WHO ຊີ້ການຫ້າມເດີນທາງເພື່ອລ່ຽງໄວຣັສ ອາດເຮັດໃຫ້ເສດຖະກິດເສຍຫາຍ
“WHO” ຊີ້ການຫ້າມເດີນທາງເພື່ອຫລີກລ່ຽງໄວຣັສອາດເຮັດໃຫ້ເສດຖະກິດເສຍຫາຍ, ຂະນະທີ່ຜູ້ອຳນວຍການ WHO ຍອມຮັບການແຜ່ລະບາດຂອງໄວຣັສໂຄໂຣນາສາຍພັນໃໝ່ຢູ່ໃນລະດັບທີ່ຄວບຄຸມໄດ້ນ້ອຍລົງເລື້ອຍໆ.
ອົງການອະນາໄມໂລກ (WHO) ເປີດເຜີຍວ່າ: ການຫ້າມນັກທ່ອງທ່ຽວຈາກປະເທດທີ່ຜະເຊີນກັບການແຜ່ລະບາດຂອງໄວຣັສໂຄໂຣນາສາຍພັນໃໝ່ (ໂຄວິດ-19) ເຂົ້າປະເທດເປັນເລື່ອງບໍ່ເໝາະສົມ ແລະ ອາດເຮັດໃຫ້ເສດຖະກິດໄດ້ຮັບຄວາມເສຍຫາຍ. ນອກຈາກນີ້ WHO ຍັງບໍ່ແນະນຳໃຫ້ຈຳກັດການຄ້າກັບປະເທດເຫລົ່ານັ້ນ.
WHO ເປີດເຜີຍວ່າ: ນັບແຕ່ເລີ່ມເກີດການແຜ່ລະບາດຂອງພະຍາດໂຄວິດ-19 ມີກວ່າ 38 ປະເທດທີ່ຈຳກັດການເດີນທາງໄປຈີນ ລວມທັງປະເທດອື່ນທີ່ມີລາຍງານການແຜ່ລະບາດຂອງພະຍາດນີ້ ແລະ ມີມາດຕະການກັກຕົວຜູ້ໂດຍສານທີ່ເດີນທາງກັບຈາກປະເທດເຫລົ່ານັ້ນ, ແຕ່ປະເທດທີ່ອອກມາດຕະການດັ່ງກ່າວກໍມີລາຍງານການພົບຜູ້ປ່ວຍພະຍາດໂຄວິດ-19 ເຊັ່ນກັນ.
ທ່ານ ທີໂດຣ ອັດຮານອມ ກີບຣີເຍຊຸສ ຜູ້ອຳນວຍການໃຫຍ່ຂອງ WHO ຮຽກຮ້ອງວ່າ: ຕະຫລາດການເງິນທົ່ວໂລກບໍ່ຄວນແຕກຕື່ນໃນບັນຫາການແຜ່ລະບາດຂອງພະຍາດໂຄວິດ-19 ຫລັງຈາກນັກລົງທຶນມີຄວາມກັງວົນກ່ຽວກັບຜົນກະທົບທາງເສດຖະກິດ ຈົນເຮັດໃຫ້ຕະຫລາດຫຸ້ນ ແລະ ຕະຫລາດເງິນທົ່ວໂລກຫລຸດລົງຢ່າງໜັກ.
ຜູ້ອຳນວຍການໃຫຍ່ຂອງ WHO ເປີດເຜີຍວ່າ: ນັກລົງທຶນທົ່ວໂລກບໍ່ຄວນແຕກຕື່ນ ແລະ ຢ້ານກົວຫລາຍເກີນໄປ ເພາະບໍ່ແມ່ນເລື່ອງດີ ໂດຍຄວນເບິ່ງຂໍ້ມູນຕົວເລກ ແລະ ຄວາມເປັນຈິງເປັນຫລັກ.
ເຖິງຢ່າງໃດກໍດີ, ຜູ້ອຳນວຍການໃຫຍ່ຂອງ WHO ຍອມຮັບວ່າ: ໂອກາດທີ່ການແຜ່ລະບາດດັ່ງກ່າວຈະຢູ່ໃນລະດັບທີ່ຄວບຄຸມໄດ້ນ້ອຍລົງເລື້ອຍໆ, ແຕ່ຍັງມີຄວາມເປັນໄປໄດ້ຢູ່ ແລະ ທົ່ວໂລກຄວນກຽມຮັບມືກັບກໍລະນີຮຸນແຮງທີ່ສຸດ.
