ຍັງຕິດຕາມນຳຈັບຄົນຈູດປ່າຫຍ້າແຄມຂອງ
ຫົວໜ້າພະແນກສະກັດກັ້ນ
ແລະ ຕ້ານອັກຄີໄພ ນະ ຄອນຫຼວງວຽງຈັນ (ນວ) ໃຫ້ຮູ້ວ່າ: ເວລາປະມານ 11:00 ໂມງ ຂອງວັນທີ 30 ມັງກອນ ນີ້, ໄດ້ເກີດໄຟໄໝ້ປ່າຫຍ້າຫາດດອນຈັນບໍລິເວນຕໍ່ໜ້າຜ່າມໄຊ
ເມືອງຈັນທະບູລີ ນະຄອນຫລວງວຽງຈັນ, ຈົນໄດ້ນຳໃຊ້ລົດດັບເພີງຫລາຍເຖີງ 5 ຄັນ ແລະ ໃຊ້ເວລາກ່ວາ 3 ຊົ່ວໂມງ, ຈຶ່ງສາມາດຄວບຄຸມເພີງໄດ້. ໂດຍສາເຫດຂອງການເກີດໄຟໄໝ້ນີ້
ເຈົ້າໜ້າທີ່ກຳລັງເລັ່ງສືບສວນ-ສອບສວນ. ສ່ວນຂ່າວໃນສັງຄົມອອນລາຍທີ່ເຜີຍແຜ່ອອກໄປວ່າສາມາດຈັບຄົນຈູດໄດ້ແລ້ວນັ້ນແມ່ນບໍ່ມີມູນຄວາມຈິງ
ສ່ວນສາເຫດ ແລະ ຜົນເສຍຫາຍຍັງຢູ່ໃນຂັ້ນຕອນສືບສວນ-ສອບສວນຂອງເຈົ້າໜ້າ ທີ່.
ກົມຕຳຫລວດສະກັດກັ້ນ ແລະ ມອດໄຟ ໃຫ້ຮູ້ວ່າ: ໃນປີ 2019 ຜ່ານມາ, ທົ່ວປະເທດມີອັກຄີໄພທີ່ເກີດຂຶ້ນ 227 ຄັ້ງ. ສົ່ງຜົນໃຫ້ມີຜູ້ເສຍຊີວິດ 7 ຄົນ ແລະ ບາດເຈັບອີກ 2 ຄົນ ນອກຈາກນີ້ ຍັງມີເຮືອນເສຍຫາຍ 276 ຫລັງ, ຕະຫລາດ 1 ແຫ່ງ, ສາງເຄື່ອງ 11 ຫລັງ, ຫໍພັກ 2 ຫລັງ, ລົດສະແຕັກນ້ຳມັນ 1 ຄັນ ແລະ ອື່ນໆ ສ້າງຄວາມເສຍຫາຍທັງໝົດເກືອບ 90 ຕື້ກີບ.
ອັກຄີໄພທີ່ເກີດຂຶ້ນດັ່ງກ່າວຖ້າທຽບໃສ່ປີ 2018 ເພີ່ມຂຶ້ນເກືອບ 50 ຄັ້ງ ແລະ ມີຜູ້ເສຍຊີວິດເພີ່ມຂຶ້ນ 1 ຄົນ, ມູນຄ່າເສຍຫາຍເພີ່ມຂຶ້ນ 50 ຕື້ກວ່າກີບ. ອັກຄີໄພເກີດຂຶ້ນຫລາຍກວ່າໝູ່ແມ່ນຢູ່ນະຄອນຫລວງວຽງຈັນມີ 78 ຄັ້ງ, ຮອງລົງມາແມ່ນແຂວງສະຫວັນນະເຂດ 30 ຄັ້ງ ແລະ ແຂວງຈໍາປາສັກ 19 ຄັ້ງ; ສ່ວນແຂວງທີ່ບໍ່ມີອັກຄີໄພເກີດຂຶ້ນແມ່ນແຂວງໄຊສົມບູນ. ສໍາລັບອັກຄີໄພທີ່ສ້າງຄວາມເສຍຫາຍຫລາຍກວ່າໝູ່ແມ່ນເຫດໄຟໄໝ້ຕະຫລາດປາກຊັນ ແຂວງບໍລິຄໍາໄຊ ຍ້ອນໄຟຟ້າລັດວົງຈອນ ໃນວັນທີ 23 ຕຸລາ 2019 ສ້າງຄວາມເສຍຫາຍສູງເຖິງ 39 ຕື້ກວ່າກີບ.
