ອາຊີຜະເຊີນການລະບາດຮອບສອງຂອງໂຄວິດ-19 ຈາກຕ່າງແດນ
ຈີນ, ສ.ເກົາຫລີ ແລະ ສິງກະໂປ ເປັນສ່ວນໜຶ່ງຂອງຫລາຍປະເທດໃນພາກພື້ນອາຊີທີ່ພວມຜະເຊີນການແຜ່ລະບາດຮອບສອງຂອງໂຄວິດ-19 ໂດຍການລະບາດຄັ້ງນີ້ມາຈາກຄົນທີ່ເປັນພາຫະນຳເຊື້ອໄວຣັສໂຄໂຣນາສາຍພັນໃໝ່ຈາກຕ່າງແດນກັບເຂົ້າມາໃນປະເທດອີກເທື່ອໜຶ່ງ.
ຈີນ ເຊິ່ງເປັນແຫລ່ງກຳເນີດຂອງໂຣກລະບາດໄດ້ຖະແຫລງຢືນຢັນໃນວັນທີ 18 ມີນາວ່າ: ບໍ່ພົບຜູ້ຕິດເຊື້ອຄົນໃໝ່ພາຍໃນປະເທດເປັນຄັ້ງທຳອິດ ນັບແຕ່ການລະບາດເລີ່ມຕົ້ນຂຶ້ນໃນຫລາຍເດືອນກ່ອນ ເຊິ່ງຖືເປັນຜົນສຳເລັດຄັ້ງສຳຄັນ, ແຕ່ຂະນະດຽວກັນ ຈີນພັດພົບຜູ້ຕິດເຊື້ອຄົນໃໝ່ເຖິງ 34 ຄົນ ໃນກຸ່ມຜູ້ທີ່ເດີນທາງມາຈາກຕ່າງປະເທດ.
ສ່ວນສິງກະໂປມີລາຍງານຜູ້ຕິດເຊື້ອຄົນໃໝ່ 47 ຄົນ ເຊິ່ງໃນຈຳນວນນີ້ 33 ຄົນມາຈາກຕ່າງແດນເຊັ່ນກັນ ໂດຍເປັນຜູ້ອາໄສຢູ່ສິງກະໂປທີ່ຫາກໍເດີນທາງກັບຈາກຕ່າງປະເທດເຖິງ 30 ຄົນ.
ສ່ວນ ສ.ເກົາຫລີ ມີຈຳນວນຜູ້ຕິດເຊື້ອຄົນໃໝ່ເພີ່ມສູງເຖິງ 152 ຄົນ ໃນວັນທີ 19 ມີນາ ແຕ່ຍັງບໍ່ແນ່ນອນວ່າເປັນການຕິດເຊື້ອຈາກຕ່າງປະເທດຈັກຄົນ ສ່ວນຫລາຍເປັນກໍລະນີທີ່ພົບຢູ່ສະຖານທີ່ເບິ່ງແຍງຜູ້ເຖົ້າເມືອງແດກູ ເຊິ່ງມີການຢືນຢັນຜູ້ຕິດເຊື້ອເຖິງ 74 ຄົນ.
ຍີ່ປຸ່ນລາຍງານວ່າມີຜູ້ຕິດເຊື້ອຄົນໃໝ່ພຽງ 3 ຄົນ ໃນວັນທີ 18 ມີນາ, ແຕ່ແຂວງຮອກໄກໂດ ເຊິ່ງເປັນພື້ນທີ່ທີ່ມີການລະບາດໜັກທີ່ສຸດ ໂດຍມີຜູ້ຕິດເຊື້ອ 154 ຄົນ ໄດ້ຍົກເລີກພາວະສຸກເສີນທີ່ປະກາດໃຊ້ແຕ່ເດືອນກຸມພາ ຫລັງເຈົ້າໜ້າທີ່ຂອງທາງການຖະແຫລງວ່າ: ການແຜ່ກະຈາຍຂອງເຊື້ອໄວຣັສໂຄວິດ-19 ອາດຈະຢຸດຕິລົງແລ້ວ. ເຖິງວ່າທາງການຈະຂໍໃຫ້ປະຊາຊົນຍັງລະມັດລະວັງ ແລະ ຢູ່ແຕ່ໃນເຮືອນຕໍ່ໄປ, ແຕ່ກໍຍັງລະບຸອີກວ່າ: “ຈຳນວນຜູ້ຕິດເຊື້ອບໍ່ໄດ້ເພີ່ມຂຶ້ນຫລາຍ ໃນລັກສະນະທີ່ຈະເຮັດໃຫ້ສະພາບການທາງການແພດ ແລະ ລະບົບສາທາລະນະສຸກຫລົ້ມ”.
ກໍລະນີຂອງຈີນ, ຍີ່ປຸ່ນ, ສ.ເກົາຫລີ ແລະ ສິງກະໂປ ລ້ວນສະແດງໃຫ້ເຫັນເຖິງຜົນສຳເລັດໃນການຄວບຄຸມໂຣກລະບາດພາຍໃນປະເທດ, ແຕ່ຍັງມີຄວາມກັງວົນວ່າ: ການແຜ່ລະບາດໃນອັດຕາທີ່ສູງຂຶ້ນໃນພາກພື້ນອື່ນຂອງໂລກ ອາດເຮັດໃຫ້ຜົນສຳເລັດເບື້ອງຕົ້ນ ແລະ ຄວາມຄືບໜ້າໄປສູ່ການຟື້ນຟູສະພາບສັງຄົມ ແລະ ເສດຖະກິດຕ້ອງພັງທະລາຍລົງ.
ບາດກ້າວທຳອິດຂອງໄຊຊະນະຕໍ່ໂຣກລະບາດຈະຍືນຍົງ ຫລື ບໍ່ ?
ຄະນະກຳມະການສຸຂະພາບແຫ່ງຊາດຈີນ (NHC) ແຈ້ງວ່າບໍ່ພົບກໍລະນີການແຜ່ເຊື້ອພາຍໃນປະເທດເປັນຄັ້ງທຳອິດ ນັບແຕ່ການລະບາດຂອງໂຄວິດ-19 ເລີ່ມຕົ້ນຂຶ້ນໃນທ້າຍເດືອນທັນວາປີຜ່ານມາ ແລະ ຍັງກ່າວອີກວ່າ: ບໍ່ພົບຜູ້ຕິດເຊື້ອຄົນໃໝ່ຢູ່ເມືອງອູ່ຮັ່ນ ເຊິ່ງຖືກສັ່ງປິດເມືອງໄປແຕ່ທ້າຍເດືອນມັງກອນ ແຕ່ພັດມີຜູ້ຕິດເຊື້ອມາຈາກຕ່າງແດນອີກ 34 ຄົນ.
ຊາວອູ່ຮັ່ນບາງສ່ວນທີ່ຖືກກັກກັນໂຣກຢູ່ແຕ່ໃນເຮືອນເປັນເວລາກວ່າ 6 ອາທິດ ໄດ້ຮັບອະນຸຍາດໃຫ້ເລີ່ມອອກມາໃຊ້ຊີວິດທາງນອກໄດ້ແດ່ແລ້ວ ຕາບໃດທີ່ບໍ່ມີການຈັບກຸ່ມກັນໃນບ່ອນສາທາລະນະ, ຫ້າງຮ້ານ ແລະ ກິດຈະການບາງແຫ່ງ ກໍສາມາດກັບມາເປີດດຳເນີນການຕາມປົກກະຕິໄດ້ແລ້ວ ໂດຍໃນເຂດທີ່ທາງການປະກາດວ່າ: “ປອດການລະບາດ” ຕະຫລາດນ້ອຍ ແລະ ຮ້ານຂາຍຍ່ອຍຕ່າງເປີດການຄ້າຂາຍອີກ.
ເຖິງຢ່າງໃດກໍຕາມ, ຈີນຍັງມີມາດຕະການປ້ອງກັນການຕິດເຊື້ອຄົນໃໝ່ຈາກຕ່າງປະເທດຢູ່ ໂດຍໄດ້ເປີດໂຮງໝໍທີ່ເຄີຍໃຊ້ປິ່ນປົວໂຣກຊາຣ໌ສ (SARS) ຢູ່ນະຄອນຫລວງປັກກິ່ງຂຶ້ນມາອີກ ເພື່ອເປັນສະຖານທີ່ກັກກັນຜູ້ຕ້ອງສົງໄສຕິດເຊື້ອເຫລົ່ານີ້, ສ່ວນຢູ່ເຂດປົກຄອງພິເສດຮົງກົງ ຜູ້ທີ່ເດີນທາງມາຈາກຕ່າງປະເທດຈະຕ້ອງໃສ່ສາຍຮັດຂໍ້ມືເອເລັກໂຕຣນິກ ເພື່ອຕິດຕາມການເຄື່ອນໄຫວຫລັງເຂົ້າປະເທດ.
ຈຳນວນຜູ້ເສຍຊີວິດຈາກໂຄວິດ-19 ຂອງຈີນທັງໝົດມີ 3.245 ຄົນ ແຕ່ຍັງມີຄຳຖາມເຖິງຄວາມໜ້າເຊື່ອໃນການເປີດເຜີຍຂໍ້ມູນຂອງທາງການຈີນຢູ່.
ສ່ວນ ສ.ເກົາຫລີ ເຊິ່ງໄດ້ຮັບຄຳຍ້ອງຍໍຈາກບັນດາປະເທດ ໃນເລື່ອງການຕິດຕາມ ແລະ ກັກກັນຜູ້ຕ້ອງສົງໄສຕິດເຊື້ອໄດ້ຢ່າງວ່ອງໄວ ລວມທັງກວດຫາເຊື້ອໄວຣັສກັບປະຊາກອນຈຳນວນຫລາຍ. ປັດຈຸບັນອັດຕາການຕິດເຊື້ອຄົນໃໝ່ພາຍໃນປະເທດຢຸດລົງ ຫລັງຜ່ານຊ່ວງການລະບາດສູງສຸດໄປແລ້ວໃນຕົ້ນເດືອນນີ້.
ກ່ອນການລາຍງານຈຳນວນຜູ້ຕິດເຊື້ອຄົນໃໝ່ທີ່ເພີ່ມຂຶ້ນເປັນຮ້ອຍຄົນໃນວັນທີ 18 ມີນາ, ສ.ເກົາຫລີ ມີກໍລະນີຜູ້ຕິດເຊື້ອພາຍໃນປະເທດຕໍ່ວັນເປັນຕົວເລກສອງຫລັກຕິດຕໍ່ກັນມາເຖິງ 4 ວັນ ແຕ່ກໍມີຜູ້ຕິດເຊື້ອຈາກຕ່າງປະເທດນຳ 3 ຄົນ ເປັນນັກກິລາຟັນດາບທີ່ຫາກໍເດີນທາງກັບຈາກການແຂ່ງຂັນຢູ່ປະເທດຮົງກາລີ.
ສະພາບການດັ່ງກ່າວເຮັດໃຫ້ທາງການ ສ.ເກົາຫລີ ຍັງຄົງລະມັດລະວັງ ໂດຍຖະແຫລງວ່າຈະຍັງບໍ່ມີການຫລຸດຜ່ອນມາດຕະການໃດໆ ແລະ ເນັ້ນເຕືອນໃຫ້ປະຊາຊົນຫລີກເວັ້ນການຊຸມນຸມ ລວມທັງສະ ຖານທີ່ທີ່ມີຄົນແອອັດ.
