ເມືອງສີໂຄດ ສອບເສັງນັກຮຽນເກັ່ງ ປະຈຳສົກຮຽນ 2019-2020
ເມື່ອທ້າຍອາທິດຜ່ານມາ, ຫ້ອງການສຶກສາທິການ ແລະ ກິລາ ເມືອງສີໂຄດຕະບອງ ນະຄອນຫຼວງວຽງຈັນ, ໄດ້ຈັດການສອບເສັງນັກຮຽນເກັ່ງ ຊັ້ນປະຖົມສຶກສາ (ປ.5), ມັດທະຍົມຕອນຕົ້ນ (ມ.4) ແລະ ມັດທະຍົມສຶກສາຕອນປາຍ (ມ.7) ປະຈໍາສົກຮຽນ 2019-2020, ຂຶ້ນຢູ່ໂຮງຮຽນ ມ ປາຍມິດຕະພາບ ນະຄອນຫຼວງວຽງຈັນ-ນະຄອນໂຮ່ຈີມິນ (ມປ ສີໂຄດ) ເພື່ອເອົານັກຮຽນເກັ່ງເຂົ້າຮ່ວມສອບເສັງຂັ້ນນະຄອນຫຼວງ. ໂດຍມີນັກຮຽນເກັ່ງຈາກໂຮງຮຽນຕ່າງໆທັງພາກລັດ ແລະ ເອກະຊົນເຂົ້າຮ່ວມສອບເສັງຄື: ປ5 ມີ 163 ຄົນ, ຍິງ 117 ຄົນ, ສອບເສັງໃນ 3 ວິຊາຄື: ວິຊາຄະນິດສາດ, ພາສາລາວ ແລະ ວິຊາໂລກອອ້ມຕົວເຮົາ, ມ4 ມີ 204 ຄົນ, ຍິງ 133 ຄົນ ສອບເສັງ 4 ວິຊາຄື: ວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ວິຊາວິທະຍາສາດທຳມະຊາດ ແລະ ຂັ້ນມັດທະຍົມສຶກສາຕອນປາຍ ມ7 ມີ 117 ຄົນ, ຍິງ 89 ຄົນ ສອບເສັງ 4 ວິຊາຄື: ວິຊາພາສາລາວ-ວັນນະຄະດີ, ຟີຊິກສາດ, ເຄມີສາດ ແລະ ວິຊາຄະນິດສາດ. ໃນນັ້ນ, ຈະໄດ້ຄັດເລືອກເອົານັກຮຽນເກັ່ງຂັ້ນປະຖົມສຶກສາ ປ5 ວິຊາລະ 3 ຄົນ ລວມ 9 ຄົນ, ມ4 ແລະ ມ7 ວິຊາລະ 5 ຄົນ ລວມທັງໝົດ 40 ຄົນ ເພື່ອເປັນຕົວແທນຂອງເມືອງສີໂຄດຕະບອງເຂົ້າຮ່ວມການແຂ່ງຂັນສອບເສັງນັກຮຽນເກັ່ງຂັ້ນນະຄອນຫຼວງວຽງຈັນ ປະຈຳສົກຮຽນ 2019-2020 ນີ້ໃຫ້ມີຜົນສໍາເລັດ.
