ໄທພົບຜູ້ປ່ວຍໂຄວິດ-19 ເພີ່ມອີກ 3 ຄົນຫລັງກັບຈາກຍີ່ປຸ່ນ
ກະຊວງສາທາລະນະສຸກຢືນຢັນ ໄທພົບຜູ້ປ່ວຍໂຄວິດ-19 ລາຍໃໝ່ເພີ່ມອີກ 3 ຄົນ ຄອບຄົວດຽວກັນ ໂດຍ 2 ຄົນກັບຈາກປະເທດສ່ຽງ.
ເມື່ອເວລາ 11:30 ໂມງ ວັນທີ 26 ກຸມພານີ້,
ທ່ານ ສຸຂຸມ ການຈະນາພິມາຍ ຫົວໜ້າຫ້ອງການກະຊວງສາທາລະນະສຸກ ຖະແຫລງສະຖານະການໂຣກຕິດເຊື້ອໄວຣັສໂຄໂຣນາ
2019 ຫລື ໂຄວິດ-19 (COVID-19) ວ່າ: ປະເທດໄທພົບຜູ້ປ່ວຍຢືນຢັນຕິດເຊື້ອໂຄວິດ-19
ເພີ່ມອີກ 3 ຄົນ ທັງໝົດເປັນຄົນໃນຄອບຄົວດຽວກັນ ໂດຍຜູ້ທຳອິດເປັນຊາຍໄທອາຍຸ
65 ປີ ມີປະຫວັດເດີນທາງກັບຈາກຮອກໄກໂດ ປະເທດຍີ່ປຸ່ນ ກັບມາ 3 ວັນແລ້ວມີອາການໄຂ້
ເຂົ້າຮັບການປິ່ນປົວຢູ່ໂຮງໝໍເອກະຊົນແຫ່ງໜຶ່ງ ໃນວັນທີ 23 ກຸມພານີ້ ປັດຈຸບັນມີອາການປອດອັກເສບ.
ຄົນທີ 2 ເປັນພັນລະຍາ ໄປທ່ຽວນຳກັນ ແລະ ມີອາການໄຂ້ ແລະ ໄອ ແລະ ຄົນທີ 3
ເປັນຫລານ ອາຍຸ 8 ປີ ບໍ່ໄດ້ໄປຕ່າງປະເທດນຳ ແຕ່ໃກ້ຊິດຜູ້ປ່ວຍ 2 ຄົນ ມີອາການນ້ອຍ.
ທ່ານໝໍ ສຸຂຸມ ກ່າວວ່າ: ທັງນີ້ໄດ້ມີການຕິດຕາມຜູ້ສຳຜັດໃກ້ຊິດທັງໝົດແລ້ວ 100% ລວມທັງ ຜູ້ຮ່ວມເດີນທາງນຳ ແລະ ຜູ້ຮ່ວມຖ້ຽວບິນ ແລະ ກໍລະນີນີ້ບໍ່ແມ່ນ super spreader ເພາະປ່ວຍແລ້ວເຂົ້າໂຮງໝໍ ແລະ ປັດຈຸບັນປະເທດໄທຍັງຢູ່ໄລຍະ 2 ຍັງບໍ່ເຂົ້າໄລຍະ 3.
ນອກຈາກນີ້ ມີຜູ້ປ່ວຍທີ່ປິ່ນປົວດີແລ້ວ ແພດອະນຸຍາດໃຫ້ກັບເຮືອນໄດ້ອີກ 2 ຄົນ ເປັນຍິງໄທອາຍຸ 35 ປີ ແລະ ຊາຍຈີນ ອາຍຸ 52 ປີ. ປັດຈຸບັນ ປະເທດໄທມີຜູ້ປ່ວຍ 40 ຄົນ, ປິ່ນປົວດີກັບເຮືອນແລ້ວ 24 ຄົນ, ຍັງປິ່ນປົວຢູ່ໂຮງໝໍ 16 ຄົນ.
