ຍີ່ປຸ່ນສັ່ງປິດໂຮງຮຽນ ເພື່ອປ້ອງກັນໂຄວິດ-19
ນາຍົກລັດຖະມົນຕີ ຍີ່ປຸ່ນ Shinzo Abe ຮຽກຮ້ອງໃຫ້ໂຮງຮຽນຊັ້ນປະຖົມ ແລະ ຊັ້ນມັດທະຍົມທຸກແຫ່ງຢຸດຕິການຮຽນ-ການສອນນັບຕັ້ງແຕ່ວັນທີ 2/3 ເປັນຕົ້ນໄປຈົນໝົດໄລຍະພັກຮຽນລະດູບານໃໝ່ໃນເດືອນເມສາທີ່ຈະມາເຖິງ.
ຖະແຫຼງຂ່າວຕໍ່ນັກຂ່າວເມື່ອວັນທີ 27/2, ນາຍົກລັດຖະມົນຕີ Shinzo Abe ໄດ້ຮຽກຮ້ອງໃຫ້ບັນດາກະຊວງ “ກະກຽມຄວາມພ້ອມຮັບມື ແລະ ຫາວິທີການປ້ອງກັນທີ່ຈຳເປັນ ເພື່ອສະກັດກັ້ນບໍ່ໃຫ້ພະຍາດ ໂຄວິດ-19 ແຜ່ລະບາດອອກໄປຕື່ມອີກ ອັນຈະເປັນການສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ເສດຖະກິດຂອງຊາດ”.
ການຕັດສິນໃຈໃຫ້ນັກຮຽນພັກຮຽນເປັນເວລາໜຶ່ງເດືອນ ມີຂຶ້ນພາຍຫຼັງສະພາການສຶກສາ ໄດ້ຮຽກຮ້ອງໃຫ້ລັດຖະບານປິດການຮຽນຂອງໂຮງຮຽນຊັ້ນປະຖົມ ແລະ ຊັ້ນມັດທະຍົມຈຳນວນ 1.600 ແຫ່ງໃນທົ່ວປະເທດ ເພື່ອຫຼີກລ່ຽງການຕິດເຊື້ອພະຍາດ ໂຄວິດ-19.
ທ່ານ Naomichi Suzuki ເຈົ້າແຂວງ Hokkaido ກ່າວວ່າ: “ພວກເຮົາຈະພະຍາຍາມສຸດຄວາມສາມາດ ເພື່ອສະກັດກັ້ນການແຜ່ລະບາດຂອງພະຍາດ ແລະ ຈະຮັບປະກັນໃຫ້ມີຄວາມປອດໄພ ໃຫ້ແກ່ສຸຂະພາບຂອງປະຊາຊົນ”. ປັດຈຸບັນແຂວງ Hokkaido ເປັນແຂວງທີ່ມີຜູ້ຕິເຊື້ອໄວຣັດໂຄໂຣນາ ຫຼາຍທີ່ສຸດໃນປະເທດ, ມີຜູ້ປ່ວຍ 35 ລາຍ, ຊຶ່ງໃນນັ້ນລວມມີທັງນັກຮຽນ, ຄູອາຈານ ແລະ ໂຊເຟີລົດຂັບລົດຮັບສົ່ງນັກຮຽນ.
ກ່ອນໜ້ານີ້ ກໍໄດ້ມີຫຼາຍໂຮງຮຽນໃນ ຍີ່ປຸ່ນ ປິດການຮຽນໄປກ່ອນແລ້ວ. ສຳລັບຢູ່ ໂຕກຽວ ລະບົບໂຮງຮຽນ Ochanomizu ບ່ອນທີ່ເຈົ້າຊາຍນ້ອຍ Hisahitoອາຍຸ 13 ປີ, ຫຼານຊາຍຂອງ ພະລາຊາ Naruhito ທີ່ກຳລັງສຶກສາຮໍ່າຮຽນຢູ່ນັ້ນ ກໍຈະປິດການການຮຽນລົງ, ພ້ອມດຽວກັນນັ້ນທ່ານຍັງໃຫ້ຮູ້ຕື່ອີກວ່າ ໂຮງຮຽນອະນູບານ, ໂຮງຮຽນປະຖົມ, ມັດທະຍົມຕົ້ນ ແລະ ມັດທະຍົມປາຍ ຈະປິດລົງໃນວັນທີ່ 28/2 ນີ້ ຈົນເຖິງຕົ້ນເດືອນເມສາ ພາຍຫຼັງພັກຮຽນລະດູບານໃໝ່.
ມາເຖິງວັນທີ 27/2 ນີ້, ຍີ່ປຸ່ນມີຜູ້ຕິດເຊື້ອທັງໝົດ 877 ຄົນ, ໃນນັ້ນ ມີ 7 ຄົນເສຍຊີວິດ ແລະ ມີຫຼາຍກວ່າ 700 ແມ່ນຜູ້ຕິດເຊື້ອມາຈາກກຳປັ່ນ Diamon Princess.
ສົກຮຽນໃໝ່ຂອງຍີ່ປຸ່ນ ຈະເລີ່ມໄຂຂຶ້ນໃນຕົ້ນເດືອນເມສາ ພາຍຫຼັງພັກລະດູບານໃໝ່ແລ້ວ ແລະ ຈະສິ້ນສຸດໃນເດືອນມີນາປີໜ້າ. ນັກຮຽນຍີ່ປຸ່ນ ມີເວລາພັກຮຽນ 3 ໄລຍະ: ໄລຍະທີ 1 ແມ່ນໄລຍະພັກແລ້ງ ເວລາ 40 ວັນ(5-6 ອາທິດ), ຕາມທຳມະດາແລ້ວແມ່ນເລີ່ມແຕ່ວັນທີ 20ເດືອນ ກໍລະກົດເປັນຕົ້ນໄປຈົນເຖິງວັນທີ 31 ເດືອນສິງຫາ, ພັກລະດູໜາວ( 10 ວັນ, ນັບແຕ່ວັນທີ 26/12 ຫາວັນທີ 6/1 ແລະ ພັກລະດຸດອກໄມ້ບານ10 ວັນ ແຕ່ວັນທີ 25/3ຫາວັນທີ 5/4.
