ນະໂຍບາຍດີໆ ເພື່ອສົ່ງເສີມບົດບາດຂອງເພດຍິງ
ເບິ່ງກວ້າງເຫັນໄກ: ວິເສດສະແຫວງສຶກສາ
ເພື່ອສົ່ງເສີມບົດບາດຍິງ-ຊາຍດ້ວຍການຮັບປະກັນຄວາມຍຸຕິທຳ, ຄວາມສະເໝີພາບຮອບດ້ານນັ້ນ ຫລາຍປະເທດໄດ້ເອົາມາດຕະການຕົວຈິງໃນຂົງເຂດວຽກງານຕ່າງໆ. ຕົວຢ່າງຢູ່ປະເທດເມັກຊິກ (ຫລື ເມັກຊິໂກ) ນັ້ນ ທາງການໄດ້ມີຄວາມພະຍາຍາມສູງ ເພື່ອຮັດແຄບຄວາມບໍ່ສະເໝີພາບລະຫວ່າງຍິງ-ຊາຍໃນຕະຫລາດແຮງງານ ໂດຍໄດ້ກຳນົດແຜນເພີ່ມແຫລ່ງກຳລັງແຮງທາງການເງິນໃຫ້ແກ່ໂຄງການຊ່ວຍເຫລືອຜູ້ປະກອບການເພດຍິງໃນທຸລະກິດຂະໜາດກາງ ແລະ ນ້ອຍ ຈາກ 6,7 ຕື້ເປໂຊ (ປະມານ 350 ລ້ານໂດລາສະຫະລັດ) ມາເປັນ 12 ຕື້ເປໂຊ ພາຍໃນປີ 2018 ແລະ ມີແຜນເພີ່ມຂຶ້ນຕື່ມເປັນແຕ່ລະບາດກ້າວ.
ທາງກະຊວງການເງິນ ແລະ ສິນເຊື່ອຂອງເມັກຊິກໄດ້ໃຫ້ຮູ້ຕື່ມວ່າ: ການເພີ່ມກຳລັງແຮງທາງການເງິນໃຫ້ແກ່ໂຄງການດັ່ງກ່າວ ແມ່ນເພື່ອສ້າງໂອກາດໃຫ້ຜູ້ປະກອບການເພດຍິງໄດ້ເຂົ້າຮ່ວມໃນການພັດທະນາການຜະລິດທຸລະກິດຫລາຍຂຶ້ນ ແລະ ກ້າວຂຶ້ນສູ່ຕຳແໜ່ງຜູ້ບໍລິຫານ-ຈັດການໃນຂະແໜງການດັ່ງກ່າວ.
ທາງການຄາດວ່າ: ການຮັດແຄບຄວາມບໍ່ສະເໝີພາບລະຫວ່າງເພດຢູ່ໃນຕະຫລາດແຮງງານນີ້ຈະເຮັດໃຫ້ລາຍໄດ້ສະເລ່ຍໃສ່ຫົວຄົນເພີ່ມຂຶ້ນຕື່ມ. ຢູ່ມຽນມາ ເມື່ອ 5 ປີກ່ອນນີ້ ກົດໝາຍວ່າດ້ວຍການມີຜົວດຽວເມຍດຽວ (Monogamy Bill) ໄດ້ເລີ່ມມີຜົນສັກສິດ. ກົດໝາຍສະບັບນີ້ໄດ້ກຳນົດບົດລົງໂທດຕໍ່ຜູ້ມີຄູ່ສົມລົດຫລາຍກວ່າ 1 ຄົນ ກໍຄືຍິງ-ຊາຍທີ່ຢູ່ຮ່ວມກັນແບບຜົວເມຍ ໂດຍບໍ່ທັນໄດ້ແຕ່ງດອງເທື່ອ. ນອກຈາກນັ້ນ ມຽນມາຍັງມີກົດໝາຍອີກ 2 ສະບັບທີ່ຈຳກັດການປ່ຽນສາສະໜາ ແລະ ສົມລົດຂອງຍິງຊາຍຕ່າງສາສະໜາ.
ເມື່ອເດືອນພຶດສະພາປີ 2015 ທາງການມຽນມາໄດ້ປະກາດໃຊ້ກົດໝາຍຄວບຄຸມປະຊາກອນ ໂດຍໄດ້ກຳນົດໃຫ້ແມ່ຍິງບາງກຸ່ມຕ້ອງເວັ້ນໄລຍະຫ່າງເປັນເວລາ 3 ປີໃນການຖືພາ ເຊິ່ງຄ້າຍໆກັບໂຄງການລູກຫ່າງຢູ່ປະເທດລາວພວກເຮົາ. ທີ່ປະເທດໄອສະແລນ (Iceland) ຫລື ອິສະລັງ ກໍມີຂ່າວທີ່ໜ້າຊື່ນຊົມກ່ຽວກັບການປະຕິບັດສິດສະເໝີພາບ ແລະ ຄວາມຍຸຕິທຳລະຫວ່າງຍິງ-ຊາຍ ນັ້ນກໍຄືການປະຕິບັດກົດໝາຍທີ່ກຳນົດເປັນເດືອນເທົ່າທຽມກັນລະຫວ່າງຍິງ-ຊາຍ ເຊິ່ງເລີ່ມມີຜົນສັກສິດ ນັບແຕ່ວັນທີ 1 ມັງກອນ ປີ 2018 ເປັນຕົ້ນມາ.
ກົດໝາຍໄດ້ລະບຸລະອຽດວ່າ: ບໍລິສັດ ຫລື ໜ່ວຍງານລັດທີ່ມີພະນັກງານໃນສັງກັດຈຳນວນ 25 ຄົນຂຶ້ນໄປຕ້ອງມີໃບຮັບຮອງຈາກລັດຖະບານວ່າໄດ້ຈ່າຍຄ່າແຮງງານ-ເງິນເດືອນຢ່າງສະເໝີພາບກັນລະຫວ່າງຍິງ-ຊາຍ ບໍ່ດັ່ງນັ້ນຈະຖືກລົງໂທດປັບໄໝ. ກົດໝາຍສະບັບນີ້ມີເປົ້າໝາຍກຳຈັດຊ່ອງຫວ່າງການຈ່າຍເງິນເດືອນລະຫວ່າງເພດໃຫ້ໝົດໄປຢ່າງສິ້ນເຊີງພາຍໃນປີ 2020 ນີ້ເອງ.
