ສຶກສາ-ກິລາມີຫລາຍມາດຕະການ ປ້ອງກັນໂຄວິດ-19

     ເມື່ອມໍ່ໆມານີ້, ລັດຖະມົນຕີກະຊວງສຶກສາທິການ ແລະ ກິລາ ທ່ານ ນາງ ແສງເດືອນ ຫລ້າຈັນທະບູນ ໃຫ້ຮູ້ວ່າ: ປັດຈຸບັນຂະແໜງການຂອງຕົນຍັງຈະໄດ້ເພີ່ມທະວີວາງຫລາຍມາດຕະການເພື່ອປ້ອງກັນຄວາມສ່ຽງການແຜ່ລະບາດຂອງເຊື້ອຈຸລະໂຣກ COVID-19 ຄື: ອອກແຈ້ງການໃຫ້ສະຖາບັນການສຶກສາໃນຂອບເຂດທົ່ວປະເທດເຮັດອະນາໄມທໍາສະອາດໃນສະຖານການສຶກສາຂອງຕົນ ເພື່ອໃຫ້ປາສະຈາກເຊື້ອພະຍາດຕ່າງໆ, ພ້ອມທັງຈະໄດ້ແນະນໍາໃຫ້ຜູ້ບໍລິຫານໂຮງຮຽນ, ຄູອາຈານ ແລະ ຜູ້ປົກຄອງເອົາໃຈໃສ່ຕິດຕາມອາການຂອງນັກຮຽນ-ນັກສຶກສາ ກໍຄືລູກຫລານຂອງຕົນຢ່າງໃກ້ຊິດ ແລະ ຖ້າເຫັນວ່າມີອາການໄຂ້ຕ້ອງໄປພົບແພດ ຫລື ໃຫ້ພັກຜ່ອນຢູ່ເຮືອນຊົ່ວຄາວ. ນອກນີ້ ແມ່ນຈະໃຫ້ໂຮງຮຽນແຫ່ງຕ່າງໆຈັດຕັ້ງກິດຈະກໍາປູກຈິດສໍານຶກເພື່ອປ້ອງກັນຕົນເອງຈາກພະຍາດ ໂດຍສະເພາະການລ້າງມືໃຫ້ສະອາດ ແລະ ອອກແຮງງານຝຶກກາຍະບໍລິຫານ ເພື່ອໃຫ້ຮ່າງກາຍແຂງແຮງ. ຄຽງຄູ່ກັນນັ້ນ ກໍຈະເອົາໃຈໃສ່ຜັນຂະຫຍາຍມາດຕະການປ້ອງກັນຕ່າງໆຂອງລັດຖະບານໃຫ້ສອດຄ່ອງກັບ ຂະແໜງການສຶກສາ ແລະ ກິລາໃຫ້ມີປະສິດທິຜົນ.

     ທ່ານລັດຖະມົນຕີ ໃຫ້ຮູ້ວ່າ: ມາຮອດປັດຈຸບັນຢູ່ ສປປ ລາວ ຍັງບໍ່ມີຜູ້ຕິດເຊື້ອພະຍາດນີ້ກໍຕາມ, ແຕ່ລັດຖະບານ ກໍຄືກະຊວງສຶກສາທິການ ແລະ ກິລາ ໄດ້ວາງມາດຕະການທີ່ຕິດພັນກັບຂະແໜງການຂອງຕົນຢ່າງເຂັ້ມງວດເຊັ່ນ: ການເລື່ອນຈັດງານມະຫາກໍາກິລາແຫ່ງຊາດຄັ້ງທີ XI ຢູ່ແຂວງຊຽງຂວາງ, ຍົກເລີກການແຂ່ງຂັນແລ່ນວຽງຈັນຮາຟມາຣາທອນນານາຊາດຄັ້ງທີ V, ໂຈະການສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດປະຈໍາສົກຮຽນ 2019-2020 ພ້ອມໄດ້ເນັ້ນໃຫ້ຜູ້ບໍລິຫານການສຶກສາ, ຄູອາຈານ ແລະ ຜູ້ປົກຄອງເອົາໃຈໃສ່ປະຕິບັດວິທີປ້ອງກັນ ແລະ ຕິດຕາມສະພາບການລະບາດຂອງພະຍາດນີ້ຢ່າງໃກ້ຊິດຈາກສໍານັກຂ່າວທີ່ເປັນທາງການ, ພ້ອມທັງຮຽກຮ້ອງໃຫ້ທຸກພາກສ່ວນໃນສັງຄົມຍົກສູງຄວາມເປັນເຈົ້າການຕອບຕ້ານຕໍ່ກະແສຂ່າວລື, ຂ່າວບໍ່ມີຄວາມຈິງຕ່າງໆ ທີ່ໃສ່ຮ້າຍປ້າຍສີ ແລະ ສ້າງຄວາມປັ່ນປ່ວນສັງຄົມເຮົາໃຫ້ທັນການ ແລະ ໝົດໄປ.