ທ່ານ ໂຈໂກວີ ປະກາດໃຫ້ໂບນັດແພດ 15 ລ້ານຣູເປຍ ສູ້ວິກິດ COVID-19
“ປະທານາທິບໍດີ ໂຈໂກວີ” ປະກາດໃຫ້ໂບນັດທີມແພດພະຍາບານເປັນເງິນ 5-15 ລ້ານຣູເປຍ ຫວັງສ້າງຂວັນກຳລັງໃຈ ສູ້ວິກິດ “ໂຄວິດ-19” ຫລັງສູນເສຍບຸກຄະລາກອນແພດໄປແລ້ວ 6 ຄົນ.
ປະທານາທິບໍດີ ໂຈໂກ ວິໂດໂດ ຂອງອິນໂດເນເຊຍ ກ່າວໃນວັນທີ 23 ມີນານີ້ວ່າ: ຮູ້ສຶກເສຍໃຈຈາກການສູນເສຍບຸກຄະລາກອນທາງການແພດຈຳນວນ 6 ຄົນ ໃນການປິ່ນປົວຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).
ທັງນີ້ ທາງການອິນໂດເນເຊຍໄດ້ເປີດໂຮງໝໍຊົ່ວຄາວຢູ່ນະຄອນຫລວງຈາກາຕາສຳລັບໃຊ້ປິ່ນປົວຜູ້ປ່ວຍໂຄວິດ-19 ຢູ່ເຮືອນພັກນັກກິລາເຄີຍຈັດເອຊຽນເກມ 2018.
ປະທານາທິບໍດີ ໂຈໂກວີ ໄດ້ສະເໜີໃຫ້ເງິນໂບນັດແພດພະຍາບານທີ່ຮ່ວມຕໍ່ສູ້ໂຄວິດ-19 ເປັນເງິນ 5-15 ລ້ານຣູເປຍ ຫລື ປະມານ 300-900 ໂດລາຕໍ່ເດືອນ.
ເຖິງຢ່າງໃດກໍຕາມ, ທາງການອິນໂດເນເຊຍໄດ້ປະກາດພາວະສຸກເສີນດ້ານສາທາລະນະສຸກຢູ່ນະຄອນຫລວງຈາກາຕາ ແລະ ຊະວາຕາເວັນອອກ ວັນທີ 20 ມີນາ ໂດຍຂໍ້ມູນໃນວັນທີ 23 ມີນາ ມີຜູ້ຕິດເຊື້ອຢູ່ອິນໂດເນເຊຍ ຈຳນວນ 514 ຄົນ ແລະ ເສຍຊີວິດແລ້ວ 48 ຄົນ.
