ເຫດກໍ່ການຮ້າຍລອນດອນ ເຮັດໃຫ້ມີຜູ້ເສຍຊີວິດ 6 ຄົນ
ຕຳຫລວດນະຄອນບານນະຄອນຫລວງລອນດອນເປີດເຜີຍວ່າ: ມີຜູ້ເສຍຊີວິດ 6 ຄົນ ແລະ ມີອີກຢ່າງໜ້ອຍ 30 ຄົນຖືກນຳສົ່ງໂຮງໝໍ 6 ແຫ່ງ ຈາກເຫດການກໍ່ການຮ້າຍຢູ່ຂົວລອນດອນບຣິດ ແລະ ໂບໂຣມາຣເກັດ ໃນນະຄອນຫລວງລອນດອນ, ສ່ວນຜູ້ບາດເຈັບເລັກໜ້ອຍໄດ້ຮັບການປິ່ນປົວໃນຈຸດເກີດເຫດ.
+ ເກີດເຫດລະເບີດຢູ່ແມນເຊສເຕີຂອງອັງກິດ ມີຜູ້ເສຍຊີວິດ 19 ຄົນ, ບາດເຈັບ 50 ຄົນ
+ ຕຳຫລວດອັງກິດເຜີຍແຜ່ພາບມືລະເບີດແມນເຊສເຕີ
+ ຕຳຫລວດເຜີຍຂໍ້ມູນທີ່ຮົ່ວໄຫລສົ່ງຜົນເສຍຫາຍຕໍ່ຄະດີລະເບີດແມນເຊສເຕີ
ຫລ້າສຸດໜ່ວຍຕຳຫລວດນ້ຳ ທີ່ຂຶ້ນກັບສຳນັກງານຕຳຫລວດນະຄອນບານນະຄອນຫລວງລອນດອນ ເຜີຍແຜ່ຂໍ້ຄວາມວ່າ: ໄດ້ຍົກເລີກຄຳສັ່ງປິດການສັນຈອນທາງນ້ຳໃນແມ່ນ້ຳເທມແລ້ວ ແລະ ມີການເຜີຍພາບລົດຕູ້ສີຂາວຢູ່ໃນສະພາບຕຳກັບຂົວ ໂດຍເຊື່ອວ່າລົດຄັນນີ້ໃຊ້ໃນການກໍ່ເຫດຕຳຄົນຍ່າງຢູ່ຂົວລອນດອນບຣິດ.
ເຖິງຢ່າງໃດກໍຕາມ, ສຳນັກງານຕຳຫລວດຈະລາຈອນກາງຍັງສັ່ງປິດຂົວລອນດອນບຣິດຕໍ່ໄປຈົນຮອດຕອນເຊົ້າຂອງມື້ຕໍ່ມາຕາມເວລາທ້ອງຖິ່ນ. ເຊັ່ນດຽວກັບສະຖານີລົດໄຟໃຕ້ດິນລອນດອນບຣິດ ແລະ ສາຍເຊື່ອມຕໍ່ກັບສະຖານີນີ້. ຂະນະທີ່ລົດໄຟປົກກະຕິຄາດວ່າຈະເປີດໃຫ້ບໍລິການໃນມໍ່ໆນີ້.
ເຫດກໍ່ການຮ້າຍຢູ່ນະຄອນຫລວງລອນດອນເທື່ອນີ້ເກີດຂຶ້ນເມື່ອເວລາປະມານ 22:08 ໂມງ ຕາມເວລາທ້ອງຖິ່ນ (ຫລື 04:08 ໂມງ ຕາມເວລາປະເທດລາວ) ໂດຍນັກຂ່າວ BBC ເຊິ່ງຢູ່ໃນຈຸດເກີດເຫດລາຍງານວ່າ: ເຫັນລົດຕູ້ສີຂາວແລ່ນຕຳຄົນຍ່າງຢູ່ຂົວລອນດອນບຣິດ 5-6 ຄົນ ໂດຍໃນຈຳນວນນີ້ມີຢ່າງໜ້ອຍ 4 ຄົນໄດ້ຮັບບາດເຈັບສາຫັດ.
ເຈົ້າໜ້າທີ່ຕຳຫລວດໄດ້ບອກກັບຄົນທີ່ສັນຈອນໄປມາໃນບໍລິເວນດັ່ງກ່າວໃຫ້ແລ່ນໜີໄວທີ່ສຸດເທົ່າທີ່ຈະໄວໄດ້.
ຜູ້ຢູ່ໃນເຫດການເລົ່າວ່າ: ໄດ້ຍິນສຽງປືນດັງຕາມມາ ແລະ ເຫັນຜູ້ກໍ່ເຫດລົງຈາກລົດຕູ້ ພ້ອມຖືມີດໄລ່ແທງຄົນຢູ່ຖະໜົນ ລວມທັງບໍລິເວນຕະຫລາດໂບໂຣມາເກັດ ເຊິ່ງຢູ່ໃກ້ຄຽງກັນ.
ກ່ອນໜ້ານີ້, ເຈົ້າໜ້າທີ່ຕຳຫລວດນະຄອນບານອັງກິດໄດ້ເຜີຍແຜ່ຂໍ້ຄວາມທາງທະວິດເຕີລະບຸວ່າ: ເຫດການທີ່ເກີດຂຶ້ນນີ້ມີ 3 ເຫດການ ຄືເຫດເກີດຢູ່ບໍລິເວນຂົວລອນດອນບຣິດ, ຕະຫລາດໂບໂຣມາເກັດ ແລະ ເຂດວອກຮໍ, ແຕ່ຫລ້າສຸດໄດ້ຢືນຢັນວ່າເຫດການທີ່ເກີດຂຶ້ນບໍລິເວນຂົວລອນດອນບຣິດ ແລະ ໂບໂຣມາເກັດ ເປັນເຫດກໍ່ການຮ້າຍ, ສ່ວນເຫດທີ່ເກີດຢູ່ເຂດວອດຮໍບໍ່ກ່ຽວຂ້ອງກັນ.
ນາຍົກລັດຖະມົນຕີ ເທເຣຊາ ເມ ແຫ່ງສະຫະຣາຊະອານາຈັກ ລະບຸໃນຖະແຫລງການຕອນໜຶ່ງວ່າ: ນີ້ເປັນເຫດການທີ່ໜ້າສະເທືອນຂວັນ.
ສ່ວນທ່ານ ຊາດິດ ຂ່ານ ເຈົ້າຄອງນະຄອນຫລວງລອນດອນ ປະນາມເຫດກໍ່ການຮ້າຍວ່າເປັນການກະທຳທີ່ປ່າເປື່ອນ ແລະ ກຳລັງປະສານງານຢ່າງໃກ້ຊິດກັບຜູ້ບັນຊາການຕຳຫລວດນະຄອນບານນະຄອນຫລວງລອນດອນ ເພື່ອຮັບມືກັບສະຖານະການທີ່ເກີດຂຶ້ນ ແລະ ຂໍໃຫ້ປະຊາຊົນຫລີກເວັ້ນການເດີນທາງໃນບໍລິເວນເກີດເຫດ.
