ຄວາມສ່ຽງອັນຕະລາຍຈາກການເລືອກເກີບໃສ່ຂັບລົດ

    ເກີບ ເຄີຍສ້າງບັນຫາ ຫລື ເປັນຕົ້ນເຫດຂອງການເກີດອຸປະຕິເຫດຈາກຄວາມຮູ້ເທົ່າບໍ່ເຖິງການມາແລ້ວຢ່າງຫລວງຫລາຍ ບາງຄົນເຖິງຂັ້ນຕ້ອງເສຍຊີວິດ, ສູນເສຍຊັບສິນ, ເປັນສາເຫດຂອງການເກີດອຸປະຕິເຫດຮ້າຍແຮງ. ໃນຫລາຍໆປະເທດໄດ້ມີການລະບຸກ່ຽວກັບການໃຊ້ເກີບໃນການຂັບຂີ່ ເຊັ່ນ : ປະເທດສະວິດເຊີແລນ ໄດ້ອອກກົດໝາຍຫ້າມໃສ່ເກີນສົ້ນສູງຂັບລົດ, ປະເທດຍີ່ປຸ່ນໄດ້ມີຂໍ້ລະບຸໄວ້ໃນກົດໝາຍຈະແຈ້ງວ່າ ຂະນະຂັບລົດຫ້າມໃສ່ເກີບແບບໃດແດ່ ທັງນີ້ ໃນປະເທດລາວເຮົານັ້ນບໍ່ໄດ້ມີກົດໝາຍບັງຄັບທີ່ຈະແຈ້ງ ຈຶ່ງເຮັດໃຫ້ຄົນຂັບລົດຫລາຍຄົນຍັງຖືເບົາ ຫລື ຮູ້ເທົ່າບໍ່ເຖິງການ ບາງຄົນກໍເລືອກໃສ່ເກີບທີ່ບໍ່ເໝາະສົມ, ບາງຄົນປົດເກີບ ແລ້ວໃຊ້ຕີນເປົ່າຂັບລົດ ຈົນເກີດອຸປະຕິເຫດຂຶ້ນມານັ້ນເອງ.

 ເພື່ອປ້ອງກັນເຫດການທີ່ຜູ້ຂັບຂີ່ອາດຮູ້ເທົ່າບໍ່ເຖິງການ ມື້ນີ້ພວກເຮົາມີຄຳແນະນຳກ່ຽວກັບການເລືອກເກີບ ແລະ ການຂັບຂີ່ໃຫ້ທຸກຄົນເຂົ້າໃຈ ເພື່ອໄປປະຕິບັດ ແລະ ຫລຸດໂອກາດການເກີດອຸປະຕິເຫດໄດ້ອີກສ່ວນໜຶ່ງ ດັ່ງນີ້ :

 ເກີບເປັນໂຕຊ່ວຍໃຫ້ຂັບຂີ່ໄດ້ໝັ້ນໃຈຍິ່ງຂຶ້ນໃນຕອນທີ່ເຮົາຕ້ອງຢຽບເບຣກ ຫລື ຄັນເລັ່ງ ນອກຈາກນີ້ ເທິງຖະໜົນໃນເມືອງຫລວງຫລາຍຈຸດນັ້ນອ່າວມີການຈະລາຈອນຕິດຂັດ ລວມໄປເຖິງເສັ້ນທາງທີ່ເປັນຂຸມ ຫາກເກີດເຫດຈຳເປັນຕ້ອງໄດ້ເບຣກສຸກເສີນ ເກີບນີ້ຈະເປັນໂຕປ້ອງກັນໃຫ້ຕີນບໍ່ບາດເຈັບ ແລະ ຍັງຊ່ວຍໃຫ້ທ່ານເບຣກທັນເວລາ ເຊິ່ງ ຫລັກການເລືອກເກີບໃນການໃສ່ຂັບລົດກໍບໍ່ຫຍຸ້ງຍາກ ພຽງແຕ່ທ່ານ :

     1. ເລືອກເກີບສຳລັບໃສ່ຂັບລົດຄູ່ທີ່ທ່ານໃສ່ແລ້ວພໍດີກັບຕີນທີ່ສຸດ ສາມາດຢຽບແປ້ນເບຣກ ແລະ ຄັນເລັ່ງໄດ້ເຕັມຕີນ.

    2. ເລືອກເກີບໃສ່ຂັບລົດນຳ້ໜັກເບົາ, ບໍ່ໜັກເກີນໄປ, ປ້ອງກັນບັນຫາການເຄື່ອນໄຫວຂອງຕີນ.

 ວິທີທົດລອງວ່າເກີບທີ່ໃສ່ຢູ່ເໝາະສົມຫລືບໍ່ ຄົນຂັບຄວນສັງເກດວ່າສາມາດຢຽບເບຣກ ແລະ ຄັນເລັ່ງໄດ້ຢ່າງຄ່ອງແຄ້ວຫລືບໍ່ ຫາກລອງໃສ່ແລ້ວຮູ້ສຶກວ່າເກີບບໍ່ພໍດີກັບຕີນຈົນເຮັດໃຫ້ຢຽບແປ້ນເບຣກ ແລະ ຄັນເລັ່ງບໍ່ຖະໜັດ ຂໍແນະນຳວ່າຄວນປ່ຽນເກີບຄູ່ໃໝ່ ເພື່ອປ້ອງກັນອຸປະຕິເຫດຈາກການຢຽບຄັນເລັ່ງ ແລະ ແປ້ນເບຣກພາດ.

     ເກີບທີ່ໃສ່ອາດຫາໄດ້ງ່າຍ ແຕ່ບາງເທື່ອເຮົາກໍອາດຈະລຶ້ງກັບການເອົາເກີບທີ່ໃສ່ເປັນປະຈຳໃນຊີວິດປະຈຳວັນມາໃສ່ໃນລົດ, ແຕ່ຮູ້ຫລືບໍ່ວ່າເກີບເຫລົ່ານີ້ເພີ່ມໂອກາດການເກີດອຸປະຕິເຫດໄດ້ຫລວງຫລາຍ ດັ່ງນີ້ :

     1. ເກີບສົ້ນສູງ : ຫລາຍເທື່ອທີ່ມີຂ່າວກ່ຽວກັບການເກີດອຸປະຕິເຫດຍ້ອນແມ່ຍິງໃສ່ເກີບສົ້ນສູງ ສາເຫດສຳຄັນມັກເກີດຈາກສົ້ນຂອງເກີບເຂົ້າໄປຕິດກັບເບຣກ ແລະ ຄັນເລັ່ງໂດຍທີ່ເຮົາບໍ່ຮູ້ໂຕ ເມື່ອເຖິງເວລາທີ່ຕ້ອງໃຊ້ງານເບຣກຂຶ້ນມາແທ້ໆ ກໍບໍ່ສາມາດເຮັດໄດ້ ເກີບສົ້ນສູງນັ້ນຄາຢູ່ ຈົນບໍ່ສາມາດຢຽບເບຣກໄດ້ ອັນຕະລາຍຫລາຍ. ຫາກທ່ານຢາກໃສ່ ເກີບສົ້ນສູງແທ້ໆ ຄວນປ່ຽນເປັນເກີບຄູ່ອື່ນໃນເວລາໃສ່ຂັບລົດໂດຍສະເພາະ ແລ້ວຈຶ່ງໃສ່ເກີບສົ້ນສູງຫລັງຈາກທີ່ເຊົາຂັບລົດແລ້ວຈະດີກ່ວາ.

     2. ເກີບຄູ່ໃຫຍ່ໆ ເນັ້ນໃສ່ສະບາຍ : ຫລາຍຄົນມັກເກີບເບີໃຫຍ່ກ່ວາຕີນ ເນື່ອງຈາກຄວາມສະບາຍໃນການໃສ່, ແຕ່ການທີ່ມັນຫລົມເກີນໄປ ມັນອາດເຮັດໃຫ້ທ່ານຢຽບເບຣກ ຫລື ຄັນເລັ່ງຜິດພາດໄດ້ ເພາະຍ້ອນພື້ນຮອງເກີບມັນໃຫຍ່ເກີນໄປ ດັ່ງນັ້ນ ເລືອກເກີບທີ່ພໍດີໆກັບຕີນຂອງທ່ານຈະເໝາະສົມກ່ວາ.

     3. ເກີບແຕະ (ບໍ່ມີດອກຢາງ) : ເກີບແຕະບໍ່ແມ່ນບໍ່ດີ ເພາະຫລາຍຄົນກໍນິຍົມໃສ່, ແຕ່ສຳລັບເກີບແຕະທີ່ບໍ່ມີດອກຢາງນັ້ນອັນຕະລາຍຫລາຍໆ ຍິ່ງໃນກໍລະນີທີເຮົາຍ່າງຍໍ່ານຳ້ກ່ອນຈະມາຂັບລົດ ດອກຢາງຂອງເກີບທີ່ຫາຍໄປບວກກັບນຳ້ປຽກຊຸ່ມນັ້ນ ມັນສົ່ງຜົນໃຫ້ມື່ນແນ່ນອນ ແລ້ວຖ້າມັນມື່ນຕອນທີ່ເຮົາຢຽບເບຣກ ຫລື ຄັນເລັ່ງ ມັນອັນຕະລາຍທີ່ສຸດ.

     ສຳລັບເກີບທົ່ວໄປທີ່ຄວນໃສ່ໃນຍາມຝົນ ຄວນຈະກຽມຜ້າ ຫລື ເຈ້ຍອະນາໄມໄວ້ເຊັດພື້ນເກີບໃຫ້ແຫ້ງ ເພື່ອຫລຸດໂອກາດເກີບມື່ນໃນຕອນທີ່ຢຽບແປ້ນເບຣກໄດ້.

     4. ເກີບສົ້ນຕຶກ : ຍັງເປັນທີ່ນິຍົມໃສ່ກັນຢູ່,​ ແຕ່ອັນຕະລາຍບໍ່ໜ້ອຍໄປກ່ວາເກີບສົ້ນສູງ ຍ້ອນສົ້ນທີ່ໃຫຍ່ ແລະ ມີຄວາມສູງຫລາຍເກີນໄປ ຈຶ່ງເກີດການພິກກາຍເປັນວ່າເກີບນັ້ນຂັດກັບແປ້ນຄັນເລັ່ງ ຄືໄປຢຽບແລ້ວຖົກຕີນບໍ່ອອກ ຜົນທີ່ໄດ້ຈຶ່ງບໍ່ແຕກຕ່າງກັບການໃສ່ເກີບສົ້ນສູງ.

     ສ່ວນການຂັບລົດແບບບໍ່ໃສ່ເກີບນັ້ນສາມາດເຮັດໄດ້, ແຕ່ຕ້ອງລະວັງ : ຄວາມຈິງແລ້ວບໍ່ມີກົດໝາຍຕາຍແນ່ນອນວ່າຈະຕ້ອງໃສ່ເກີບ ຫລື ປົດເກີບໃນການຂັບລົດ, ແຕ່ແນວໃດການໃສ່ເກີດຂັບລົດກໍປອດໄພກ່ວາ ເພາະອຸປະຕິເຫດໃນຫລາຍເທື່ອມັກເກີດຈາກການປົດເກີບໄວ້ໃນບໍລິເວນພື້ນລົດ, ແຕ່ການຂັບລົດຍ່ອມມີການເຄື່ອນໄຫວ ເກີບອາດໄຫລລົງມາ ຫລື ຫຍັບເຂົ້າມາທັບ ຫລື ຊ້ອນບໍລິເວນຄັນເລັ່ງ ຫລື ເບຣກລົດ ເມື່ອເຖິງຕອນໃຊ້ງານກໍບໍ່ສາມາດໃຊ້ງານໄດ້ ຫລື ກໍລະນີທີ່ຝາຕີນຂອງທ່ານນ້ອຍກໍມີໂອກາດເປັນໄປໄດ້ທີ່ຢຽບຊ່ອງວ່າງລະຫ່ວາງເບຣກ ແລະ ຄັນເລັ່ງໄດ້  ເຮັດໃຫ້ເບຣກບໍ່ທັນໄດ້ທີ່ສຸດ.

     ນອກຈາກນີ້, ບໍລິເວນພື້ນລົດ ບໍ່ຄວນໃຫ້ມີສິ່ງຂອງໃດໆວາງຢູ່ໃກ້ໆ ເພາະສິ່ງຂອງເຫລົ່ານັ້ນມັກມີໂອກາດທີ່ຈະສອດເຂົ້າໄປ ຫລື ຂັດກັບແປ້ນເບຣກ ຫລື ແປ້ນອື່ນໆ ເຮັດໃຫ້ຢຽບແລ້ວບໍ່ສຸດ ເຊິ່ງບໍ່ແມ່ນແຕ່ເກີບເທົ່ານັ້ນ ຍັງລວມໄປເຖິງກະຕຸກນຳ້ ຫລື ແມ່ນແຕ່ແທ່ງລິບສະຕິກກໍມີຜົນຄືກັນ. ດັ່ງນັ້ນ, ທ່ານຄວນເກັບມ້ຽນສິ່ງຂອງດັ່ງກ່າວໄວ້ອີກເບື້ອງໜຶ່ງ ຂອງພື້ນລົດ (ເບື້ອງຜູ້ໂດຍສານ) ຫລື ກະໂປ່ງທ້າຍລົດຈະປອດໄພທີ່ສຸດ.

    ນອກເໜືອຈາກການໃສ່ເກີບຂັບລົດຢ່າງລະມັດລະວັງແລ້ວ ການມີປະກັນໄພລົດຕິດໄວ້ ເປັນເລື່ອງທີ່ບໍ່ຄວນຖືເບົາ ທັງນີ້ການມີປະກັນໄພລົດບໍ່ໄດ້ຫລຸດຄວາມສ່ຽງໃນການເກີດອຸປະຕິເຫດ,​ ແຕ່ເປັນໂຕຊ່ວຍທີ່ເຮັດໃຫ້ທ່ານໝັ້ນໃຈ ແລະ ຄາຍກັງວົນຫາກເກີດອຸປະຕິເຫດຂຶ້ນມາ ເພາະປະກັນໄພລົດຈະຄອຍຊ່ວຍໃນເລື່ອງຂອງຄ່າໃຊ້ຈ່າຍຄວາມເສຍຫາຍທີ່ເກີດຂຶ້ນ ທັງນີ້ແຕ່ລະບໍລິສັດກໍມີຂໍ້ຍົກເວັ້ນ ຫລື ການຄຸ້ມຄອງທີ່ແຕກຕ່າງກັນໄປໃຫ້ທ່ານເລືອກ.