ນາຍົກຈີນສັ່ງເລັ່ງສ້າງໂຮງໝໍໃນອູ່ຮັນຮອງຮັບຜູ້ປ່ວຍໂຄໂຣນາ
ນາຍົກລັດຖະມົນຕີ ຫລີ ເຄີ້ສຽງ ຂອງຈີນ ໄດ້ສັ່ງໃຫ້ເຈົ້າໜ້າທີ່ເລັ່ງກໍ່ສ້າງໂຮງໝໍຊົ່ວຄາວ ເພື່ອປິ່ນປົວຜູ້ປ່ວຍຕິດເຊື້ອໄວຣັສໂຄໂຣນາສາຍພັນໃໝ່ໃຫ້ສຳເລັດໄວຂຶ້ນ.
ທ່ານ ຫລີ ເຄີ້ສຽງ ນາຍົກລັດຖະມົນຕີ, ຫົວໜ້າຄະນະກຳມະການກາງປະຈຳພັກຊີພີຊີ ເພື່ອປ້ອງກັນ ແລະ ຄວບຄຸມການແຜ່ລະບາດຂອງໄວຣັສໂຄໂຣນາສາຍພັນໃໝ່ ໄດ້ສັ່ງໃຫ້ເລັ່ງກໍ່ສ້າງໂຮງໝໍໃຫ້ສຳເລັດແຂ່ງກັບເວລາ ເພື່ອເປັນສະຖານທີ່ປອດໄພສຳລັບຜູ້ຕິດເຊື້ອ. ນອກຈາກນີ້ ທ່ານ ຫລີ ເຄີ້ສຽງ ຍັງສັ່ງໃຫ້ປ້ອງກັນບໍ່ໃຫ້ກຸ່ມກຳມະກອນໄດ້ຮັບເຊື້ອ.
ສຳນັກຂ່າວຊິນຮົວລາຍງານວ່າ: ເມືອງອູ່ຮັນກຳລັງຢູ່ລະຫວ່າງການກໍ່ສ້າງໂຮງໝໍຊົ່ວຄາວ 2 ແຫ່ງ ໄດ້ແກ່ໂຮງໝໍຫົວເຊິນຊານ ເຊິ່ງຈະມີຕຽງປະມານ 700-1.000 ຕຽງ ແລະ ໂຮງໝໍເຫລຍເສິນຊານ ເຊິ່ງຈະມີຕຽງປະມານ 1.300-1.500 ຕຽງ ເພື່ອປິ່ນປົວຜູ້ປ່ວຍທີ່ຕິດເຊື້ອໄວຣັສໂຄໂຣນາສາຍພັນໃໝ່ ໂດຍຄາດວ່າໂຮງໝໍທັງສອງແຫ່ງຈະສາມາດເປີດໃຫ້ບໍລິການໄດ້ໃນວັນທີ 3 ແລະ 5 ກຸມພານີ້.
