ໂຮງໝໍຢູ່ນິວຢອກໃຊ້ວິຕາມິນເຊປິ່ນປົວໂຄວິດ-19

     ສຳນັກຂ່າວ New York Post ລາຍງານວ່າ: ໂຮງໝໍ Northwell Health ຢູ່ເມືອງລອງໄອສແລນ ລັດນິວຢອກ ຂອງອາເມລິກາ ໃຊ້ວິຕາມິນເຊປິ່ນປົວຜູ້ປ່ວຍ Covid-19 ຕາມຮອຍໂຮງໝໍຢູ່ຈີນ.

     ແອນດຣູ ຈີ. ເວເບີ ໝໍລະບົບຫາຍໃຈ ແລະ ຜູ້ຊ່ຽວຊານດ້ານການບຳບັດວິກິດຈາກໂຮງໝໍ Northwell Health ຢູ່ລອງໄອສແອນ ເປີດເຜີຍວ່າ: ຜູ້ປ່ວຍ Covid-19 ທີ່ມີອາການໜັກຈະໄດ້ຮັບວິຕາມິນເຊ 1.500 ມິນລີກຣາມ ຜ່ານເສັ້ນເລືອດໃນທັນທີ ແລະ ຈະໃຫ້ໃນປະລິມານດຽວກັນອີກວັນລະ 3-4 ຄັ້ງ ຄຽງຄູ່ກັບຢາອື່ນເຊັ່ນ: ຢາປິ່ນປົວມາລາເຣຍ.

     ເວເບີ ຍັງເປີດເຜີຍອີກວ່າ: ຄົນໄຂ້ທີ່ໄດ້ຮັບວິຕາມິນເຊມີອາການດີກວ່າຄົນໄຂ້ທີ່ບໍ່ໄດ້ຮັບ.

     ວິທີການດັ່ງກ່າວເປັນໄປຕາມຫລັກເກນຂອງການປິ່ນປົວຜູ້ປ່ວຍ Covid-19 ຢູ່ເມືອງຊຽງໄຮ້ຂອງຈີນ ຫລັງຈາກເລີ່ມທົດລອງທາງຄລີນິກກັບຜູ້ປ່ວຍຢູ່ໂຮງໝໍຈົງໜານໃນເມືອງອູ່ຮັ່ນວັນທີ 14 ກຸມພາຜ່ານມາ.

     ທັງນີ້ ເວເບີ ເປີດເຜີຍວ່າ: ວິຕາມິນເຊທີ່ແພດໃຊ້ມີປະລິມານຫລາຍກວ່າປະລິມານວິຕາມິນເຊທີ່ສະຖາບັນສຸຂະພາບແຫ່ງຊາດອາເມລິກາແນະນຳເຖິງ 16 ເທົ່າ ເນື່ອງຈາກປະລິມານວິຕາມິນເຊໃນຕົວຜູ້ປ່ວຍ Covid-19 ຈະຫລຸດລົງຢ່າງວ່ອງໄວຖ້າມີອາການຕິດເຊື້ອໃນກະແສເລືອດ.