ກອງທັບມຽນມາຢືນຢັນພົບສົບ ແລະ ຊາກເຮືອບິນທີ່ຫາຍໄປແລ້ວ
ເຟສບຸກທາງການຂອງກອງທັບມຽນມາເປີດເຜີຍວ່າ: ພົບຊາກເຮືອບິນ ແລະ ຮ່າງຜູ້ເສຍຊີວິດໃນທະເລອັນດາມັນແລ້ວ ຢູ່ນອກແຄມຝັ່ງທະເລຂອງເມືອງທວາຍ, ພາຍຫລັງເຮືອບິນທີ່ມີຜູ້ໂດຍສານ 122 ຄົນ ຂາດການຕິດຕໍ່ໃນເວລາ 13:35 ໂມງ ວັນທີ 7 ມິຖຸນາ ຕາມເວລາທ້ອງຖິ່ນ (ກົງກັບເວລາ 14:05 ໂມງ ວັນທີ 7 ມິຖຸນາ ຕາມເວລາຢູ່ລາວ).
ກອງທັບມຽນມາລາຍງານຜົນຂອງປະຕິບັດການຄົ້ນຫາໃນຕອນເຊົ້າຜ່ານມາວ່າ: ພົບຮ່າງຜູ້ເສຍຊີວິດ 3 ຄົນ ເປັນຜູ້ຊາຍ, ຜູ້ຍິງ ແລະ ເດັກນ້ອຍ ແລະ ຊິ້ນສ່ວນຂອງເຮືອບິນເຊັ່ນ: ລໍ້ເຮືອບິນ. ນອກຈາກນີ້ຍັງພົບເສື້ອຊູຊີບ ແລະ ກະເປົາເດີນທາງຫລາຍໜ່ວຍ.
ສຳລັບຜູ້ໂດຍສານໃນເຮືອບິນລຳດັ່ງກ່າວ ປະກອບມີລູກເຮືອນ 14 ຄົນ, ເຈົ້າໜ້າທີ່ທະຫານ ແລະ ຄອບຄົວອີກ 106 ຄົນ ໃນຈຳນວນນັ້ນມີເດັກນ້ອຍລວມຢູ່ນຳ.
ກ່ອນໜ້ານີ້, AFP ລາຍງານອ້າງແຫລ່ງຂ່າວກອງທັບອາກາດວ່າ: ເຮືອກູ້ໄພ ແລະ ຄົ້ນຫາຂອງກອງທັບເຮືອໄດ້ພົບຊິ້ນສ່ວນຫລາຍອັນຂອງເຮືອບິນລຳດັ່ງກ່າວ ເຊິ່ງມີຜູ້ໂດຍສານທີ່ເປັນເດັກນ້ອຍຢູ່ໃນເຮືອບິນກວ່າ 10 ຄົນ.
ເຮືອບິນລຳນີ້ເດີນທາງຈາກເມືອງມະຣິດ ມີຈຸດໝາຍຢູ່ນະຄອນຢາງກຸ້ງ, ແຕ່ພາຍຫລັງອອກເດີນທາງມາໄດ້ປະມານເຄິ່ງຊົ່ວໂມງ ເຮືອບິນກໍຂາດການຕິດຕໍ່, ເຖິງວ່າຈະເປັນລະດູມໍລະສົມຢູ່ມຽນມາ, ແຕ່ບໍ່ມີລາຍງານວ່າມີສະພາບອາກາດຮ້າຍແຮງໃນຕອນນັ້ນ.
ສຳລັບເຮືອບິນທີ່ເກີດເຫດຄື ຮຸ່ນ ວາຍ 8 ເຊິ່ງຜະລິດຢູ່ຈີນ, ກອງທັບມຽນມາຊື້ມາໃນເດືອນມີນາປີຜ່ານມາ ແລະ ມີຊົ່ວໂມງບິນແລ້ວ 809 ຊົ່ວໂມງ.
ໃນຫລາຍປີຜ່ານມາ ມີລາຍງານການເກີດອຸປະຕິເຫດທາງເຮືອບິນຫລາຍເທື່ອເຊັ່ນ: ໃນເດືອນກຸມພາປີຜ່ານມາ ເກີດອຸປະຕິເຫດເຮືອບິນຂອງກອງທັບອາກາດຕົກຢູ່ນະຄອນຫລວງເນປີດໍ ເຊິ່ງເຮັດໃຫ້ທະຫານອາກາດ 5 ຄົນເສຍຊີວິດ ແລະ ຫລາຍເດືອນຕໍ່ມາ ກໍເກີດອຸປະຕິເຫດເຮລິກົບແຕຕົກທາງຕອນກາງຂອງປະເທດ ເຮັດໃຫ້ເຈົ້າໜ້າທີ່ອີກ 3 ຄົນເສຍຊີວິດ.
ໃນປີ 2012 ສາຍການບິນແອ ບາກັນ ເຊິ່ງເປັນສາຍການບິນການຄ້າຂອງມຽນມາ ຕ້ອງລົງຈອດສຸກເສີນ, ແຕ່ຫລັງຈາກນັ້ນບໍ່ດົນກໍເກີດໄຟໄໝ້ ອຸປະຕິເຫດເທື່ອນັ້ນຈະເຮັດໃຫ້ມີຜູ້ເສຍຊີວິດ 3 ຄົນ.
