9 ຄຸນລັກສະນະຂອງຄົນໜ້າເຊື່ອຖື ທີ່ທ່ານສາມາດເອົາໄປເປັນແບບຢ່າງໄດ້
ຄວາມໄວ້ວາງໃຈເປັນສິ່ງທີ່ມີຄ່າຫລາຍ ເພາະມັນສົ່ງຜົນຕໍ່ເກືອບທຸກເລື່ອງ ແລະ ການໄດ້ຮັບຄວາມເຊື່ອຖືຈາກຄົນອື່ນ ກໍເປັນໜຶ່ງສິ່ງທີ່ສາມາດຊ່ວຍຊຸກຍູ້ທ່ານໄປສູ່ຄວາມສຳເລັດໃນຊີວິດໄດ້.
“ຄວາມໄວ້ໃຈປຽບດັ່ງກາວໃຈທີ່ຜະສານລະຫ່ວາງຜູ້ຄົນ ໃຫ້ສື່ສານກັນຢ່າງມີປະສິດທິຜົນ ແລະ ຍັງເປັນຮາກຖານສຳຄັນທີ່ຮັດແໜ້ນຄວາມສຳພັນໄວ້ຢ່າງໝັ້ນໜຽວ”– ສະຕີເຟນ ໂຄເວ.
ທ່ານນາງ ຊິນເທຍ ເບຊິນ (Cynthia Bazin) ຜູ້ໃຫ້ຄຳປຶກສາ ແລະ ນັກເວົ້າສ້າງແຮງບັນດານໃຈ, ເຈົ້າຂອງບໍລິສັດSmartChicກ່າວວ່າ : ກ່ອນທີ່ນາງຈະກໍ່ຕັ້ງບໍລິສັດນີ້ ນາງໄດ້ເຮັດວຽກເປັນທີ່ປຶກສາດ້ານທຸລະກິດໃຫ້ແກ່ບໍລິສັດແຫ່ງໜຶ່ງເປັນເວລາ 20 ປີ ແລະ ສິ່ງທີ່ນາງໄດ້ຮຽນຮູ້ກໍຄື ຄວາມໄວ້ໃຈບໍ່ສາມາດສ້າງຂຶ້ນໄດ້ໃນໄລຍະເວລາອັນສັ້ນ, ແຕ່ຕ້ອງອາໄສເວລາໃນການພິສູດ, ສະແດງໃຫ້ເຫັນເຖິງຄວາມຊື່ສັດ, ຈິງໃຈຢ່າງສະໝໍ່າສະເໝີຜ່ານການກະທຳ ແລະ ໂຕຕົນຂອງທ່ານເອງ. ຫາກທ່ານຢາກຈະໄດ້ຮັບຄວາມໄວ້ວາງໃຈຈາກຜູ້ອື່ນ ລອງເລີ່ມຈາກການສຳຫລວດການກະທຳ ແລະ ການຕັດສິນໃຈຂອງຕົນເອງໃນແຕ່ລະມື້ເບິ່ງ ແລະ ໃຊ້ຄຸນລັກສະນະ 9 ຂໍ້ຕໍ່ໄປນີ້ເປັນຫລັກເກນວັດແທກ ແລ້ວທ່ານຈະຮູ້ວ່າຕົນເອງເປັນຄົນທີ່ໜ້າເຊື່ອຖືຫລາຍປານໃດ.
1.ມີຄວາມຈິງໃຈ : ໂດຍປົກກະຕິແລ້ວ ຄົນທົ່ວໄປມັກຢາກຈະໃຊ້ເວລາຮ່ວມກັບ “ຄົນທີ່ມີຄວາມຈິງໃຈ” ແລະ ມີຈິດໃຈສູງສົ່ງ ເພາະຄົນເຫລົ່ານີ້ຈະບໍ່ພະຍາຍາມເຮັດໂຕ ຫລື ເບິ່ງວ່າຕົນເອງເໜືອກ່ວາຄົນອື່ນ, ພວກເຂົາເປັນຄົນໜ້າຄົບຫາ, ອ່ອນນ້ອມຖ່ອມຕົນ ແລະ ເປັນມິດກັບຜູ້ຄົນອ້ອມຂ້າງ.
2.ທຸ່ນທ່ຽງ : ແນ່ນອນຢູ່ແລ້ວວ່າທຸກຄົນຍ່ອມມີມື້ທີ່ບໍ່ດີ, ແຕ່ຄົນສ່ວນຫລາຍກໍຍ່ອມຕ້ອງການພຶດຕິກຳທີ່ດີຢ່າງທຸ່ນທ່ຽງຈາກຄົນທີ່ພວກເຂົາໄວ້ວາງໃຈສະເໝີ ເພາະການກະທຳທີ່ຈິງໃຈ ແລະ ການຕັດສິນໃຈທີ່ສ້າງຄວາມຈະແຈ້ງຍ່ອມໂດດເດັ່ນໃນສາຍຕາຂອງຄົນອື່ນ.
“ຄວາມສຳເລັດບໍ່ໄດ້ວັດແທກກັນຢູ່ບ່ອນຄວາມຍິ່ງໃຫຍ່, ແຕ່ເປັນຄວາມທຸ່ນທ່ຽງ ເມື່ອໃດທີ່ທ່ານທຸ້ມເທເພື່ອຄວາມສຳເລັດຢ່າງບໍ່ລົດລະ ເມື່ອນັ້ນຄວາມຍິ່ງໃຫຍ່ກໍຈະຕາມມາເອງ”– ດະເວ ຈອນສັນ.
3. ມີສິນທຳ : ໃຜໆກໍຢາກເຫັນ ຫລື ໃຫ້ຄ່າກັບຄົນອ້ອມໂຕທີ່ລຸກຂຶ້ນຢືນຢັດເພື່ອຄວາມຖືກຕ້ອງ ແມ່ນແຕ່ໃນເວລາທີ່ບໍ່ມີໃຜເຫັນກໍຕາມ.
4. ເຂົ້າອົກເຂົ້າໃຈຄົນອື່ນ : ຄົນທີ່ໜ້າໄວ້ວາງໃຈຈະນຶກເຖິງ ແລະ ເປັນຫ່ວງເປັນໄຍຄວາມຮູ້ສຶກຂອງຜູ້ອື່ນສະເໝີ ເຊິ່ງຊ່ວຍເຮັດໃຫ້ຜູ້ອື່ນໄດ້ຮັບຮູ້ເຖິງຄວາມເອົາໃຈໃສ່ ແລະ ຕອບແທນຄວາມເຊື່ອໃຈໃຫ້ແກ່ທ່ານໄດ້.
5. ເອື້ອເຟື້ອເຜື່ອແຜ່ : ຄວາມໄວ້ວາງໃຈເກີດຂຶ້ນໄດ້ ເມື່ອໄດ້ຮັບຄວາມຊ່ວຍເຫລືອໃນຍາມທີ່ຈຳເປັນ ຫລື ຍາມທຸກຍາກ ບໍ່ແມ່ນແຕ່ການໃຊ້ເວລາຮ່ວມກັນໃນຍາມມີສຸກເທົ່ານັ້ນ.
“ຫົນທາງທີ່ດີທີ່ສຸດໃນການພິສູດຄວາມໜ້າເຊື່ອຖືຂອງໃຜຈັກຄົນໜຶ່ງ ແມ່ນການໃຫ້ຄວາມເຊື່ອໃຈກັບຄົນຜູ້ນັ້ນກ່ອນ” – ເອີເນສ ເຮມິງເວ.
6. ເປັນຄົນສະຫລາດ ມັກສ້າງຄວາມປະທັບໃຈ : ຄົນທີ່ໄວ້ວາງໃຈໄດ້ມັກພ້ອມຈະເປີດໃຈຍອມຮັບສິ່ງໃໝ່ໆ, ຮຽນຮູ້ ແລະ ເຕີບໃຫຍ່ຢູ່ຕະຫລອດເວລາ, ພວກເຂົາມັກເບິ່ງເຫັນຫົນທາງໃນການພັດທະນາຕົນເອງສະເໝີ ແລະ ດ້ວຍເຫດຜົນນີ້ເອງ ພວກເຂົາຈຶ່ງຮູ້ວິທີສ້າງແຮງບັນດານໃຈ, ຄວາມປະທັບໃຈ ແລະ ຊ່ວຍເຫລືອຜູ້ອື່ນຢູ່ສະເໝີ ທັງຍັງພ້ອມທີ່
ຈະແບ່ງປັນຄວາມຮູ້ທີ່ຕົນເອງມີໃຫ້ຜູ້ອື່ນນຳ.
7. ມັກສະໜັບສະໜູນ ແລະ ສ້າງສຳພັນທີ່ດີຕໍ່ຜູູ້ອື່ນ : ຄົນທີ່ມີຄວາມໜ້າໄວ້ວາງໃຈມັກຫາທາງສະໜັນສະໜູນຄົນທີ່ມີຫຍັງຄືໆກັນ ແລະ ຈະເຊື່ອມສຳພັນກັບຄົນທີ່ມີຄວາມຮູ້ຄວາມສາມາດ ເພື່ອທີ່ຈະຊ່ວຍໃຫ້ພວກເຂົາບັນລຸເປົ້າໝາຍຂອງຕົນໄດ້ສຳເລັດ.
“ຄວາມສຳພັນທີ່ດີມັກຈະເກີດຈາກຄວາມໄວ້ວາງໃຈ ແລະ ຄວາມເຄົາລົບທັງສອງຝ່າຍ”– ໂມນ່າ ຊັດເຟ່ນ.
8. ຮູ້ຈັກຖ່ອມໂຕ : ຄົນທີ່ໄວ້ໃຈໄດ້ຈະບໍ່ເອົາໂຕເອງເປັນຫລັກໃນການເຮັດວຽກ ເພາະພວກເຂົາຮູ້ວ່າການເຮັດວຽກເປັນທີມຍ່ອມສົ່ງຜົນດີກ່ວາການເຮັດວຽກພຽງຄົນດຽວ ແລະ ການສ້າງການຍອມຮັບນັບຖືຈະເປັນເລື່ອງຍາກ ຫາກວ່າເຮົາມັກເອົາຄວາມຄິດຂອງເຮົາເອງເປັນໃຫຍ່.
9. ພ້ອມທີ່ຈະຍື່ນມືຊ່ວຍເຫລືອ : ພວກເຂົາພ້ອມທີ່ຈະຢູ່ຄຽງຂ້າງ, ສະໜັບສະໜູນຜູ້ອື່ນ ແລະ ເສຍສະຫລະເພື່ອຜູ້ອື່ນໄດ້ສະເໝີ.
