ໃນວັນທີ 11-12 ມັງກອນ ນີ້, ສູນວັດທະນະທໍາຈີນ ປະຈໍາລາວ ຮ່ວມກັບ ພະແນກວັດທະນະທໍາ ວິທະຍຸ, ໂທລະພາບ ແລະ ການທ່ອງທ່ຽວ ນະຄອນເສິງຕູ່ ສປ ຈີນ ໄດ້ຈັດງານ “ບຸນມະໂຫລານ ເທດສະການກຸດຈີນ” ປະຈໍາປີ 2020 ຂຶ້ນຢ່າງຍິ່ງໃຫຍ່ ຢູ່ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ, ໂດຍໄດ້ຮັບຄວາມສົນໃຈຈາກມວນຊົນຊາວນະຄອນຫຼວງວຽງຈັນ ແລະ ຊາວຈີນເປັນຈໍານວນຫຼາຍ.

ງານ “ບຸນມະໂຫລານ ເທດສະການກຸດຈີນ” ໄດ້ເລີ່ມຈັດຢູ່ລາວແຕ່ປີ 2015 ເປັນຕົ້ນມາ ແລະ ນັບມື້ໄດ້ຮັບຄວາມນິຍົມສູງຈາກມວນຊົນ ຈົນກາຍເປັນງານບຸນທີ່ສໍາຄັນ ເພື່ອໃຫ້ຊາວລາວ ແລະ ຊາວຈີນອາໄສຢູ່ລາວ ໄດ້ສໍາຜັດກັບວັດທະນະທໍາປະເພນີຈີນອີກງານໜຶ່ງ ແລະ ທັງເປັນການຊົມເຊີຍຕໍ່ຜົນສໍາເລັດອັນຈົບງາມຂອງປີທ່ອງທ່ຽວ ລາວ-ຈີນ 2019 ຜ່ານມາ ແລະ ເປັນການເປີດສັກກະຫຼາດໃໝ່ແຫ່ງການຮ່ວມມືແລກປ່ຽນວັດທະນະທໍາ ແລະ ທ່ອງທ່ຽວ ລາວ-ຈີນອີກດ້ວຍ.

ໃນງານໄດ້ມີການວາງສະແດງອາຫານຈີນ ແລະ ການສາຖິດເຕັກນິກ ການປຸງແຕ່ງອາຫານຈີນຢ່າງມີຊີວິດຊີວາ ແລະ ສີສັນງົດງາມ ຈາກພໍ່ຄົວທີ່ມີຊື່ສຽງຂອງຈີນ, ພ້ອມມີງານວາງສະແດງຮູບແຕ້ມນໍ້າຕານ, ຮູບແຕ້ມເປືອກໄຂ່, ການປັ້ນຕຸກກະຕາແປ້ງ, ໜັງປະລັດຕື້ ແລະ ອື່ນໆ ທີ່ເປັນປະເພນີພື້ນເມືອງຂອງຈີນ ແລະ ສໍາຜັດຢ່າງໃກ້ຊິດກັບວັດທະນະທໍາພື້ນເມືອງດັ່ງກ່າວ ພ້ອມສີມືທີ່ລະອຽດປານີດຂອງນາຍຊ່າງຜູ້ສືບທອດມໍລະດົກວັດທະນະທໍານາມມະທໍາຂອງຈີນ, ນອກນີ້, ຍັງມີການເຊີດສິງໂຕ,  ການສະແດງສິລະປະວັດທະນະທໍາ ທີ່ເຕັມໄປດ້ວຍເອກະລັກຂອງຈີນ ເປັນຕົ້ນ ຫຼິ້ນງິ້ວ, ບົດຟ້ອນ, ຮ້ອງເພງ, ກາຍະສິນ, ວູຊູ, ມາຍາກົນ ແລະ ອື່ນໆ ຈາກນັກສະແດງໂຮງຮຽນວັດທະນະທໍາ ແລະ ສິລະປະ ນະຄອນເສິງຕູ່, ຫຼິ້ນເກມແບບພື້ນເມືອງຂອງຈີນ, ທວາຍຄໍາທວາຍ ແລະ ກິດຈະກໍາອື່ນໆອີກຢ່າງຫຼວງຫຼາຍ. ພິເສດໃນງານດັ່ງກ່າວຍັງມີການຈົກສະຫຼາກ ຊີງຂອງລາງວັນໃຫຍ່ ເຊິ່ງເປັນຜະລິດຕະພັນຮຸ່ນໃໝ່ຫຼ້າສຸດຈາກ ຫົວເຫວີຍ ແລະ ອັອບໂປ້ອີກດ້ວຍ.