ສູດປິ່ນປົວຝ້າຈາກທຳມະຊາດ
1. ພອກໜ້າດ້ວຍຫວ້ານຫາງແຂ້ : ຫວ້ານຫາງແຂ້ມີສັບພະຄຸນເປັນຢາທາບາດແຜໄຟໄໝ້, ນຳ້ຮ້ອນລວກ, ປິ່ນປົວບາດແຜຫລຸດຮອຍແປ້ວ ເຊິ່ງວິທີການແມ່ນໃຫ້ເອົາຫວ້ານຫາງແຂ້ 1 ໃບໃຫຍ່ໆ ເລືອກເອົາໃບແກ່ໆ ແລ້ວເອົາໄປແຊ່ນຳ້ປະມານ 10 – 15 ນາທີ ຈາກນັ້ນປອກເປືອກອອກແລ້ວລ້າງໃຫ້ສະອາດອີກຮອບໜຶ່ງ ຈຶ່ງເອົາໄປປັ່ນຈົນແຫລວ ແລະ ເອົາມາພອກໜ້າປະໄວ້ປະມານ 15 ນາທີ ຫາກໃຜຢາກພອກໜ້າແບບເຢັນໆ ໃຫ້ຮູ້ສຶກໜ້າເຄັ່ງ ກໍສາມາດເອົາໄປແຊ່ຕູ້ເຢັນກ່ອນຈຶ່ງເອົາມາພອກໜ້າໄດ້ ເມື່ອພອກຄົບ 15 ນາທີແລ້ວໃຫ້ລ້າງອອກ ເຮັດແບບນີ້ເປັນປະຈຳ ອາທິດລະ 2 – 3 ເທື່ອ ຈະຊ່ວຍປິ່ນປົວຝ້າໃຫ້ເຊົາໄວຂຶ້ນໄດ້ ທັງໄດ້ຜິວທີ່ຊຸ່ມຊື່ນ ບໍ່ຫ່ຽວຍານນຳອີກ.
2. ຜັດປ່ຽນແຊນຜິວດ້ວຍນຳ້ໝາກຂາມປຽກ : ໝາກຂາມປຽກມີກົດ (AHA) ທີ່ສາມາດຜັດປ່ຽນແຊນຜິວເກົ່າທີ່ຕາຍແລ້ວອອກ ຊ່ວຍຫລຸດຮອຍດຳຮອຍດ່າງ ແລະ
ຊ່ວຍປິ່ນປົວຝ້າໄດ້. ວິທີການແມ່ນເອົາໝາກຂາມປຽກມາປະສົມນຳ້
ແລ້ວຄັ້ນເອົານຳ້ໝາກຂາມປຽກມາທາບໍລິເວນທີ່ເປັນຝ້າ ປະໄວ້ປະມານ 3 – 5 ນາທີ ຈຶ່ງລ້າງອອກ
ເຮັດແບບນີ້ອາທິດລະ 1 ເທື່ອ ກໍ ຊ່ວຍເຮັດໃຫ້ຝ້າຈາງລົງໄດ້.
3. ພອກໜ້າດ້ວຍນຳ້ໝາກນາວປະສົມຝຸ່ນຂີ້ໝິ້ນຂຶ້ນ
: ເພາະນຳ້ໝາກນາວມີກົດ
(AHA) ແລະ ວິຕາມິນ
C ທີ່ຊ່ວຍຜັດປ່ຽນແຊນຜິວເກົ່າ ແລະ ບຳລຸງຜິວໄດ້.
ວິທີການແມ່ນເອົານຳ້ໝາກນາວມາປະສົມກັບຝຸ່ນຂີ້ໝິ້ນຂຶ້ນໃຫ້ເຂົ້າກັນດີ, ບໍ່ແຫລວຈົນເກີນໄປ ຈາກນັ້ນພອກປະໄວ້ໃຫ້ທົ່ວໃບໜ້າ ປະມານ 20 ນາທີ ແລ້ວລ້າງອອກ
ເຮັດເປັນປະຈຳອາທິດລະ 1 ເທື່ອກໍສາມາດປິ່ນປົວຝ້າ, ເມັນ,
ຈຸດດ່າງດຳໄດ້. ນອກຈາກນີ້ ໃຜທີ່ເປັນສິວກໍສາມາດໃຊ້ສູດນີ້ໄດ້ຄືກັນ
ຈະຊ່ວຍໃຫ້ສິວຍຸບໄວຫລາຍ.
4. ນຳ້ມັນໝາກພ້າວສະກັດເຢັນ: ໜຶ່ງໃນວິທີທີ່ສຸດງ່າຍກໍແມ່ນການເອົານຳ້ມັນໝາກພ້າວສະກັດເຢັນມາທາໜ້າກ່ອນນອນ
ໂດຍເອົາສຳລີໄປຈຸ່ມນຳ້ມັນໝາກພ້າວສະກັດເຢັນແລ້ວເຊັດໃຫ້ທົ່ວໃບໜ້າຫລັງຈາກອາບນຳ້ແລ້ວ
ໂດຍບໍ່ຕ້ອງລ້າງອອກ. ວິທີນີ້ສາມາດຊ່ວຍປິ່ນປົວຝ້າໄດ້
ເພາະນຳ້ມັນໝາກພ້າວສະກັດເຢັນມີກົດລໍຣິກທີ່ຈະປ່ຽນເປັນໂມໂນລໍຣິນ ໄປຊ່ວຍຂັດຂວາງການເກີດຝ້າ, ເມັນ, ຈຸດດ່າງດຳໄດ້.
ນອກຈາກນີ້ນຳ້ມັນໝາກພ້າວສະກັດເຢັນຍັງມີສານຕໍ່ຕ້ານອະນຸມູນອິດສະລະ, ມີວິຕາມິນເອີ ຊ່ວຍບຳລຸງຜິວ ແລະ ເຮັດໃຫ້ໃບໜ້າຊຸ່ມຊື່ນຂຶ້ນນຳອີກ.
