ລາວອາດຈະຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2024
ກອງປະຊຸມຄະນະຊີ້ນໍາລະດັບຊາດເພື່ອການຈັດຕັ້ງປະຕິບັດແຜນດໍາເນີນງານ ສປຊ ສໍາລັບປະເທດດ້ອຍພັດທະນາ ທີ່ໄດ້ຈັດຂຶ້ນໃນວັນທີ 16 ມີນາ ນີ້, ຢູ່ ນະຄອນຫລວງວຽງຈັນ, ໄດ້ຕີລາຄາວ່າ: ຢ່າງຫນ້ອຍຮອດປີ 2024 ລາວຈິ່ງຈະສາມາດຫລຸດພົ້ນອອກຈາກສະຖານະພາບປະເທດດ້ອຍພັດທະນາໄດ້.
ກອງປະຊຸມດັ່ງກ່າວພາຍໃຕ້ການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ຮອງປະທານຜູ້ປະຈໍາການຄະນະຊີ້ນໍາລະດັບຊາດກ່ຽວກັບການຈັດຕັ້ງປະຕິບັດແຜນດຳເນີນງານດັ່ງກ່າວ,ໂດຍ ມີຜູ້ຕາງໜ້າຈາກກະຊວງ ແລະ ຂະແໜງການຕ່າງໆເຂົ້າຮ່ວມນຳດ້ວຍ.
ກອງປະຊຸມໄດ້ຮັບຟັງລາຍງານກ່ຽວກັບກົນໄກຂະບວນການທົບທວນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຂອງຄະນະກໍາມະການນະໂຍບາຍດ້ານການພັດທະນາ ສປຊ , ຮັບຟັງຄວາມພ້ອມ ແລະ ການກະກຽມຂອງ ສປປ ລາວ ສໍາລັບຂະບວນການທົບທວນ ຄັ້ງທີ II ກ່ຽວກັບການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2021 ແລະ ການລາຍງານສະພາບລວມດ້ານສະຖິຕິຂອງ 3 ເງື່ອນໄຂໃນການປະເມີນເພື່ອຫຼຸດພົ້ນອອກຈາກສະຖານະພາບປະເທດດ້ອຍພັດທະນາຄື: ດັດສະນີຍອດລວມລາຍຮັບແຫ່ງຊາດຕໍ່ຫົວຄົນ, ດັດສະນີຊັບສິນມະນຸດ ແລະ ດັດສະນີຄວາມບອບບາງດ້ານເສດຖະກິດ
ທ່ານ ຮອງລັດຖະມົນຕີ ກະຊວງ ການຕ່າງປະເທດ ໃຫ້ຮູ້ວ່າ: ລັດຖະບານລາວມີຄວາມໝາຍໝັ້ນທີ່ຈະເລັ່ງໃສ່ການແກ້ໄຂຄວາມທຸກຍາກ ແລະ ສ້າງເງື່ອນໄຂໃຫ້ແກ່ການຫຼຸດພົ້ນອອກຈາກສະຖານະພາບດ້ອຍພັດທະນາໃນອະນາຄົດ ຖ້າຫາກ ສປປ ລາວ ສາມາດຜ່ານການປະເມີນຢ່າງໜ້ອຍ 2 ໃນ 3 ເງື່ອນໄຂຕື່ມອີກ ຈຶ່ງຈະສາມາດສະຫລຸບຜົນໄດ້ວ່າລາວເຮົາສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາໄດ້ຫລືບໍ່.
