ນອກແວ ສືບຕໍ່ໃຫ້ທຶນຊ່ວຍເຫລືອວຽກງານເກັບກູ້ລະເບີດບໍ່ທັນແຕກຢູ່ແຂວງຄໍາມ່ວນ
ພິທີເຊັນບົດບັນທຶກຄວາມເຂົ້າໃຈ ລະຫວ່າງ ຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ (ຄຊກລ) ແລະ ອົງການເກັບກູ້ລະເບີດແມັກ ປະຈຳລາວ ໄດ້ມີຂຶ້ນໃນວັນທີ 30 ມັງກອນນີ້ ຢູ່ທີ່ນະຄອນຫລວງວຽງຈັນ ລະຫວ່າງທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ ແລະ ທ່ານ ບີວ ມາດເດັ່ນ ຫົວໜ້າອົງການເກັບກູ້ລະເບີດແມັກ ປະຈຳ ສປປ ລາວ, ມີຜູ້ຕາງໜ້າຈາກກະຊວງການຕ່າງປະເທດ, ກະຊວງແຮງງານ ແລະ ສະຫວັດດີການສັງຄົມເຂົ້າຮ່ວມ.
ອົງການເກັບກູ້ລະເບີດແມັກ ປະຈຳ ສປປ ລາວ ໄດ້ຮັບທຶນຊ່ວຍເຫລືອຈາກກະຊວງການຕ່າງປະເທດນອກແວ (NMFA) ສຳລັບວຽກງານການສໍາຫລວດທາງວິຊາການ ແລະ ການເກັບກູ້ລະເບີດ ຢູ່ແຂວງຄໍາມ່ວນ ໃນສົກປີ 2019-2020 ເພື່ອຈັດຕັ້ງປະຕິບັດວຽກງານດັ່ງກ່າວຈໍານວນ 6 ແສນກວ່າໂດລາສະຫະລັດ ຫລື ປະມານ 5,5 ຕື້ກີບ ມີໄລຍະເວລາຈັດຕັ້ງປະຕິບັດ 12 ເດືອນ, ເງິນຈໍານວນດັ່ງກ່າວທາງອົງການແມັກຈະນໍາໃຊ້ເຂົ້າໃນການສໍາຫລວດທາງດ້ານວິຊາການໃຫ້ໄດ້ໃນເນື້ອທີ່ 6 ລ້ານຕາແມັດ ແລະ ກວດກູ້ລະເບີດອອກຈາກເນື້ອທີ່ດິນໃຫ້ໄດ້ຫລາຍກວ່າ 8 ແສນຕາແມັດ ຢູ່ເມືອງບົວລະພາ ແຂວງຄໍາມ່ວນ. ນອກຈາກນີ້ ຍັງຈະໄດ້ສະໜັບສະໜູນວຽກການເກັບກູ້ລະເບີດເຄື່ອນທີ່ເມື່ອໄດ້ຮັບການລາຍງານຈາກປະຊາຊົນໃນທ້ອງຖິ່ນທີ່ພົບເຫັນລະເບີດບໍ່ທັນແຕກ ແລະ ໃຫ້ມີຄວາມປອດໄພຕໍ່ຊີວິດ ແລະ ຊັບສິນ.
ທ່ານ ບີວ ມາດເດັ່ນ ກ່າວວ່າ: ຜົນກະທົບຈາກລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຍັງສືບຕໍ່ເປັນອຸປະສັກກີດກັ້ນການພັດທະນາຂອງປະເທດ, ປະຊາຊົນໃນທ້ອງຖິ່ນບໍ່ພຽງແຕ່ດຳລົງຊີວິດຢູ່ດ້ວຍຄວາມຢ້ານກົວ ຕໍ່ກັບລະເບີດບໍ່ທັນແຕກທີ່ຢູ່ໃນເນື້ອທີ່ດິນ ເພື່ອທໍາມາຫາກິນຂອງພວກເຂົາເທົ່ານັ້ນ, ແຕ່ຍັງໄດ້ຂະຫຍາຍເປັນວົງກວ້າງກວມເຖິງການເຂົ້າເຖິງການບໍລິການຂັ້ນພື້ນຖານ. ໂຄງການດັ່ງກ່າວຈະສືບຕໍ່ສຳຫລວດ ແລະ ເກັບກູ້ລະເບີດບໍ່ທັນແຕກ ເພື່ອເຮັດໃຫ້ເນື້ອດິນສຳລັບການປູກຝັງ ແລະ ລ້ຽງສັດ ໃຫ້ມີຄວາມປອດໄພ ເຊິ່ງເປັນອີກບາດກ້າວໜຶ່ງທີ່ສຳຄັນເພື່ອຍົກສູງຄຸນນະພາບຊີວິດການເປັນຢູ່ຂອງປະຊາຊົນໃນທ້ອງຖິ່ນໃຫ້ດີຂຶ້ນເທື່ອລະກ້າວ.
ອົງການເກັບກູ້ລະເບີດແມັກ ປະຈຳ ສປປ ລາວ ໄດ້ຮັບທຶນຊ່ວຍເຫລືອຈາກກະຊວງການຕ່າງປະເທດນອກແວ ໄດ້ເຂົ້າມາຈັດຕັ້ງປະຕິບັດວຽກງານດັ່ງກ່າວຢູ່ແຂວງຄຳມ່ວນນັບແຕ່ປີ 2015 ເປັນຕົ້ນມາ.
