ການແຂ່ງຂັນບານເຕະ ລາຍການ ລີໂອຄັບ 2020 ຈັດຂຶ້ນເພື່ອເປັນການອຸ່ນເຄື່ອງ ແລະ ທົດສອບທີມກ່ອນເລີ່ມລີກລະດູການໃຫມ່ ປີ 2020 ການແຂ່ງຂັນຮອບ 8 ທີມສຸດທ້າຍສອງຄູ່ໃນວັນທີ 26 ມັງກອນນີ້ ສະໂມສອນ ພີທີ ປຣະຈວບ ເອຟຊີ ທີມໃນລີກສູງສຸດຂອງປະເທດໄທ ແຊ້ມລີກຄັບ ປະເທດໄທ ປີ 2019 ເປີດທີ່ສະໜາມແຂວງປຣະຈວບ ຄີຣີຂັນ ພົບກັບ ລາວ ໂຕໂຢຕ້າ ເອຟຊີ ທີມແຊ້ມລາວພຣີເມຍລີກ 3 ສະໄໝຕິດຕໍ່ກັນ ແລະ ແຊ້ມ LFF Cup 2019.

ສະໂມສອນບານເຕະ ລາວໂຕໂຢຕ້າ ຄືຕົວແທນໜຶ່ງດຽວຈາກລາວເຮົາ ຈັດທັບນັກກີລາເຕັມສູບ ນຳໂດຍ: 4 ນັກເຕະຕ່າງຊາດຊຸດໃຫມ່ Bamba ກອງຫຼັງສັນຊາດໄອໂວຣີໂຄ໊ດ, Norihiro Kawakami ກອງຫຼັງສາຍເລືອດຊາມູໄຣ ແລະ ສອງກອງໜ້າ Goran Jerković   ສູນໜ້າສັນຊາດຝຣັ່ງ ແລະ Laércio Gomes Costa ສູນໜ້າຊາວເບຣຊິນ ລວມທັງ ພິທັກ ກອງມາທິລາດ ປີກທີມຊາດລາວ ກັບມາຮ່ວມທີມອີກຄັ້ງ ຫຼັງຈາກໝົດສັນຍາກັບ ອາຢຸດທະຍາ ຢູໄນເຕັດ ໃນລີກ 3 ຂອງປະເທດໄທ.

ຂະນະທີ່ ເຈົ້າຖິ່ນ ພີທີ ປຣະຈວບ ນຳທັບໂດຍ: ບຣູໂນ້ ໂຣຊ້າ ຊາວເບຣຊິນ ທີ່ມີປະສົບການສູງ ອະດີດກອງໜ້າ ຟລາແມັງໂກ້ ທີມດັງຈາກລີກແຊມບ້າ ແລະ ວິນລ້ຽມ ເຮັນຣີເກ້ ອະດີດກອງກາງຊຽງຣາຍ ຢູໄນເຕັດ ແຊ້ມໄທລີກ 2019 ແລະ ສຸກອາພອນ ວົງຈຽງຄຳ ນັກເຕະສາລະພັດປະໂຫຍດທີມຊາດລາວ ທີ່ຍ້າຍຈາກ ໄຊນາດ ຮອນບິວ ມາຮ່ວມທີມ, ຊຶ່ງໄດ້ລົງຫລິ້ນໃນຖານະຕົວສຳຮອງ.

ເລີ່ມເກມການແຂ່ງຂັນໃນເຄີ່ງເວລາທຳອິດ ໂດຍພາບລວມທັງສອງທີມສູ້ກັນບໍ່ຂາດ ແຕ່ເຈົ້າບ້ານຄອງບານ,ສ້າງສັນໂອກາດໄດ້ດີກວ່າເລັກ  ໜ້ອຍ ແລະ ໄດ້ປະຕູຂຶ້ນນຳຈາກ ວິນລ້ຽມ ເຮັນຣີເກ້ ນາທີ 40 ຈົບເຄິ່ງເວລາທຳອິດ ພີທີ ປຣະຈວບ ນຳ ລາວໂຕໂຢຕ້າ 1-0.

ເກມການແຂ່ງຂັນໃນເວລາເຄິ່ງຫລັງ ລາວໂຕໂຢຕ້າ ບຸກໜັກແລກຫຼາຍກວ່າເກົ່າ ແລະ ມີໂອກາດຕີສະເໝີໄດ້ ແຕ່ຂາດຄວາມເດັດຂາດ ສຸດທ້າຍເປັນເຈົ້າບ້ານ ພີທີ ປຣະຈວບ ມາບວກປະຕູປິດທ້າຍຈາກ ວີຣະວຸດ ກາເຢັມ ນາທີ 78 ແລະ ຈົບເກມ ພີທີ ປຣະຈວບ ເອຟຊີ ຊະນະ ລາວໂຕໂຢຕ້າ 2-0 ເຂົ້າຮອບ 4 ທີມສຸດທ້າຍພົບກັບ ການທ່າເຮືອ ເອັຟຊີ ແຊ້ມເອເອັຟຄັບ ປະເທດໄທ ປີ 2019 ທີ່ເອົາຊະນະ ເຊເຣໂຊ້ ໂອຊາກະ ທີມອັນດັບ 5 ຈາກລີກສູງສຸດຢີ່ປຸ່ນ ດ້ວຍຜົນການແຂ່ງຂັນ 3-0

ສ່ວນການແຂ່ງຂັນລາຍການຕໍ່ໄປຂອງ ລາວໂຕໂຢຕ້າ ຈະລົງແຂ່ງ AFC Cup 2020 ຮອບແບ່ງກຸ່ມ ກຸ່ມ F ປະກອບມີ: ໂຮຈີມິງ ຊິຕີ້ ຈາກຫວຽດນາມ, Hougang United FC ຈາກສິງກະໂປ ແລະ ທີມຊະນະໃນຮອບເພລອັອຟ ລະຫວ່າງ INDERA SC ຈາກບຣູໄນ ພົບ YANGON UNITED FC ຈາກມຽນມາ ຈະແຂ່ງຂັນໃນວັນທີ 11 ກຸມພາ ຫາວັນທີ 13 ພຶດສະພາ 2020.