັດສວນຄົວ, ການອ່ານໜັງສື, ການອະນາໄມ ແລະ ງານອາດີເລກ ອື່ນໆ ທີ່ພວກເຮົາ ຢາກເຮັດຢູ່ເຮືອນ ແຕ່ບໍ່ໄດ້ ຍ້ອນຄາໄປເຮັດວຽກຢູ່ຫ້ອງການທຸກມື້, ດັ່ງນັ້ນ ຈົ່ງໃຊ້ເວລານີ້ເຮັດຢ່າງເຕັມທີ.

ທ້ອງຟ້າທີ່ມືດມົວ ອີກບໍ່ດົນກໍໃສແຈ້ງ, ຊີວິດພວກເຮົາກໍຄືກັນ ຖ້າຢາກກັບມາໃຊ້ຊີວິດຢ່າງປົກກະຕິໃຫ້ໄວ ພວກເຮົາ ຕ້ອງເປັນເຈົ້າເຝົ້າລະວັງການລະບາດຂອງພະຍາດໃນຄັ້ງນີ້.