ບານເຕະສາຍ ກ ໄດ້ປ່ຽນໂລໂກ້ ແລະ ຊື່ ໃໝ່ມາເປັນ ຄອມມານໂດ ລາວລີກ 2 ພ້ອມເປີດຮັບສະໝັັກທີມເຂົ້າຮ່ວມ

ອີງຕາມການລາຍງານຂອງສະຫະພັນບານເຕະແຫ່ງຊາດລາວ (ສຕລ) ໄດ້ໃຫ້ຮູ້ວ່າ: ມີຄວາມຍິນດີແຈ້ງມາຍັງບັນດາສະໂມສອນບານເຕະຕ່າງໆທີ່ເຂົ້າຮ່ວມການແຂ່ງຂັນບານເຕະ ສາຍກໍ ປະຈໍາປີ 2020 ແລະ ບັນດາສະໂມສອນບານເຕະໃນບັນດາແຂວງ, ນະຄອນຫຼວງຮັບຊາບຮ່ວມນຳກັນວ່າ, ເພື່ອເປັນການພັດທະນາກີລາບານເຕະໃຫ້ມີການເຄື່ອນໄຫວຢ່າງເປັນປົກກະຕິ ແລະ ຕໍ່ເນື່ອງພ້ອມທັງປະຕິບັດຕາມແຜນການຈັດແຂ່ງຂັນປະຈຳປີ 2020 ໃຫ້ບັນລຸເປົ້າໝາຍ. ສະຫະພັນບານເຕະແຫ່ງຊາດລາວ ຈະໄດ້ເປີດການແຂ່ງຂັນບານເຕະ ຄອມມານໂດ (ລາວລີກ 2) ໂດຍອີງຕາມລາຍລະອຽດຄື:

– ການແຂ່ງຂັນບານເຕະ ຄອມມານໂດ ສາຍກໍ ຈະປ່ຽນໄປໃຊ້ຊື່ ຄອມມານໂດ ລາວລີກ 2 ໃນລະດູການ 2020 ໂດຍເປີດການແຂ່ງຂັນພາຍໃນວັນທີ 2 ພຶດສະພາ 2020 ເຊີ່ງຈະເປັນການແຂ່ງຂັນໃນຮູບແບບລີກ ແລະ ແຂ່ງຂັນແບບພົບກັນໝົດ 2 ຮອບ ຈໍານວນທີມໃນການແຂ່ງຂັນດັ່ງກ່າວແມ່ນສູງສຸດບໍ່ເກີນ 12 ທີມ.

– ສາມາດພົວພັນເອົາຮ່າງເອກະສານສະໝັກເຂົ້າຮ່ວມການແຂ່ງຂັນນໍາພະແນກຈັດການແຂ່ງຂັນ (ສຕລ) ໄດ້ນັບແຕ່ວັນທີ 20 ກຸມພາ 2020 ເປັນຕົ້ນໄປ ແລະ ຕ້ອງສົ່ງໃບຕອບຕົກລົງເຂົ້າຮ່ວມຊ້າສຸດບໍ່ເກີນວັນທີ 6 ມີນາ 2020 ທີ່ເປັນມື້ສິ້ນສຸດການຮັບສະໝັກ, ສະໂມສອນສາມາດສົ່ງໃບສະໝັກເຂົ້າຮ່ວມການແຂ່ງຂັນໄດ້ທີ່ພະແນກຈັດການແຂ່ງຂັນ (ສຕລ) ໃບແຈ້ງຕອບເຂົ້າຮ່ວມການແຂ່ງຂັນຕ້ອງເຊັນໂດຍປະທານສະໂມສອນ ແລະ ຈ້ຳກາຂອງສະໂມສອນຢ່າງຄົບຖ້ວນກ່ອນສົ່ງໃຫ້ກັບ (ສຕລ).

– ສະໂມສອນສາມາດພົວພັນເອົາກົດລະບຽບການແຂ່ງຂັນ ແລະ ເອກະສານອື່ນໆທີ່ກ່ຽວຂ້ອງກັບການແຂ່ງຂັນໄດ້ນັບແຕ່ວັນທີ 25 ກຸມພານີ້ເປັນຕົ້ນໄປ.

– ສະໂມສອນທີ່ມີຄວາມພ້ອມສາມາດລົງທະບຽນຄະນະນຳ ແລະ ນັກກິລາຂອງທີມ ກັບພະແນກຈັດການແຂ່ງຂັນ (ສຕລ) ເລີ່ມແຕ່ວັນທີ 1 ມີນາ ຫາວັນທີ 24 ເມສານີ້, ໂດຍສະໂມສອນຕ້ອງລົງທະບຽນບຸກຄະລາກອນ ແລະ ນັກກິລາສະໂມສອນເຂົ້າໃນລະບົບ (FIFA Connect) ທີ່ເປັນລະບົບຂອງ (ສຕລ) ໂດຍວິຊາການຂອງພະແນກຈັດການແຂ່ງຂັນຈະເປັນຜູ້ອົບຮົມ ແລະ ຊ່ວຍເຫຼືອໃນການລົງທະບຽນໃຫ້ກັບທຸກໆສະໂມສອນ.

– ສະໂມສອນທີ່ບໍ່ສາມາດສໍາເລັດການລົງທະບຽນຄະນະທີມ ແລະ ນັກກິລາຂອງຕົນເອງສໍາເລັດພາຍໃນກຳນົດເວລາຂ້າງເທິງແມ່ນຖືວ່າສະລະສິດ ແລະ ບໍ່ສາມາດເຂົ້າຮ່ວມການແຂ່ງຂັນໄດ້.

– (ສຕລ) ຂໍສະຫງວນສິດໃນການເລື່ອນ ຫຼື ປ່ຽນແປງມື້ເປີດການແຂ່ງຂັນໃນກໍລະນີມີຄວາມຈໍາເປັນ ແລະ ມີເຫດຜົນທີ່ເໝາະສົມໂດຍບໍ່ຜ່ານການພິຈາລະນາຈາກສະໂມສອນ.

– ລາຍລະອຽດເພີ່ມເຕີມຂອງການກະກຽມເຂົ້າຮ່ວມການແຂ່ງຂັນແມ່ນອີງຕາມກົດລະບຽບການແຂ່ງຂັນ. ສຳລັບການແຂ່ງຂັນໃນປີນີ້ ບໍ່ອະນຸຍາດໃຫ້ສະໂມສອນໃນການແຂ່ງຂັນເປັບຊີ ລາວລີກ 1 ສົ່ງທີມສຳຮອງ ຫຼື ທີມສອງຂອງສະໂມສອນເຂົ້າຮ່ວມການແຂ່ງຂັນບານເຕະ ຄອມມານໂດ ລາວລີກ 2 ລະດູການ 2020 ຕາມລາຍລະອຽດເຊັ່ນ:

– ສະໂມສອນໃນການແຂ່ງຂັນ ເປັບຊີ ລາວລີກ 1 ລະດູການ 2020 ບໍ່ສາມາດສົ່ງທີມສຳຮອງ ຫຼື ທີມສອງ ຂອງສະໂມສອນເຂົ້າຮ່ວມແຂ່ງຂັນ ຄອມມານໂດ ລາວລີກ 2 ລະດູການ 2020. ແຕ່ສາມາດສົ່ງເຂົ້າຮ່ວມການແຂ່ງຂັນເຍົາວະຊົນຊີງຂັນ (ສຕລ) ຮຸ່ນອາຍຸບໍ່ເກີນ 15-18 ປີໄດ້.

– ເພື່ອເປັນການສ້າງໃຫ້ ຄອມມານໂດ ລາວລີກ 2 ມີຄວາມຫຼາກຫຼາຍດ້ານສະໂມສອນ ແລະ ມີການເຂົ້າຮ່ວມຂອງສະໂມສອນໃໝ່ຫຼາຍຂື້ນ ລວມທັງນັກກິລາໜ້າໃໝ່ໃນການແຂ່ງຂັນ

.   – ເພື່ອເປັນການຫຼຸດພາລະດ້ານງົບປະມານຂອງສະໂມສອນໃນການແຂ່ງຂັນ.