ໂຮງໝໍມະໂຫສົດ ເອົາໃຈໃສ່ກະກຽມຄວາມພ້ອມຮອງຮັບໂຮງໝໍໃໝ່ 600 ຕຽງ

ໃນວັນທີ 31 ມັງກອນ ນີ້, ໂຮງໝໍມະໂຫສົດ ໄດ້ຈັດກອງປະຊຸມປະຈໍາປີຂອງຕົນຂຶ້ນ ເພື່ອສະຫຼຸບຕີລາຄາຄືນການຈັດຕັ້ງປະຕິບັດ ວຽກງານໃນໄລຍະຜ່ານມາ ແລະ ວາງແຜນການໃໝ່ໃນຕໍ່ໜ້າ, ເພື່ອສາມາດຮອງຮັບໂຮງໝໍໃໝ່ 600 ຕຽງໃຫ້ມີຜົນສໍາເລັດ, ໂດຍການຮ່ວມຂອງທ່ານ ບຸນແຝງ ພູມມະໄລສິດ ຮອງລັດຖະມົນຕີ ກະຊວງສາທາລະນະສຸກ, ທ່ານ ປອນເມກ ດາລາລອຍ ປະທານສະພາຄຸ້ມຄອງວິຊາຊີບປິ່ນປົວ.

ໃນກອງປະຊຸມທ່ານໝໍ ພິສິດ ພຸດສະຫວັດ ຜູ້ອໍານວຍການໂຮງໝໍມະໂຫສົດ ໃຫ້ຮູ້ວ່າ: ໃນໄລຍະ 1 ປີຜ່ານມາ, ໂຮງໝໍຂອງຕົນໄດ້ເອົາໃຈໃສ່ປັບປຸງ ການຈັດຕັ້ງ ແລະ ກຳນົດ ບົດບາດ,  ສິດ, ໜ້າທີ່, ຄວາມຮັບຜິດຊອບ  ແລະ ບອບແບບແຜນວິທີເຮັດລວມທັງກຳນົດວິໄສທັດ, ພັນທະກິດ ແລະ ຍຸດທະສາດໃນການພັດທະນາຄຸນນະພາບ ການບໍລິການສຸຂະພາບ 5 ດີ 1 ພໍໃຈ, ສ້າງຄວາມເຂັ້ມແຂງດ້ານການບໍລິການສຸຂະພາບ (ການປິ່ນປົວ)  ແລະ ກຽມຄວາມພ້ອມຮອງຮັບໂຮງໝໍໃໝ່ 600 ຕຽງທີ່ພວມດໍາເນີນການກໍ່ສ້າງຢູ່ໃນປັດຈຸບັນ ດ້ວຍທຶນຊ່ວຍເຫຼືອລ້າຈາກ ສປ ຈີນ ຊຶ່ງຄາດວ່າຈະໃຫ້ສໍາເລັດສົມບູນໃນປີ 2021 ທີ່ຈະມາເຖິງ ແລະເອົາໃຈໃສ່ ປັບປຸງພະແນກບໍລິການພິເສດ ແລະ ພະແນກກວດເຂດນອກໃຫ້ເປັນສູນການແພດໂປລີຄລີນິກ ບໍລິການສຸຂະພາບຕະຫຼອດ 24 ຊົ່ວໂມງ ຈາກການກວດເຂດນອກ ຈໍານວນ 260 ເທື່ອຄົນຕໍ່ວັນ ມາເປັນ 348 ເທື່ອຄົນຕໍ່ວັນ (ເພີ່ມຂຶ້ນ 88 ເທື່ອຄົນຕໍ່ວັນ), ກຽມຄວາມພ້ອມດ້ານການຈັດຕັ້ງ ແລະ ການເຄື່ອນໄຫວທາງດ້ານການພະຍາບານ ເພື່ອຮອງຮັບການເປີດບໍລິການ ຕຶກຄົນເຈັບໂຮງໝໍ 8 ຊັ້ນ ຂອງໂຮງໝໍຫຼັງໃໝ່, ພ້ອມທັງສົ່ງ ແລະ ຕິດຕາມແຜນການສ້າງຊັບພະຍາກອນມະນຸດ ເພື່ອກຽມຄວາມພ້ອມໃຫ້ແກ່ການບໍລິການໂຮງໝໍໃໝ່ ໃນໄລຍະສັ້ນ, ກາງ ແລະ ໄລຍະຍາວ ດ້ວຍການຮ່ວມມືລາວ-ຈີນໃຫ້ມີຄຸນນະພາບສູງ.

ທ່ານໝໍ ພິສິດ ກ່າວວ່າ: ປະຈຸບັນ ໂຮງໝໍມະໂຫສົດ ສາມາດແຢ່ທໍ້ເສັ້ນເລືອດຫົວໃຈໄດ້ແລ້ວ ສະເລ່ຍ 2-3ຄົນຕໍ່ວັນ, ໄດ້ເຊັນໜັງສືເຈດຈໍານົງການຮ່ວມມືທາງດ້ານການແພດ ລະຫວ່າງໂຮງໝໍມະໂຫສົດ ກັບໂຮງໝໍປະຊາຊົນເລກໜຶ່ງຄຸນມິງ ສ.ປ ຈີນ ກ່ຽວກັບການພັດທະນາການປ່ຽນຖ່າຍອະໄວຍະວະ. ພ້ອມທັງໄດ້ປັບປຸງລະບອບແບບແຜນວິທີເຮັດວຽກ ຂອງແຕ່ລະພະແນກ ໃຫ້ແກ່ບັນດາທ່ານໝໍແຕ່ລະວິຊາໃຫ້ສອດຄ່ອງ, ໂດຍຍຶດຖືເອົາຄົນເຈັບເປັນໃຈກາງ, ປັບປຸງການປະສານງານລະຫວ່າງພະແນກຕໍ່ພະແນກ ໃຫ້ສອດຄ່ອງຕາມແຜນພັດທະນາຂອງໂຮງໝໍ, ປັບປຸງຂອດປະສານງານຂອງໃຫ້ແຕ່ລະພະແນກໃຫ້ກົມກຽວ, ເພີ່ມຄວາມສາມາດທາງດ້ານເຕັກນິກ ແລະ ເຕັກໂນໂລຊີດ້ານການແພດ ໃຫ້ທຽບທັນກັບພາກພື້ນ ແລະ ເປັນທີ່ໄວ້ວາງໃຈແກ່ໂຮງໝໍຂັ້ນລຸ່ມ, ນອກນີ້, ຍັງໄດ້ປັບປຸງລະບອບແບບແຜນວິທີເຮັດວຽກຂອງພະຍາບານແຕ່ລະວິຊາໃຫ້ສອດຄ່ອງ, ແຕ່ງຕັ້ງ ຄະນະກໍາມະການການພະຍາບານ ແລະ ຄະນະອະນຸກໍາມະການ ຮັບຜິດຊອບຂອງແຕ່ລະວິຊາ, ກໍານົດພາລະບົດບາດ , ໜ້າທີ່, ຄວາມຮັບຜິດຊອບ ແລະ ມາດຕະການການປະຕິບັດວຽກງານວິຊາການຂອງພະຍາບານ, ມີລະບົບການລາຍງານ ວຽກງານການເຄື່ອນໄຫວ ດ້ານວິຊາການຕ່າງໆ ໃຫ້ສອດຄ່ອງຕາມແຜນ ພັດທະນາຂອງໂຮງໝໍ, ນອກນີ້ ໄດ້ນຳໃຊ້ໄອທີເຂົ້າສູ່ລະບົບຄຸ້ມຄອງການເງິນ, ໄດ້ຕິດຕັ້ງລະບົບເຄືອຂ່າຍ ແລະ ອຸປະກອນຄອມພິວເຕີເພື່ອໃຊ້ງານໃນລະບົບ (HIS) ໃຫ້ມີຜົນ, ພ້ອມທັງໄດ້ສ້າງຄວາມເຂັ້ມແຂງສະເພາະ ວິຊາການແພດ ໃນໂຮງໝໍ ເຊັ່ນ: ການແພດ ສັນລະຍະກຳ, ອາຍຸຣະກຳ, ກູມມານເວດສະກຳ, ວາງຢາສະຫຼົບ, ຟື້ນຟູຊີບ ແລະ ສຸກເສີນ, ການແພດ ຕາ, ຫູ, ດັງ, ຄໍ, ທັນຕະກຳ, ເຂດຮ້ອນ ແລະ ຊຶມເຊື້ອ, ພະຍາດບໍ່ຕິດຕໍ່,  ພະຍາດຫົວໃຈ-ເສັ້ນເລຶອດ ແລະ ການແພດສົ່ງເສີມສຸຂະພາບແມ່ ແລະເດັກ, ພ້ອມກັນນີ້, ຍັງໄດ້ ສ້າງຄວາມເຂັ້ມແຂງສະເພາະ ວິຊາການແພດ ໃຫ້ແກ່ໂຮງໝໍຂັ້ນລຸ່ມອີກຫຼາຍໆຂະແໜງການແພດອີກດ້ວຍ ເພື່ອຮັບປະກັນໃຫ້ການປະຕິບັດຄໍາຂວັນຂອງກະຊວງສາທາລະນະສຸກວາງອອກ 5 ດີ ແລະ 1 ພໍໃຈໃຫ້ປະກົດຜົນເປັນຈິງ.