ປະຊາຊົນຫລາຍບ້ານໃນນະຄອນຫລວງສະເໜີ ສສຊ ແກ້ໄຂບັນຫາລາຄາສິນຄ້າເພີ່ມສູງຂຶ້ນ
ປະຊາຊົນ 4 ບ້ານຄື: ບ້ານເພຍວັດ, ເກົ້າຍອດ, ໜອງຈັນ ແລະ ບ້່ານ ສີເມືອງ, ມີຄວາມວິຕົກກັງວົນເລື່ອງບັນຫາລາຄາສີນຄ້າຖີບຕົວສູງຂຶ້ນ, ໂດຍສະເພາະລາຄາຊີ້ນໝູ, ຜັກ ແລະ ອື່ນໆ,ໄດ້ສົ່ງຜົນກະທົບບໍ່ໜ້ອວຍຕໍ່ການດໍາລົງຊີວິດຂອງປະຊາຊົນຜູ້ມີລາຍຮັບຕໍ່າຂໍໃຫ້ສະມາຊິກສະພາປະຊາຊົນເນັ້ນໃຫ້ພາກສ່ວນກ່ຽວຂ້ອງຊ່ວຍແກ້ໄຂ.
ໃນໂອກາດສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ (ນວ) ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ລົງພົບປະປະຊາຊົນໃນວັນທີ 18 ກຸມພານີ້, ເພື່ອເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງ ສພຊ ຢູ່ວັດສີເມືອງ, ຊຶ່ງທ່ານນາງ ກົງແສງ ສາຍນໍລາດ ນາຍ ບ້ານເພຍວັດໄດ້ຕາງໜ້າໃຫ້ປະຊາຊົນ4 ບ້ານດັ່ງກ່າວລາຍງານສະພາບໃຫ້ ສສຊ ຟັງວ່າ: ບ້ານເພຍວັດ, ເກົ້າຍອດ, ໜອງຈັນ ແລະ ບ້ານສີເມືອງມີພົນລະເມືອງ 3.096 ຄົນ, ຍິງ 1.654 ຄົນ, ມີ 630ຫລັງຄາເຮືອນ. ໃນນີ້ພະນັກງານກວມ30%, ຄ້າຂາຍ 25%, ກຳມະກອນ 15%, ນັກຮຽນ-ນັກສຶກສາ 18% ແລະ ປະຊາຊົນທົ່ວໄປ 12%, ທັງ 4 ບ້ານໄດ້ຮັບການພັດທະນາດ້ານລະບົບພື້ນຖານໂຄງລ່າງຢ່າງຕໍ່ເນື່ອງ, ແນວໃດກໍດີ ປະຊາຊົນໄດ້ສະເຫນີຫລາຍບັນຫາ, ໂດຍສະເພາະແມ່ນປັດຈຸບັນນີ້ຄ່າຄອງຊີບຖີບຕົວສູງຂຶ້ນ ໄດ້ສົ່ງຜົນກະທົບບໍ່ໜ້ອຍຕໍ່ການດໍາລົງຊີວິດຂອງປະຊາຊົນ ແລະ ຂໍຮຽກຮ້ອງໃຫ້ພາກສ່ວນກ່ຽວຂ້ອງເລັ່ງປັບປຸງໃຫ້ເໝາະສົມ,ອີກບັນຫາໜຶ່ງແມ່ນສະເໜີແກ້ໄຂບັນຫາຜູ້ຖືກຜົນກະທົບໂຄງການສ້າງສູນການຄ້າເຂດໜອງຈັນ, ເພາະມີບາງຄອບຄົວໄດ້ຮັບການຊົດເຊີຍບໍ່ສົມເຫດສົມຜົນ ແລະ ສະເໜີໃຫ້ແກ້ໄຂການເປີດສຽງເນືອງນັນເກີນຂອບເຂດຂອງຮ້ານກິນດື່ມຢູ່ບໍລິເວນສູນການຄ້າເວີເທດເຊັນເຕີ ທີ່ສົ່ງຜົນກະທົບໃຫ້ປະຊາຊົນອ້ອມຂ້າງແລະ ອື່ນໆ.
