ປິດສາຍການບິນໄປຈີນບາງເສັ້ນທາງເປັນຊົ່ວຄາວ ເພື່ອຄວາມປອດໄພຈາກໄວຣັສໂຄໂຣນາ
ປັດຈຸບັນ ສປປ ລາວ ຍັງບໍ່ທັນພົບການຕິດເຊື້ອພະຍາດ ອັກເສບປອດສາຍພັນໃໝ່ (ໂຄໂຣນາ) ທີ່ເກີດ ຢູ່ ເມືອງ ອູ່ຮັນ, ສປ ຈີນ ເທື່ອ, ແຕ່ທາງການລາວກໍໄດ້ເພີ່ມທະວີການເຝົ້າລະວັງຕິດຕາມ ແລະ ສະກັດກັ້ນ ພະຍາດດັ່ງກ່າວ, ໂດຍສະເພາະແມ່ນດ່ານສາກົນຕ່າງໆ, ດັ່ງສະໜາມບິນສາກົນວັດໄຕ, ໄດ້ເພີ່ມທະວີການກວດກາຜູ້ເຂົ້າ-ອອກ ຢ່າງເຂັ້ມງວດ ແລະ ໄດ້ອອກແຈ້ງການ ຍົກເລີກຖ້ຽວບິນຊົ່ວຄາວຫຼາຍສາຍ ຈາກ ນະຄອນຫຼວງວຽງຈັນ ໄປ ສປ ຈີນຄື: ວຽງຈັນ-ຊາງໂຈ, ວຽງຈັນ – ຫາງໂຈ ແລະ ວຽງຈັນ – ຊຽງໄຮ ແລະ ເຮັດໃຫ້ມີນັກທ່ອງທ່ຽວຈີນ ຕົກຄ້າງ ເປັນຈຳນວນຫລາຍ.
ທ່ານ ບຸນມາ ພຸດທະວົງສາ ຜູ້ອຳນວຍການໃຫຍ່ ລັດວິສາຫະກິດການບິນລາວ ໃຫ້ສຳພາດຕໍ່ນັກຂ່າວໜັງສືພິມລາວພັດທະນາວ່າ: ພາຍຫລັງທີ່ມີການລະບາດຂອງພະຍາດ ໂຄໂຣນາ ຢູ່ ເມືອງ ອູ່ຮັນ ສປ ຈີນ, ໄດ້ເຮັດໃຫ້ນັກທ່ອງທ່ຽວເຂົ້າມາລາວຫລຸດລົງ, ໂດຍທາງ ສປ ຈີນ, ໄດ້ມີການສັ່ງຫ້າມ ປະຊາຊົນເຂດແຜ່ລະບາດເດີນທາງອອກນອກປະເທດ, ສະນັ້ນ ທາງການບິນລາວ ຈຶ່ງໄດ້ຍຸດບໍລິການຖ້ຽວບິນ 3 ສາຍຄື: ວຽງຈັນ-ຊາງໂຈ, ວຽງຈັນ – ຫາງໂຈ ແລະ ວຽງຈັນ – ຊຽງໄຮ. ສ່ວນເສັ້ນທາງ ວຽງຈັນ-ຄຸນໝິງ ແລະ ກວາງໂຈ ແມ່ນຍັງ ເປີດໃຫ້ບໍລິການຕາມປົກກະຕິ. ການຍົກເລີກຖ່ຽວບິນດັ່ງກ່າວເພື່ອຫຼີກ ເວັ້ນການຕິດເຊື້ອພະຍາດດັ່ງກ່າວ ທີ່ກໍາລັງແຜ່ລະບາດຢູ່ປະເທດຈີນ ແລະ ໄດ້ແຜ່ລາມໄປຫຼາຍ ປະເທດແລ້ວ. ນອກຈາກ ນີ້, ຍັງພົບວ່າ: ມີນັກທ່ງອທ່ຽວຈີນ ຈຳນວນໜຶ່ງຍັງຕົກຄ້າງຢູ່ລາວ, ພາຍຫລັງທີ່ມີການສັ່ງຫ້າມຈາກທາງ ສປ ຈີນ ບໍ່ໃຫ້ປະຊາຊົນ ເດີນທາງເຂົ້າ-ອອກປະເທດ, ຊຶ່ງປັດຈຸບັນ ລາວໄດ້ປະສານໄປຍັງ ສປ ຈີນ ເພື່ອແກ້ໄຂຜູ້ໂດຍສານທີ່ຕົກຄ້າງຮ່ວມກັນ.
ສປປ ລາວ ມີຖ້ຽວບິນໄປ ສປ ຈີນ ທັງໝົດ 9 ເສັ້ນທາງຄື: ຄຸນໝິງ, ກວາງ ໂຈ, ຫາງໂຈ, ຊາງສາ, ຊຽງໄຮ, ເວີນໂຈ ແລະ ເຊີນຕູ, ຈາກນະຄອນຫຼວງພະບາງ ໄປຫາ ຊາງສາ ແລະ ຊຽງຮຸງ. ເພື່ອສະກັດກັ້ນການແຜ່ລະບາດ, ສະໜາມບິນໄດ້ເປັນເຈົ້າການໃນການຈັດຕັ້ງປະຕິບັດກວດກາຜູ້ໂດຍສານທີ່ມາຈາກຕ່າງປະເທດ, ໂດຍສະເພາະເດີນທາງມາຈາກ ສປ ຈີນ, ໂດຍການຮ່ວມມືກັບກະຊວງສາທາລະນະສຸກຕິດຕັ້ງອຸປະກອນ ແລະ ການກວດກາຜູ້ໂດຍສານທີ່ເຂົ້າ-ອອກ ສປປ ລາວ, ຕິດຕັ້ງເຄື່ອງເຕີໂມສະແກນ (ເຄື່ອງສະແກນວັດແທກອຸນຫະພູມ) ເປັນທີ່ຮຽບຮ້ອຍ, ພ້ອມທັງໄດ້ຕິດຕັ້ງບ່ອນລ້າງມື ແລະ ນ້ຳຢາຂ້າເຊື້ອໃຫ້ກັບຜູ້ໂດຍສານ ແລະ ໄດ້ເນັ້ນໃຫ້ພະນັກງານເອົາໃຈໃສ່ປ້ອງກັນເຊື້ອພະຍາດ, ໂດຍການໃສ່ໜ້າກາກ ປັດຈຸບັນມີສາຍການບິນທັງໝົດ 18 ສາຍ ໃນນັ້ນ ໄດ້ມີສາຍການບິນໂດຍກົງມາຈາກ ສປ ຈີນວັນລະ 2 ຖ້ຽວບິນ.
ຜູ້ອຳນວຍການໃຫຍ່ ລັດວິສາຫະກິດດັ່ງກ່າວ ໃຫ້ຮູ້ອີກວ່າ: ໄລຍະນີ້, ຈຳນວນນັກທ່ອງທ່ຽວຈີນໄດ້ຫລຸດລົງ, ແຕ່ກໍຍັງມີນັກທ່ອງທ່ຽວປະເທດໃກ້ຄຽງ ທີ່ເດີນທາງເຂົ້າມາເປັນຈຳນວນຫລາຍ, ສະນັ້ນ ເພື່ອຮອງຮັບຜູ້ໂດຍສານ ພາຍຫລັງການຫລຸດຖ້ຽວບິນຈາກ ສປ ຈີນ ຊົ່ວຄາວ, ລັດວິສາຫະກິດການບິນພວກເຮົາກໍໄດ້ເພີ່ມຈຳນວນຖ້ຽວບິນສາຍອື່ນ, ໂດຍສະເພາະແມ່ນສາຍການບິນພາຍໃນປະເທດ ເພື່ອອຳນວຍຄວາມສະດວກແກ່ຜູ້ມາໃຊ້ບໍລິການ.
ທ່ານ ຫົວໜ້າທີມແພດປະຈຳຢູ່ດ່ານສາກົນສະໜາມບິນວັດໄຕ ໃຫ້ຮູ້ວ່າ: ພາຍຫຼັງມີການແຜ່ລະບາດພະຍາດດັ່ງກ່າວ, ກໍໄດ້ເພີ່ມທະວີໃນການຕິດຕາມກວດກາຜູ້ໂດຍສານຊຶ່ງໄດ້ຕິດຕັ້ງເຄື່ອງເຕີໂມສະແກນເພື່ອກວດຫາກໍລະນີສົງໄສທີ່ຕິດເຊື້ອພະຍາດຮ້າຍແຮງນີ້, ເຊິ່ງທີມແພດໄດ້ປະຈຳການຕະຫລອດ 24 ຊົ່ວໂມງ, ໂດຍໄດ້ກວດຜູ້ໂດຍສານຂາເຂົ້າທຸກສາຍການບິນ, ໂດຍສະເພາະແມ່ນກຸ່ມຜູ້ໂດຍສານທີ່ເດີນທາງມາຈາກຈຸດທີ່ເກີດຄວາມສ່ຽງ, ເຊິ່ງໄດ້ຊັກຖາມເປັນກໍລະນີພິເສດ, ພ້ອມທັງໄດ້ແຈກຢາຍແຜ່ນພັບເປັນພາສາລາວ, ພາສາອັງກິດ ແລະ ພາສາຈີນ, ແນະນຳກ່ຽວກັບການປ້ອງກັນພະຍາດນີ້ ແລະ ແຈກຢາຍໜ້າກາກອະນາໄມໃຫ້ຜູ້ໂດຍສານທົ່ວເຖິງ, ຜ່ານການກວດກາໃນສະໜາມບິນສາກົນວັດໄຕມາຮອດປັດຈຸບັນຍັງບໍ່ພົບກໍລະນີສົງໄສ ແຕ່ທີມແພດຈະຕັ້ງໜ້າຕ້ານ ແລະ ສະກັດກັ້ນເຊື້ອພະຍາດນີ້ຢ່າງເອົາໃຈໃສ່, ໂດຍໄດ້ກະກຽມ ຫ້ອງແຍກປ່ຽວ ແລະ ມີແພດໝໍທີ່ສາມາດເວົ້າພາສາຈີນເຂົ້າຊັກຖາມປະຫວັດ ພ້ອມທັງມີລົດຮັບສົ່ງຄົນເຈັບ ໂດຍນຳໃຊ້ສາຍເສັ້ນທາງພິເສດທີ່ສະໜາມບິນ ເພື່ອນຳສົ່ງໄປປິ່ນປົວຢູ່ໂຮງໝໍ ທີ່ກະຊວງສາທາລະນະສຸກ ໄດ້ກະກຽມໄວ້ໃຫ້ທັນເວລາ.
