ສະຫະພາບເອີຮົບ-ຈີນ ບໍ່ສົນໃຈ ທຣຳ ກຽມຖະແຫລງ ຈຸດຢືນເດີນໜ້າຂໍ້ຕົກລົງຫລຸດໂລກຮ້ອນ
ຜູ້ນຳຈີນ ແລະ ສະຫະພາບເອີຣົບ ກຽມລົງນາມໃນຖະແຫລງການຮ່ວມຂໍ້ຕົກລົງປາຣີວ່າດ້ວຍການປ່ຽນແປງສະພາບອາກາດໃນກອງປະຊຸມສຸດຍອດຢູ່ນະຄອນຫລວງບຣຸກແຊນຂອງແບນຊິກໃນວັນທີ 2 ມິຖຸນານີ້ ເຊິ່ງເປັນການເຄື່ອນໄຫວທີ່ຖືກເບິ່ງຈາກຫລາຍຝ່າຍວ່າ: ເປັນການຫັກໜ້າຜູ້ນຳອາເມລິກາ ທີ່ກຽມປະກາດຈຸດຢືນຄາດວ່າຈະພາອາເມລິກາຖອນຕົວອອກຈາກຂໍ້ຕົກລົງນີ້.
ຮ່າງເອກະສານຂໍ້ຕົກລົງລະຫວ່າງຜູ້ນຳຈີນ ແລະ ສະຫະພາບເອີຣົບ ທີ່ຈະເຜີຍແຜ່ໃນວັນທີ 2 ມິຖຸນານີ້ ເນັ້ນເຖິງຄວາມມຸ່ງໝັ້ນທາງການເມືອງລະດັບສູງທີ່ຈະເຮັດໃຫ້ຂໍ້ຕົກລົງເກີດຂຶ້ນແທ້ໃນທາງປະຕິບັດ ໂດຍການເຄື່ອນໄຫວດັ່ງກ່າວຖືກເບິ່ງຢ່າງກວ້າງຂວາງວ່າເປັນການປະຕິເສດແນວທາງຂອງອາເມລິກາ. ຖ້າປະທານາທິບໍດີ ໂດນັນ ທຣຳ ປະກາດຈຸດຢືນໃຫ້ອາເມລິກາຖອນຕົວອອກຈາກຂໍ້ຕົກລົງປາຣີ.
ເປັນເວລາກວ່າໜຶ່ງປີ ທີ່ຈີນ ແລະ ສະຫະພາບເອີຣົບ ພະຍາຍາມຫາລືແບບນອກຮອບ ເພື່ອບັນລຸຂໍ້ຕົກລົງໃນຖະແຫລງການຮ່ວມກ່ຽວກັບການປ່ຽນແປງສະພາບອາກາດ ແລະ ພະລັງງານທີ່ສະອາດ ໂດຍເອກະສານດັ່ງກ່າວເນັ້ນເຖິງອັນຕະລາຍຂອງອຸນຫະພູມໂລກທີ່ສູງຂຶ້ນວ່າ: ເປັນບັນຫາຄວາມໝັ້ນຄົງແຫ່ງຊາດ ແລະ ເປັນປັດດໄຈເລັ່ງໃຫ້ເກີດຄວາມບອບບາງທາງສັງຄົມ ແລະ ການເມືອງ ລວມທັງຊີ້ໃຫ້ເຫັນວ່າ: ການປ່ຽນຜ່ານໄປສູ່ພະລັງງານທີ່ສະອາດຈະຊ່ວຍສ້າງວຽກ ແລະ ຄວາມຈະເລີນເຕີບໃຫຍ່ທາງເສດຖະກິດ.
ຮ່າງຖະແຫລງການຮ່ວມຍັງລະບຸວ່າ: ສະຫະພາບເອີຣົບ ແລະ ຈີນເບິ່ງວ່າຂໍ້ຕົກລົງປາຣີເປັນຜົນສຳເລັດຄັ້ງປະຫວັດສາດ ເຊິ່ງຈະຊ່ວຍເລັ່ງໃຫ້ເກີດການປ່ອຍແກັສເຮືອນແກ້ວໃນລະດັບຕໍ່າລົງ ແລະ ເດີນໜ້າການພັດທະນາເພື່ອຟື້ນຟູສະພາບອາກາດ.
ຈາກຖະແຫລງການຮ່ວມນີ້ ທັງສະຫະພາບເອີຣົບ ແລະ ຈີນໄດ້ກຳນົດເປົ້າໝາຍວ່າຈະພະຍາຍາມປະຕິບັດຕາມແຜນການຫລຸດແກັສກາກບອນໃຫ້ຫລາຍຂຶ້ນ ແລະ ຈະວາງມາດຕະການໄລຍະຍາວ ເພ່ືອການປ່ອຍມົນລະພິດໃນລະດັບຕໍ່າໃຫ້ໄດ້ພາຍໃນປີ 2020.
ຖະແຫລງການຮ່ວມຂອງສະຫະພາບເອີຣົບ ແລະ ຈີນຍັງຄວບຄຸມເຖິງການຮ່ວມມືພັດທະນາ ແລະ ເຊື່ອມໂຍງຕະຫລາດການຄ້າກາກບອນ, ການກຳນົດຊະນິດຂອງພະລັງງານ, ມາດຕະຖານການໃຊ້ພະລັງງານ ແລະ ມາດຕະຖານການໃຊ້ພະລັງງານຂອງອາຄານນຳອີກ.
ການເຄື່ອນໄຫວໃໝ່ຈາກສະຫະພາບເອີຣົບ ແລະ ຈີນ ໄດ້ຮັບສຽງຕອບຮັບຢ່າງອົບອຸ່ນຈາກນັກປຸກລະດົມດ້ານສິ່ງແວດລ້ອມ ເຊິ່ງພວມກັງວົນກັບຄວາມເປັນໄປໄດ້ທີ່ປະເທດຜູ້ປ່ອຍກາກບອນອັນດັບ 2 ຂອງໂລກພວມຈະຖອນຕົວ ໂດຍທ່ານ ລີ່ ຊູ ຈາກກຣີນພືດ ກ່າວວ່າ: ຄູ່ເຈລະຈານີ້ມີປະສິດທິພາບຈະກາຍເປັນຕົວຂັບເຄື່ອນໃໝ່ໃນເວທີການທູດດ້ານສະພາບອາກາດ.
ການຮ່ວມມືທີ່ເພີ່ມຂຶ້ນລະຫວ່າງສະຫະພາບເອີຣົບ ແລະ ຈີນ ມີຂຶ້ນພ້ອມກັບທ່າທີຂອງອາເມລິກາ ທີ່ພວມເມີນເສີຍຕໍ່ຂໍ້ຕົກລົງປາຣີ. ສື່ອາເມລິກາອ້າງແຫລ່ງຂ່າວຫລາຍແຫ່ງທີ່ເປີດເຜີຍວ່າ: ປະທານາທິບໍດີ ທຣຳ ພວມຈະໃຫ້ອາເມລິກາຖອນຕົວຈາກຂໍ້ຕົກລົງ ເຊິ່ງທ່ານ ທຣຳ ກໍເຄີຍກ່າວວ່າຈະປະກາດຈຸດຢືນໃນວັນທີ 2 ມິຖຸນານີ້ ຕາມເວລາຢູ່ລາວ.
ຄວາມຄືບໜ້ານີ້ມີຂຶ້ນພາຍຫລັງປະທານາທິບໍດີອາເມລິກາ ບໍ່ສາມາດຫາຈຸດຢືນຮ່ວມກັບຜູ້ນຳປະເທດອື່ນໃນກອງປະຊຸມສຸດຍອດ G7 ຢູ່ເກາະຊິຊິລີໄດ້.
