ເສັ້ນທາງຜາລະແວກ ຫາເທສະບານເມືອງຮົ່ມຄືບຫນ້າແລ້ວ 19,5%
ເມື່ອທ້າຍອາທິດຜ່ານມານີ້, ຮອງເຈົ້າແຂວງໄຊສົມບູນ ໄດ້ລົງຕິດຕາມຊຸກຍູ້ ການກໍ່ສ້າງເສັ້ນທາງປູຢາງແຕ່ຈຸດສຸມຜາລະແວກ ຫາເທດສະບານເມືອງຮົ່ມ, ພາຍຫລັງລົງມືກໍ່ສ້າງມາແຕ່ປີ 2014 ໂດຍແມ່ນບໍລິສັດ ສີຮຸ່ງເຮືອງ ພັດທະນາກໍ່ສ້າງ ຈຳກັດ ເປັນຜູ້ຮັບເໝົາ, ໃນມູນຄ່າທັງໝົດ ແມ່ນ 133 ຕື້ກວ່າກີບ.
ມາຮອດປັດຈຸບັນຄືບຫນ້າແລ້ວ19,5% ຍ້ອນຖືກໂຈະກວດກາ ຄືນຈາກຄະນະສະເພາະກິດຂອງລັດຖະບານ ຈົນມາຮອດປີ 2019 ຈິ່ງໄດ້ຮັບການເຫັນດີໃຫ້ສືບຕໍ່ກໍ່ສ້າງ ແລະ ໄດ້ມີການດັດແກ້ແບບຈາກທາງເບຕົງ ມາເປັນທາງປູຢາງ 2 ຊັ້ນ ຄື: ຊ່ວງໄລຍະທີ 1 ແມ່ນແຕ່ບ້ານນໍ້າຄຽນ ຫາສາມແຍກຜາລະແວກ, ຍາວ 1.700 ແມັດ, ຊ່ວງທີ2 ແຕ່ສາມແຍກຕະຫລາດຜາລະແວກ ຫາທາງເຂົ້າສຳນັກງານປົກຄອງເມືອງໃໝ່, ຍາວ 2.300 ແມັດ,ເປັນທາງປູຢາງ 2 ຊັ້ນ, ກ້ວາງ 10 ແມັດ, ມີທາງຄົນຢ່າງສອງຂ້າງກວ້າງເບື້ອງລະ 1,50 ແມັດ, ມີຮ່ອງລະບາຍນໍ້າ, ເທເບຕົ່ງສະເພາະບ່ອນທີ່ມີເນີນສູງຊັນ ແລະ ມີໄຟເຍືອງທາງທັງສອງຂ້າງສະຫຼັບກັນ, ສໍາລັບເສັ້ນທາງໃນເທດສະບານເມືອງຮົ່ມ ແຕ່ A1 ຮອດ A12 ມີຄວາມຍາວຫລາຍກ່ວາ 11 ກິໂລແມັດ, ປູດ້ວຍຢາງ 2 ຊັ້ນ, ກວ້າງ 7 ແມັດ. ໂດຍຈະໃຫ້ສຳເລັດພາຍໃນໄລຍະເວລາ 3 ປີ. ນັບແຕ່ເດືອນມີນານີ້ເປັນຕົ້ນໄປ.
