ລາວຫາລືຄວາມພ້ອມຮັບມືການລະບາດຂອງເຊື້ອ ໄວຣັດໂຄໂຣນາ

    ໃນວັນທີ 3 ກຸມພານີ້ ຫ້ອງວ່າການສໍານັກງານນາຍົກລັດຖະມົນຕີ ຮ່ວມກັບບັນດາກະຊວງທີ່ກ່ຽວຂ້ອງ ໄດ້ຈັດກອງປະຊຸມປຶກສາຫາລື ເພື່ອກະກຽມຄວາມພ້ອມຮັບມືກັບພະຍາດອັກເສບປອດສາຍພັນໃໝ່ (​ໄວຣັສ​ໂຄ​ໂຣນາ) ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ຜ່ານຂໍ້ຕົກລົງຂອງທ່ານນາຍົກລັດຖະມົນຕີ ກ່ຽວກັບການແຕ່ງຕັ້ງຄະນະສະເພາະກິດ ເພື່ອປ້ອງກັນ, ຄວບຄຸມ  ແລະ ແກ້ໄຂ ການລະບາດຂອງພະຍາດຮ້າຍ​ແຮງ​ນີ້ ເຊິ່ງຄະນະສະເພາະກິດດັ່ງກ່າວມີໜ້າທີ່ຊີ້ນຳ ແລະ ຊຸກຍູ້ທຸກພາກສ່ວນໃນສັງຄົມ ລວມທັງອົງການຈັດຕັ້ງຂອງລັດ, ອົງການປົກຄອງທ້ອງຖິ່ນ, ​ພາກສ່ວນເອກະຊົນ,​ ອົງການຈັດຕັ້ງສາກົນ ທີ່ເຄື່ອນໄຫວໃນ ສປປ ລາວ ເຂົ້າຮ່ວມ ແລະ ເປັນເຈົ້າການໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ, ພ້ອມທັງຕິດຕາມ, ກວດກາ ແລະ ປະເມີນສະພາບການຢ່າງໃກ້ຊິດ ແລ້ວລາຍງານໃຫ້ລັດຖະບານຮັບຊາບເປັນປົກກະຕິຕໍ່ເນື່ອງ ແລະ ທັນເວລາ ພ້ອມທັງແຕ່ງຕັ້ງຄະນະຜູ້ຊ່ວຍວຽກ ເພື່ອລົງເລິກຄົ້ນຄວ້າມາດຕະການ, ວິທີການຕ່າງໆ ທີ່ເໝາະສົມ ແລະ ເປັນໃຈກາງໃນການພົວພັນປະສານງານກັບຂະແໜງການຕ່າງໆ ​ເພື່ອເພີ່ມທະວີໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດນີ້ໃຫ້ມີປະສິດທິຜົນ.

ສຳລັບການປ້ອງກັນການຕິດເຊື້ອ ແລະ ການຄຸ້ມຄອງກໍລະນີ ໂຮງໝໍສູນກາງ ໄດ້ກຳນົດເອົາສາມໂຮງໝໍເປັນບ່ອນຮັບຮອງໃນການແຍກດ່ຽວກໍລະນີສົງ​ໄສ​ເຊັ່ນ: ໂຮງໝໍມະໂຫສົດ, ເສດຖາທິຣາດ, ໂຮງໝໍເດັກ ແລະ ກໍານົດເອົາໂຮງໝໍມິດຕະພາບເປັນບ່ອນປິ່ນປົວຄົນເຈັບຕິດເຊື້ອ. ສຳລັບແຂວງແມ່ນໂຮງໝໍແຂວງເປັນບ່ອນປິ່ນປົວ, ພ້ອມແຈ້ງ​ການໃຫ້ໂຮງໝໍລັດ, ເອກະຊົນ ແລະ ຄລີນິກທົ່ວໄປໃນການປ້ອງກັນ ແລະ ກັ່ນກອງຄົນເຈັບພະຍາດອັກເສບປອດ ທີ່ເກີດຈາກເຊື້ອ​ໄວຣັສ​ໂຄ​ໂຣນາ ແລະ  ເຝົ້າລະວັງລາຍງານກໍລະນີສົງ​ໄສຢ່າງຮີບດ່ວນ, ສັງລວມ ແລະ ກະກຽມອຸປະກອນປ້ອງກັນຕົນເອງທີ່ມີຢູ່ປັດຈຸບັນເຊັ່ນ: ຊຸດປ້ອງກັນຕົນເອງ (PPE), ອຸປະກອນປ້ອງກັນເຄື່ອງຊ່ວຍຫາຍໃຈ ແລະ ອຸປະກອນຈຳເປັນຕ່າງໆໃນໂຮງໝໍສູນກາງ, ໂຮງໝໍແຂວງ ແລະ ດ່ານເຂົ້າ-ອອກ ແລະ ໄດ້ສໍາເລັດການກໍານົດຄວາມຕ້ອງການເພີ່ມເຕີມເພື່ອກະກຽມຄວາມພ້ອມ, ກຳນົດລະບົບການນຳສົງຄົນເຈັບ ແລະ ການນຳໃຊ້ເຄື່ອງປ້ອງກັນຕົນເອງ ເພື່ອເປັນເອກະພາບທົ່ວປະເທດ, ໄດ້ຝຶກອົບອົບຮົມການປ້ອງກັນຕິດເຊື້ອ ແລະ ການຄຸ້ມຄອງກໍລະນີໃຫ້ພະນັກງານແພດໝໍ, ວິເຄາະ, ພະຍາບານ, ພະນັກງານອະ ນາໄມ ແລະ ພະນັກງານຂັບລົດຢູ່ໂຮງໝໍສູນກາງ, ໂຮງໝໍທະຫານ, ໂຮງໝໍຕໍາຫລວດ ແລະ 8 ແຂວງທາງພາກເໜືອ. ສ່ວນການເຝົ້າລະວັງ ແລະ ການບົ່ງມະຕິດ້ານວິເຄາະ ໄດ້ມີເຄືອຂ່າຍລະບົບເຝົ້າລະວັງໂດຍເຊື່ອມໂຍງກັບດ່ານເຂົ້າອອກ ແລະ ສະຖານທີ່ບໍລິການສາທາລະນະສຸກໃນທົ່ວປະເທດ ລວມທັງຄລີນິກເອກະຊົນ, ມີຄູ່ມື ສຳລັບການເຝົ້າລະວັງ ລວມທັງ ນິຍາມກໍລະນີ ແລະ ໄດ້ແຈກຢາຍໃຫ້ເຄືອຂ່າຍເຝົ້າລະວັງໃນທົ່ວປະເທດ, ໃຫ້ຂ່າວແກ່ປວງຊົນ ທົ່ວໄປໃນການຕິດຕໍ່ຫາ ຜູ້ຮັບສາຍດ່ວນ 166 ຫລື ເບີໂທຕິດຕໍ່ (IHR) ເພື່ອລາຍງານ ແລະ ແກ້ຂໍ້ຂ້ອງໃຈ ພ້ອມທັງ ລາຍງານກໍລະນີສົງໃສ ເພື່ອ ເຮັດການສອບສວນໄດ້ທັນເວລາ.