ຊົມເຊີຍກຳລັງ ປກສ ນະຄອນຫລວງວຽງຈັນ ເລັ່ງແກ້ໄຂບັນຫາໂສເພນີ
ສະບາຍດີ ເພື່ອນຜູ້ອ່ານທີ່ຮັກແພງ, ບໍ່ຮູ້ວ່າດ້ວຍເຫດຜົນໃດ ຫລື ຍ້ອນສະພາບການພັດທະນາເສດຖະກິດ-ສັງຄົມມີການຂະຫຍາຍຕົວບໍ ? ມັນຈຶ່ງເຮັດໃຫ້ວິຊາອາຊີບທຳມາຫາກິນອື່ນໆກໍຂະຫຍາຍຕົວໄປນຳ ມີທັງອັນດີ ແລະ ອັນບໍ່ດີ. ຖ້າເຮົາບໍ່ຮູ້ ແລະ ເອົາໃຈໃສ່ເຂິງ-ເອົາໃຈໃສ່ຮ່ອນ ກໍຈະເຮັດໃຫ້ດ້ານລົບຄອບງຳສັງຄົມເຮົາກໍເປັນໄດ້ ເຊິ່ງຜ່ານມາມັນກໍເກີດຂຶ້ນໃຫ້ພວກເຮົາໄດ້ເຫັນແລ້ວ ຄືສະພາບຂີ້ລັກງັດແງະ, ຂ້າເຈົ້າເອົາຂອງ, ປຸ້ນຈີ້, ຕົ້ມຕຸນ, ບັນຫາຢາເສບຕິດ, ໂສເພນີ ແລະ ການຄ້າມະນຸດອື່ນໆ ເບິ່ງວ່ານັບມື້ຍິ່ງເພີ່ມທະວີ ແລະ ເປັນເຄືອຂ່າຍກວ້າງຂວາງ, ມີທັງພາຍໃນ ແລະ ຕ່າງປະເທດຜູ້ຢູ່ອ້ອມແອ້ມປະເທດເຮົາກໍເຂົ້າມາຫາກິນແບບງ່າຍໆນີ້ມີເຕັມໄປທົ່ວ ໂດຍສະເພາະແມ່ນບັນຫາໂສເພນີ ຢູ່ຕາມໂຮງແຮມລະດັບສູງ, ແຄມຖະໜົນ, ຢູ່ໃຕ້ຮູບແບບຮ້ານຕັດຜົມ, ເສີມສວຍ, ຮ້ານຂາຍກາເຟ, ຄາລາໂອເກະ ແລະ ເທັກບາຕ່າງໆກໍມີ. ຖ້າເວົ້າຢູ່ສະເພາະນະຄອນຫລວງວຽງຈັນພົ້ນເດັ່ນກວ່າໝູ່ກໍອາດຈະແມ່ນເຂດເສັ້ນທາດອນກອຍ, ບ້ານສີວິໄລ, ທາງໄປດົງນາໂຊກ ແລະ ຫລາຍແຫ່ງໃນເຂດຊານເມືອງກໍມີຫລາຍ ແລະ ລາຄາກໍບໍ່ແພງແລ້ວແຕ່ຄວາມອາດສາມາດຕໍ່ລອງຂອງຜູ້ຕ້ອງການ, ຮອດຍາມບຸນຍາມງານມາເຮືອນພັກຕ່າງໆຈົນໄດ້ລຽນຄິວ ໂດຍສະເພາະແມ່ນມື້ວັນແຫ່ງຄວາມຮັກ (ວາແລນທາຍ) ກໍຍິ່ງຮ້າຍແຮງ ແລະ ເປີດແປນ, ເບິ່ງຢ່າງໜຶ່ງຄືເບື້ອງສັງຄົມເຮົາປະປ່ອຍໄປ ແລະ ເບິ່ງຢ່າງໜຶ່ງກໍແມ່ນອາດເກີດມາຈາກການສົມຮູ້ຮ່ວມຄິດກັນລະຫວ່າງເຈົ້າໜ້າທີ່ທ້ອງຖິ່ນ ແລະ ຜູ້ປະກອບອາຊີບດັ່ງກ່າວ. ຖ້າບໍ່ພວກເຂົາສາມາດຈັດຕັ້ງການຂາຍປະເວນີແບບເປີດແປນນີ້ໄດ້ແນວໃດ ? ແລະ ກໍຂໍຊົມເຊີຍເປັນພິເສດໄດ້ຍິນຂ່າວວ່າເຈົ້າໜ້າທີ່ນະຄອນຫລວງວຽງຈັນພວມເລັ່ງປາບປາມ ແລະ ແກ້ໄຂຂະບວນຄ້າມະນຸດ ແລະ ໂສເພນີດັ່ງກ່າວໃຫ້ໝົດໄປ ເພື່ອຄວາມເປັນລະບຽບຮຽບຮ້ອຍ ແລະ ຄວາມສະຫງົບຂອງຕົວເມືອງຫລວງ.
