ປີໜຶ່ງມີຜູ້ເສຍຊີວິດຫລາຍກວ່າ 10 ຄົນຍ້ອນລະເບີດບໍ່ທັນແຕກຕົກຄ້າງຢູ່ລາວ
ກະຊວງແຮງງານ ແລະ ສະຫວັດດີການສັງຄົມ ແຈ້ງໃຫ້ຮູ້ວ່າ: ທົ່ວປະ ເທດມີເນື້ອທີ່ລະເບີດບໍ່ທັນແຕກຕົກຄ້າງມາແຕ່ສະໄໝສົງຄາມທັງໝົດ 87.000 ກິໂລຕາເເມັດ ຫຼື ຫຼາຍກວ່າ 8 ລ້ານເຮັກຕາ, ໃນນີ້ສາມາດຢືນຢັນພື້ນທີ່ມີລະ ເບີດສະເພາະລູກຫວ່ານ 1 ແສນກວ່າເຮັກຕາ ແລະ ສາມາດເກັບກູ້ໄດ້ແລ້ວ 60.190 ເຮັກຕາ, ແຕ່ກໍຍັງມີອຸປະຕິເຫດທີ່ເກີດຈາກລະເບີດດັ່ງກ່າວຢູ່ທຸກໆປີ ຊຶ່ງໄລຍະພຽງ 24 ປີ ນັບແຕ່ປີ 1996 ຫາ 2020 ມີຜູ້ໄດ້ຮັບບາດເຈັບຈາກລະເບີດບໍ່ທັນແຕກໃນທົ່ວປະເທດທັງໝົດ 962 ຄົນ ແລະ ເສຍຊີວິດເຖິງ 251 ຄົນ, ໂດຍສະເລ່ຍແລ້ວປີໜຶ່ງມີຫລາຍກວ່າ 10 ຄົນ.
ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະ ຫວັດດີການສັງຄົມ ໄດ້ກ່າວຢູ່ກອງປະຊຸມຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ປະຈໍາປີ 2019 ທີ່ໄດ້ຈັດຂຶ້ນໃນວັນທີ 25 ກຸມພານີ້, ທີ່ນະຄອນຫຼວງວຽງຈັນ ໂດຍມີເນື້ອໃນບາງຕອນສໍາຄັນວ່າ: ການກະກຽມປະເມີນຜົນ ແລະ ປັບປຸງແຜນຍຸດທະສາດແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ແມ່ນສອດຄ່ອງກັບຄາດໝາຍສູ້ຊົນ ແລະ ເປົ້າໝາຍພັດທະນາແບບຍືນຍົງ ປີ 2030 ໂດຍສະເພາະເປົ້າໝາຍທີ 18 ໃນຂົງເຂດແກ້ໄຂລະເບີດບໍ່ທັນແຕກ ເຊິ່ງເປັນເປົ້າໝາຍທີ່ພົວພັນໂດຍກົງ ແລະ ປິ່ນອ້ອມກັບບັນດາ 17 ເປົ້າໝາຍຕາມຄໍາເວົ້າທີ່ວ່າ: ບໍ່ປະຖິ້ມຜູ້ໃດໄວ້ຢູ່ເບື້ອງຫຼັງ.
ທ່ານລັດຖະມົນຕີ ໄດ້ກ່າວວ່າ: ນັບແຕ່ລັດຖະບານລາວໄດ້ສ້າງຕັ້ງຂະແໜງການແກ້ໄຂບັນຫາລະເບີດບໍ່ທັນແຕກໃນປີ 1996, ວຽກງານດັ່ງກ່າວໄດ້ມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ອັນສໍາຄັນທີ່ສຸດໄດ້ເອົາໃຈໃສ່ຄວາມປອດໄພຂອງປະຊາຊົນຢູ່ແຕ່ລະທ້ອງຖິ່ນຈາກທີ່ພວກເຂົາໄດ້ນໍາໃຊ້ດິນທໍາການຜະລິດ.
