ຈະໂຈະບາງກິດຈະກຳໃນຊ່ວງບຸນປີໃຫມ່ລາວ

ບຸນປີໃຫມ່ລາວ ຢູ່ ນະຄອນຫລວງວຽງຈັນ ຈະຈັດແບບລຽບງ່າຍ ປ້ອງກັນພະຍາດ ໂຄວິດ-19
ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໃຫ້ຮູ້ວ່າ: ງານບຸນປີໃໝ່ລາວຢູ່ນະຄອນຫຼວງວຽງຈັນ ປີນີ້ຈະຈັດຂຶ້ນແບບລຽບງ່າຍຕາມຮີດຄອງພະເພນີ ສ່ວນກິດຈະກຳທີ່ມີຄົນເຂົ້າຮ່ວມຫຼາຍເຊັ່ນ: ແຂ່ງຂັນກິລາເທິງຫາດຊາຍ ແລະ ຂະບວນແຫ່ຕ່າງໆແມ່ນຈະສະເໜີໃຫ້ເຈົ້າຄອງນະຄອນຫຼວງວຽງຈັນ ພິຈາລະນາເພື່ອໂຈະງານດັ່ງກ່າວພາຍໃນອາທິດໜ້າ, ສ່ວນງານປະກວດນາງສາວນະຄອນຫຼວງວຽງຈັນ ແມ່ນຈະສະເໜີໃຫ້ເລື່ອນອອກໄປແບບບໍ່ມີກຳນົດ.

ໃນຂະນະດຽວກັນຢູ່ເມືອງວັງວຽງ ແຂວງວຽງຈັນ ແລະ ນະຄອນຫຼວງພະບາງ ແຂວງຫຼວງພະບາງ ກໍ່ໄດ້ມີການໂຈະບາງກິດຈະກຳທີ່ມີຄວາມ ແອອັດເຊັ່ນ: ການປະກວດນາງສັງຂານ, ກິດຈະກຳຕົບພະທາດຊາຍ, ງານຄອນເສີດ, ງານຕະຫຼາດນັດ ແລະ ຂະບວນແຫ່ຕ່າງໆ ເພື່ອເປັນການປ້ອງກັນພະຍາດ COVID-19

ເມື່ອບໍ່ດົນມານີ້, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ອອກແຈ້ງການ ໃຫ້ໂຈະ ຫຼື ເລື່ອນຊົ່ວຄາວ ກ່ຽວກັບງານປະເພນີ, ງານດອງ ແລະ ງານສັງສັນຕ່າງໆທີ່ມີຄົນຈຳນວນຫຼາຍເຂົ້າຮ່ວມ ເພື່ອຫຼຸດຜ່ອນຄວາມສ່ຽງຈາກການລະບາດຂອງພະຍາດ COVID-19.