ລາວຢືນຢັນຜົນກວດວິເຄາະເຊື້ອພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ມີຄວາມຊັດເຈນທຽບເທົ່າກັບສາກົນ

ໃນວັນທີ 3 ກຸມພາ ນີ້, ທ່ານ ພອນປະສິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ ໃຫ້ສໍາພາດຕໍ່ນັກຂ່າວ ວ່າ: ການກວດເຊື້ອພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ (Novel Corona Virus) ລາວກໍນໍາໃຊ້ເຕັກໂນໂລຊີ ດຽວກັນກັບປະເທດຕ່າງໆ ເຊັ່ນ: ໄທ, ຈີນ ແລະ ອື່ນໆ, ໂດຍອີງໃສ່ມາດຕະຖານທີ່ອົງການອະນາໄມໂລກວາງອອກ, ສ່ວນດ້ານອຸປະກອບ ແລະ ບຸກຄະລາກອນກໍໄດ້ຮັບການຝຶກອົບຮົມມາເປັນຢ່າງດີ ແລະ ປະເທດອ້ອມຂ້າງກໍມີການແລກປ່ຽນບົດຮຽນເຊິ່ງກັນ ແລະ ກັນ ແລະ ການອອກຜົນກວດໃນແຕ່ລະຄັ້ງແມ່ນມີລະບົບຄວບຄຸມໃນຕົວ, ດັ່ງນັ້ນ, ຈຶ່ງເຊື້ອໄດ້ວ່າຜົນກວດເຊື້ອໄວຣັດດັ່ງກ່າວທີ່ອອກຢູ່ໃນສູນວິເຄາະ ແລະ ລະບາດວິທະຍາ ຈະມີຄວາມຖືກຕ້ອງ ແລະ ຊັດເຈນເທົ່າທຽມກັບສາກົນ. ນັບແຕ່ເຊື້ອພະຍາດດັ່ງກ່າວເລີ່ມລະບາດ ແລະ ຮອດປັດຈຸບັນ ຢູ່ລາວມີຜູ້ສົງໄສ 11 ກໍລະນີ, ໃນນັ້ນ, 9 ກໍລະນີ ຜົນກວດອອກມາເປັນລົບ ແລະ ອີກ 2 ກໍລະນີກໍາລັງດໍາເນີນການກວດກາຢູ່ (ຄົນຈີນທັງ 2)

ຫົວໜ້າສູນດັ່ງກ່າວ ໃຫ້ຮູ້ອີກວ່າ:  ປັດຈຸບັນ ໄດ້ມີແຜນຈະຂະຫຍາຍ ເຄື່ອງກວດຊະນິດນີ້ (Real-time PCR) ໄປຍັງສະຖານທີ່ ທີ່ມີຄວາມສ່ຽງຕ່າງໆ ໂດຍສະເພາະແມ່ນ ແຂວງພາກເໜືອ ຄື: ຫຼວງນໍ້າທາ ແລະ ຫຼວງພະບາງ ເພື່ອເຮັດໃຫ້ການກວດເຊື້ອໄວຣັດຮ້າຍແຮງນີ້ ມີຄວາມວ່ອງໄວຂຶ້ນ ແລະ ເຄື່ອງກວດ Real-time PCR ຈະສາມາດອອກຜົນໄດ້ໄວກວ່າເຄື່ອງ ທີ່ເຄີຍນໍາໃຊ້ໃນຜ່ານມາ, ຊຶ່ງປັດຈະບັນ ສປ ຈີນກໍໄດ້ນໍາໃຊ້ອຸປະກອນດັ່ງກ່າວນີ້. ໂດຍໃຊ້ເວລາໃນການກວດປະມານ 4 ຊົ່ວໂມງກໍສາມາດຮູ້ຜົນໄດ້, ສະນັ້ນ ຈຶ່ງເຊື້ອວ່າຜົນທີ່ອອກມາຈະມີຄວາມຖືກຕ້ອງສູງ.

ລາຍງານຫຼ້າສຸດ ໃນວັນທີ 3 ກຸມພາ ນີ້ (ເວລາ 7:53 ນາທີ), ຢູ່ ສປ ຈີນມີຜູ້ຕິດໄວຣັດດັ່ງກ່າວໃໝ່ 2.829 ກໍລະນີ, ລວມເປັນ 17.205 ກໍລະນີແລ້ວ ແລະ ມີຜູ້ເສຍຊີວິດ 361 ຄົນ.