ນະຄອນຫຼວງວຽງຈັນຖະຫຼົ່ມແຂວງຊຽງຂວາງ 4-0 ຄວ້າແຊ້ມບານເຕະມິດຕະພາບ 4 ທີມ

ການແຂ່ງຂັນກີລາບານເຕະມິດຕະພາບ 4 ທີມເພື່ອກຽມຄວາມພ້ອມ,ທົດສອບທີມກ່ອນເຂົ້າຮ່ວມການແຂ່ງຂັນງານມະຫາກຳກີລາແຫ່ງຊາດຄັ້ງທີ່ 11 ທີ່ແຂວງຊຽງຂວາງເປັນເຈົ້າພາບໃນລະຫວ່າງວັນທີ 22 ມີນາ ຫາວັນທີ 1 ເມສານີ້ ໂດຍມີ 4 ທີມຄື: ນະຄອນຫຼວງວຽງຈັນ,ຊຽງຂວາງ,ຜົ້ງສາລີ ແລະ ສະຫວັນນະເຂດ ແຂ່ງຂັນໃນຮູບແບບພົບກັນໝົດແລ້ວເອົາ 2 ທີມທີ່ມີຜົນງານດີທີ່ສຸດເຂົ້າຊີງຊະນະເລີດ ແຂ່ງຂັນທີ່ສະໜາມກິລາເຈົ້າອານຸວົງ ນະຄອນຫຼວງວຽງຈັນລະຫວ່າງວັນທີ 4-8 ກຸມພານີ້

ໂດຍຜົນງານຂອງ ນະຄອນຫຼວງວຽງຈັນ ເອົາຊະນະ ແຂວງຊຽງຂວາງ 3-2 ໃນນັດທໍາອິດວັນທີ 4 ກຸມພາ 2020, ນັດທີ 2 ຊະນະ ສະຫວັນນະເຂດ 2-0, ນັດທີ 3 ຊະນະ ຜົ້ງສາລີ 2-1 ເຂົ້າຮອບຊີງຊະນະເລີດພົບກັບ ແຊວງຊຽງຂວາງ ອີກຄັ້ງກ່ອນເອົາຊະນະໄປ 4-0

ສຳຫຼັບນະຄອນຫຼວງວຽງຈັນ ຄວ້າແຊ້ມບານເຕະມິດຕະພາບ 4 ທີມໄປຄອງພ້ອມເງີນລາງວັນ 10.000.000 ກີບ,ຮອງເເຊ້ມແຂວງຊຽງຂວາງ ຮັບເງີນລາງວັນ 7.000.000 ກີບ ສ່ວນອັນດັບທີ່ 3 ຮ່ວມຄື ແຂວງສະຫວັນນະເຂດແລະແຂວງຜົ້ງສາລີ ຮັບເງີນລາງວັນ 4.000.000 ກີບ

ສະຫຼຸບຜົນການແຂ່ງຂັນອັນດັບ 1 ນະຄອນຫຼວງວຽງຈັນ, ອັນດັບ 2 ແຂວງຊຽງຂວາງ, ສ່ວນອັນດັບ 3 ຮ່ວມເປັນຂອງ ຜົ້ງສາລີ ກັບ ສະຫວັນນະເຂດ