ເປັນຫຍັງຈຶ່ງບໍ່ສາມາດຈຳກັດການຈູດຂີ້ເຫຍື້ອຊະຊາຍໄດ້?
ການຈູດຂີ້ເຫຍື້ອຢ່າງຊະຊາຍຢູ່ປະເທດເຮົາ ແມ່ນຍັງພົບເຫັນຫລາຍ ບໍ່ວ່າຢູ່ໃນຕົວເມືອງ ແລະ ທ້ອງຖິ່ນຕ່າງໆ ເນື່ອງຈາກປະຊາຊົນສ່ວນຫລາຍຖືວ່າການຈູດຂີ້ເຫຍື້ອຄືວິທີການກໍາຈັດສິ່ງທີ່ຮົກເຮື້ອ ຫລື ສິ່ງເສດເຫລືອຕ່າງໆແບບງ່າຍດາຍ ແລະ ເປັນຄວາມຊີນເຄີຍຂອງພວກເຮົາທີ່ໄດ້ປະຕິບັດກັນມາແຕ່ຫລາຍເຊັ່ນຄົນ.
ປັດຈຸບັນ, ເຖິງວ່າຈະມີໜ່ວຍງານບໍລິການເກັບຂີ້ເຫຍື້ອຕາມຊຸມຊົນຫລາຍຂຶ້ນ ເພື່ອຊ່ວຍຫລຸດຜ່ອນການຖິ້ມ ແລະ ຈູດຂີ້ເຫຍື້ອແບບຊະຊາຍນີ້ ເຊິ່ງອົງການສິ່ງແວດລ້ອມສາກົນລະບຸວ່າ: ພຶດຕິກໍາດັ່ງກ່າວເປັນສາເຫດໜຶ່ງສົ່ງຜົນກະທົບຕໍ່ສິ່ງແວດລ້ອມ, ມັນກໍ່ໃຫ້ເກີດມົນລະພິດທາງອາກາດຢູ່ຫລາຍປະເທດ ລວມທັງຢູ່ປະເທດລາວເຮົາ.
ແນວໃດກໍຕາມ, ຮູບການໂຄສະນາປຸກລະດົມແບບປາກຕໍ່ປາກ ເພື່ອຫ້າມບໍ່ໃຫ້ປະຊາຊົນຈູດຂີ້ເຫຍື້ອ, ຈູດປ່າ, ປ່າຫຍ້າ ອາດຈະບໍ່ໄດ້ຮັບຜົນປານໃດ ເພາະວ່າການຫ້າມພຽງຢ່າງດຽວ ໂດຍທີ່ບໍ່ມີມາດຕະການລົງໂທດແບບເຂັ້ມງວດຕໍ່ຜູ້ເຮັດນັ້ນ ກໍຄົງບໍ່ສາມາດເຮັດໃຫ້ພຶດຕິກໍາທີ່ເຄີຍເຮັດມາຫລາຍປີປ່ຽນແປງແບບໄວວາໄດ້.
ປັດຈຸບັນ, ລັດຖະບານໄດ້ຖືເອົາການສະກັດກັ້ນການຈູດຂີ້ເຫຍື້ອເປັນບັນຫາລະດັບຊາດ ຍ້ອນວ່າການຈູດຂີ້ເຫຍື້ອ, ໄຟໄໝ້ປ່າ, ຈູດໄຮ່, ຈູດເຟືອງ ແມ່ນຕົ້ນເຫດຂອງມົນລະພິດຝຸ່ນລະອອງຂະໜາດນ້ອຍ (PM 2.5) ທີ່ຫລາຍປະເທດກໍາລັງຜະເຊີນ ແລະ ເລັ່ງຫາວິທີແກ້ໄຂ. ສໍາລັບປະເທດເຮົາ, ລັດຖະບານຍັງໄດ້ມອບໃຫ້ຂະແໜງການກ່ຽວຂ້ອງ ແລະ ທ້ອງຖິ່ນເອົາໃຈໃສ່ຕິດຕາມກວດກາສະພາບການຈູດຂີ້ເຫຍື້ອ, ກວດກາລະດັບອາຍແກັສຈາກການໝັກ ຫລື ຍ່ອຍສະຫລາຍຂອງສານອິນຊີໃນຂີ້ເຫຍື້ອ ຢູ່ສະໜາມຂີ້ເຫຍືອແຕ່ລະແຫ່ງ ເພື່ອບໍ່ໃຫ້ເກີດໄຟໄໝ້, ອອກມາດຕະການຈໍາກັດການນໍາໃຊ້ລົດທີ່ບໍ່ໄດ້ຄຸນນະພາບ ແລະ ນໍ້າມັນທີ່ບໍ່ໄດ້ມາດຕະຖານ, ເອົາໃຈໃສ່ຕິດຕາມກວດກາບັນດາໂຮງຈັກ-ໂຮງງານບໍ່ໃຫ້ຖິ້ມສິ່ງເສດເຫລືອຈາກການຜະລິດປົນກັບຂີ້ເຫຍື້ອທົ່ວໄປ ເພື່ອຫລຸດຜ່ອນການສ້າງມົນລະພິດທາງອາກາດ, ພ້ອມທັງສ້າງນິຕິກໍາ, ຄູ່ມືເພື່ອປ້ອງກັນ, ຫລຸດຜ່ອນຄວາມສ່ຽງ ແລະ ກໍານົດມາດຕະການຕໍ່ຜູ້ລະເມີດຢ່າງເຂັ້ມງວດ. ສະນັ້ນ ມັນເຖິງເວລາແລ້ວທີ່ພວກເຮົາຕ້ອງຢຸດຕິການຈູດປ່າເຮັດໄຮ່, ເຮັດນາ, ຢຸດຕິການຖິ້ມ ຫລື ຈູດຂີ້ເຫຍື້ອຊະຊາຍ ເພື່ອປະກອບສ່ວນປົກປັກຮັກສາທໍາມະຊາດ ແລະ ສະພາບແວດລ້ອມໃຫ້ມີອາກາດທີ່ສະອາດສົດໃສຂຶ້ນ.
