ນັກໂທດຢູ່ລາວຈະມີວຽກເຮັດງານທໍາ

ໃນຕໍ່ໜ້ານີ້, ນັກໂທດຢູ່ບັນດາຄ້າຍຄຸມຂັງໃນທົ່ວປະເທດຈະມີໂອກາດໄດ້ມີວຽກເຮັດງານທໍາແລະມີລາຍຮັບໃຫ້ຕົນເອງ, ຫລັງຈາກມີນັກທຸລະກິດຈີນໃຫ້ຄວາມສົນໃຈມາລົງທຶນຫລາຍຂະແໜງຢູ່ລາວ, ໂດຍເນັ້ນໃສ່ເອົານັກໂທດເປັນກໍາລັງແຮງງານ.

ອີງຕາມລາຍງານຈາກສື່ມວນຊົນຂອງກະຊວງປ້ອງກັນຄວາມສະຫງົບໃຫ້ຮູ້ວ່າ: ບັນຫາດັ່ງກ່າວໄດ້ມີການຫາລືເມື່ອບໍ່ດົນມານີ້ຢູ່ນະຄອນຫລວງວຽງຈັນລະຫວ່າງ ທ່ານ ພົນໂທ ວິໄລ ຫລ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານ ອູຊາວຢາງ ປະທານບໍລິສັດກໍ່ສ້າງອຸດສາຫະກໍາເຄມີມະຫາສະມຸດຈໍາກັດ ສປຈີນ, ໂດຍປະທານບໍລິສັດດັ່ງກ່າວໄດ້ສະເໜີຫລາຍໂຄງການຮ່ວມມືກັບກະຊວງປ້ອງກັນຄວາມສະຫງົບ, ເພື່ອເປັນການສ້າງວຽກເຮັດງານທໍາໃຫ້ນັກໂທດຢູ່ລາວໃນຂະແໜງກະສິກໍາ ແລະ ອຸດສາຫະກໍາເປັນຕົ້ນ: ໂຄງການປູກໝາກໄມ້ໃຫ້ໝາກ, ໂຮງງານຜະລິດເກີບ, ການຜະລິດເຄື່ອງຫັດຖະກໍາ-ເຟີນີເຈີ້, ໂຮງງານຕັດຫຍີບແລະໂຮງງານອື່ນໆທີ່ເຫັນວ່າແທດເໝາະກັບສະພາບຕົວຈິງຢູ່ ສປປ ລາວ, ໂດຍບໍລິສັດຈະລົງທຶນ 100%. ສ່ວນຝ່າຍລາວແມ່ນເປັນທີ່ດິນແລະຄັດເລືອກເອົານັກໂທດຊັ້ນດີແລະມີຄວາມດຸໝັ່ນໃນທົ່ວປະເທດມາເປັນກໍາລັງແຮງງານໃນໂຮງຈັກ-ໂຮງງານຕ່າງໆ, ໂດຍມີເງິນເດືອນແລະນະໂຍບາຍຕ່າງໆຕາມລະບຽບກົດໝາຍຂອງ ສປປ ລາວ ກໍານົດ.

ໃນໂອກາດນີ້, ທ່ານລັດຖະມົນຕີກະຊວງປ້ອງກັນຄວາມສະຫງົບໄດ້ຕີລາຄາສູງຕໍ່ຄວາມສົນໃຈຂອງປະທານບໍລິສັດດັ່ງກ່າວ, ເຊິ່ງເຫັນວ່າເປັນໂຄງການທີ່ດີທີ່ຈະຊ່ວຍສ້າງວຽກເຮັດງານທໍາ ແລະ ລາຍຮັບໃຫ້ນັກໂທດຢູ່ລາວ, ພ້ອມທັງຫວັງວ່າຈະໄດ້ຮ່ວມມືຈັດຕັ້ງປະຕິບັດຢ່າງເປັນຮູບປະທໍາໃນຕໍ່ໜ້າ.