ນາຍົກລັດຖະມົນຕີເນັ້ນໃຫ້ເອົາໃຈໃສ່ປ້ອງກັນ covid-19, ລັດຖະບານຈະຫາລືແກ້ໄຂຜົນກະທົບທາງເສດຖະກິດ
ໃນໂອກາດລົງກວດກາດ່ານຜ່ານແດນຂົວມິດຕະພາບລາວ-ໄທ ແຫ່ງທີ 1 ແລະ ສະໜາມບິນສາກົນວັດໄຕ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ໃນວັນທີ 16 ມີນາ ນີ້, ທ່ານໄດ້ເນັ້ນໃຫ້ດ່ານຜ່ານແດນດັ່ງກ່າວເພີ່ມທະວີການກວດກາຜູ້ເຂົ້າ-ອອກເມືອງໃຫ້ເຂັ້ງງວດເພື່ອສະກັດກັ້ນການຕິດເຊື້ອ covid-19, ເນື່ອງຈາກປັດຈຸບັນ, ທົ່ວໂລກກຳລັງພະເຊີນກັບໄພຄຸກຄາມຮ້າຍແຮງຈາກການລະບາດຂອງພະຍາດ covid-19, ຊຶ່ງລວມມີຜູ້ຕິດເຊື້ອຫລາຍກ່ວາ 128.343 ຄົນ ແລະ ໄດ້ຂ້າຊີວິດຄົນໃນຫລາຍປະເທດໄປແລ້ວ, ໂດຍທາງອົງການອະນາໄມໂລກ ໄດ້ແຈ້ງວ່່າ: ການແຜ່ລະບາດຂອງໄວຣັສດັ່ງກ່າວ ໄດ້ລຸກລາມໄປຫລາຍເຂດແຄ້ວນຂອງໂລກ, ສະນັ້ນ ຕໍ່ກັບວິກິດການນີ້, ຫລາຍປະເທດຕ່າງກໍໄດ້ສຸມໃຈໃສ່ສະກັດກັ້ນ. ຍັງບໍ່ທັນພົບກໍລະນີຕິດເຊື້ອ, ແຕ່ລັດຖະບານກໍບໍ່ໄດ້ລົດລະ ຫລື ນີ້ງນອນໃຈ ຕໍ່ກັບບັນຫາດັ່ງກ່າວ, ໂດຍຕັ້ງຄະນະສະເພາະກິດຕິດຕາມເຝົ້າລະວັງ, ວາງແຜນປ້ອງກັນ ແລະ ຄວບຄຸມຢ່າງເຂັ້ມງວດ, ເພາະວ່າລາວເຮົາ ກໍເປັນປະເທດຫນຶ່ງທີ່ມີຄວາມສ່ຽງສູງຂອງການແຜ່ລະບາດໄວຣັສໂຫດຮ້າຍນີ້.
ທ່ານນາຍົກ ຢັ້ງຢືນວ່າ: ລາວ ມີຜູ້ສົງໃສ 68 ກໍລະນີ, ແຕ່ກວດເປັນຜົນລົບ 65 ກໍລະນີ ແລະ 3 ກໍລະນີຍັງລໍຖ້າຜົນກວດຢູ່.
ປັດຈຸບັນ ລາວໄດ້ສັ່ງປິດດ່ານເຂົ້າ-ອອກ ທ້ອງຖິ່ນຂອງແຂວງຕ່າງໆທີ່ມີຊາຍແດນຕິດກັບປະເທດທີ່ມີການລະບາດ, ພ້ອມນັ້ນ ກໍໄດ້ມີການໃຫ້ໂຈະການເຂົ້າຮຽນຊົ່ວຄາວ ຂອງໂຮງລ້ຽງເດັກ ແລະ ໂຮງຮຽນອະນຸບານ ເພື່ອສະກັດກັ້ນການແຜ່ເຊື້ອຂອງພະຍາດນີ້, ໄດ້ອອກແຈ້ງການໃຫ້ໂຈະບັນດາກິດຈະກຳທີ່ມີການໂຮມຊຸມນຸມເປັນຈຳນວນຫລາຍ ແລະ ຍົກລະດັບຄວາມຮູ້ທາງການແພດ ໃຫ້ພະນັກ ງານແພດໝໍ ເພື່ອຕິດຕາມເຝົ້າລະວັງ ແລະ ປິ່ນປົວຜູ້ຕິດເຊື້ອ, ພ້ອມທັງຈັດກຽມເຄື່ອງມືອຸປະກອນ, ກວດກາຄົນເຂົ້າ-ອອກປະຈຳດ່ານ ຢ່າງເຂັ້ມງວດ.
ທ່ານ ນາຍົກລັດຖະມົນຕີ ໃຫ້ຮູ້ວ່າ: ສະພາບການລະບາດ ຂອງພະຍາດ ນີ້, ອາດຈະແກ່ຍາວ ແລະ ສົ່ງຜົນກະທົບຕໍ່ເສດຖະກິດຂອງປະເທດ, ສະນັ້ນ ລັດຖະບານຈະໄດ້ມີການຫາລື ແລະ ວາງທິດທາງແກ້ໄຂ ຢູ່ກອງປະຊຸມຄະນະລັດຖະບານ ໃນວັນທີ 18 ມີນາ ນີ້.
