ຄລັບ ບຣູດ ທີມຈ່າຝູງ ໄດ້ຮັບແຊ້ມບານເຕະລີກແບນຊິກ ເຖິງຈະແຂ່ງຂັນບໍ່ຄົບນັດ..! ເພາະການລະບາດຂອງເຊື້ອໄວຣັສໂຄວິດ-19

ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ຝ່າຍຈັດການແຂ່ງຂັນເຕະບານລີກສູງສຸດຂອງປະເທດແບນຊິກ ມີມະຕິເປັນເອກະສັນມອບແຊ້ມໃຫ້ສະໂມສອນ ຄລັບບຣູດ ທີມຈ່າຝູງໃນປັດຈຸບັນ ເຖິງວ່າແຂ່ງຂັນບໍ່ຄົບນັດກໍຕາມ ສາເຫດຍ້ອນການລະບາດຂອງເຊື້ອໄວຣັສ ໂຄວິດ-19.

ຝ່າຍຈັດການແຂ່ງຂັນຢືນຢັນຢຸດການແຂ່ງຂັນລະດູການ 2019-2020 ພຽງເທົ່ານີ້ ເພື່ອຫລີກລ່ຽງການຕິດເຊື້ອໂຄວິດ-19 ທີ່ສະຖານະການຍັງໜ້າເປັນຫ່ວງທັງພາຍໃນ ແລະ ຕ່າງປະເທດ. ສະເພາະຢູ່ປະເທດແບນຊິກ ມີຜູ້ຕິດເຊື້ອຫລາຍກວ່າ 15.000 ຄົນ, ເສຍຊີວິດຫລາຍກວ່າ 1.000 ຄົນ.

ສຳລັບ ສະໂມສອນ ຄລັບບຣູດ ຜົນງານເດັ່ນສຸດໃນລີກລະດູການນີ້ ແຂ່ງ 29 ນັດ ຊະນະ 21 ສະເໝີ 7 ເສຍ 1 ມີ 70 ຄະແນນ ນຳອັນດັບ 2 ສະໂມສອນ ເກັບ 15 ຄະແນນ ຮັບແຊ້ມມາຄອງ ແຕ່ໂກຕ້າໄປແຊມປ້ຽນລີກ ລະດູການໜ້າຕ້ອງເພອັອຟກັບອີກ 5 ທີມ ທີ່ຕິດອັນດັບ 1-6, ຂະນະທີ່ ທີມອັນດັບສຸດທ້າຍ ສະໂມສອນ ວາສແລນ ເບເວເຣັນ ຕ້ອງໄປເພອັອຟໜີຕົກຊັ້ນກັບທີມຈາກລີກອັນດັບສອງຂອງປະເທດ.