ຖີ້ມຂີ້ເຫຍື້ອຊະຊາຍ ຈະຖືກປັບ 100 ເທົ່າ
ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການຄຸ້ມຄອງ ແລະ ບໍລິຫານຕົວເມືອງ ໃຫ້ຮູ້ວ່າ: ປັດຈຸບັນ ວຽກງານຮັກສາຄວາມສະອາດໃນສະຖານທີ່ສາທາລະນະ, ໃນເຮືອນຊານບ້ານຊ່ອງຕ່າງໆຂອງປະຊາຊົນ ເຫັນວ່າເຮັດໄດ້ດີຂຶ້ນເລື້ອຍໆ ເຊັ່ນຢູ່ສວນສາທາລະນະ, ຖະ ໜົນຫົນທາງ, ໄຟເຍືອງທາງ ແລະ ອື່ນໆ ໄດ້ມີຄວາມສະອາດຈົບງາມຂຶ້ນກວ່າເກົ່າໂດຍສະເພາະການເກັບມ້ຽນຂີ້ເຫຍື້ອຖືເປັນປັດໄຈສຳຄັນໃນການສ້າງຕົວເມືອງໃຫ້ມີຄວາມສະ ອາດ ເຊິ່ງ ອພບ ໄດ້ເອົາໃຈໃສ່ປະຕິບັດໜ້າທີ່ໃນການເກັບມ້ຽນຂີ້ເຫຍື້ອ ຢ່າງທົ່ວເຖິງຕາມເຮືອນຊານບ້ານຊ່ອງ, ສຳນັກງານ, ອົງການ ແລະ ສວນສາທາລະນະ ຕ່າງໆ ໄດ້ເຮັດສັນຍາເກັບມ້ຽນຂີ້ເຫຍື້ອຢ່າງເປັນລະບົບ. ນອກນັ້ນ ຄບຕ ຍັງໄດ້ເອົາໃຈໃສ່ຈັດຕັ້ງ ປະຕິບັດຈຸດສຸມທົດລອງແກ້ໄຂຄວາມບໍ່ສະອາດຂອງຕົວເມືອງ ມີ 35 ບ້ານໃນ 4 ຕົວເມືອງ ຄືເມືອງຈັນທະບູລີ, ສີສັດຕະນາກ, ສີໂຄດຕະບອງ ແລະເມືອງໄຊເສດຖາ, ແຕ່ຄຽງຄູ່ກັນນັ້ນ ກໍຮຽກຮ້ອງໃຫ້ປະຊາຊົນ, ສຳນັກ ງານ, ອົງການຕ່າງໆຈົ່ງໄດ້ເປັນເຈົ້າການເຂົ້າຮ່ວມຂະບວນການຮັກສາຄວາມສະອາດຕາມໜ້າບ້ານ ຫລື ສຳນັກງານຂອງໃຜ ລາວຢ່າງເປັນປົກກະຕິ ເພື່ອ ສ.ສະອາດ ປາກົດຜົນເປັນຈິງ.
ແນວໃດກໍດີ, ປັດຈຸບັນ ນະຄອນຫລວງວຽງຈັນ ມີິປະລິມານຂີ້ເຫຍື້ອຫລາຍກ່ວາ 600 ໂຕນຕໍ່ມື້, ຈຶ່ງເກີດບັນຫາການລັກລອບຖິ້ມຂີ້ເຫຍື້ອແບບຊະຊາຍຕາມແຄມທາງ, ຄອງລະບາຍນ້ຳຕ່າງໆໃນຕົວເມືອງ ຈຶ່ງເປັນບັນຫາສົ່ງຜົນກະທົບອັນບໍ່ດີຕໍ່ສິ່ງແວດລ້ອມ ແລະ ສັງຄົມ ໂດຍສະເພາະຄວາມບໍ່ສະອາດຈົບງາມ, ມີສິ່ງເສດເຫລືອອຸດຕັນຕາມຮ່ອງລະບາຍນ້ຳ ແລະ ສົ່ງກິ່ນເໝັນໃນຕົວເມືອງຕາມມາ ແລະ ຖືວ່າເປັນສິ່ງທ້າທາຍສົມ ຄວນໃນການຈັດຕັ້ງປະຕິບັດນະໂຍບາຍ 6 ສ ຂອງນະຄອນ ຫລວງວຽງຈັນ ເປັນຕົ້ນ ສ.ສະ ອາດ ໃຫ້ບັນລຸຜົນເປັນຈິງ. ເພື່ອສະກັດກັ້ນສະພາບດັ່ງກ່າວ ທາງໜ່ວຍງານພວກເຮົາກໍໄດ້ມີມາດຕະການຢ່າງເຂັ້ມງວດ ໂດຍການປັບໃໝ 100 ເທົ່າຕໍ່ຜູ້ລະເມີດຄື: ເມື່ອບໍ່ດົນມານີ້, ຫ້ອງການຄຸ້ມຄອງ ແລະ ບໍລິຫານຕົວເມືອງ ກໍໄດ້ປັບໄໝຜູ້ລະເມີດຖີ້ມຂີ້ເຫຍື້ອຊະຊາຍ ຢູ່ເສັ້ນທາງ ໜອງບົວທອງ-ໜອງບຶກ ຊຶ່ງເປັນຄົນຈີນທີ່ລັກເອົາຂີ້ເຫຍື້ອໄປຖີ້ມແບບຊະຊາຍ ເປັນຈຳນວນເງີນ 8 ລ້ານກີບ ແລະ ປັບໃໝຜູ້ກະທຳຜິດເອົາຂີ້ເຫຍື້ອໄປຖີ້ມຢູ່ເສັ້ນທາງ T4 ຈຳນວນເງີນ 12 ລ້ານກີບ, ຕໍ່ກັບສະພາບດັ່ງກ່າວ, ກໍຮຽກຮ້ອງໃຫ້ສັງຄົມຊ່ວຍ ເປັນຫູເປັນຕາ ຫາກພົບເຫັນບຸກຄົນໃດນຳຂີ້ເຫຍື້ອໄປຖີ້ມຊະຊາຍໃຫ້ຖ່າຍຮູບ ຫລື ສົ່ງຂໍ້ມູນທີ່ສາມາດເປັນຫລັກຖານເອົາຜິດຜູ້ລະເມີດ ແລ້ວສົ່ງມາຍັງຫ້ອງການຄຸ້ມຄອງ ແລະ ບໍລິຫານຕົວເມືອງ ຫລື ໂທລະສັບໝາຍເລກ 020 5621164 ໄດ້ທັນທີ.
