ລາຄານ້ຳມັນດິບເພີ່ມຂຶ້ນກວ່າ 4% ຮັບຂ່າວອີຣານຖະຫລົ່ມຖານທັບອາເມລິກາ
ລາຄານ້ຳມັນດິບເວສເທັກຊັສ ເພີ່ມຂຶ້ນກວ່າ 4% ໃນການຊື້ຂາຍທາງເອເລັກໂຕຣນິກ ຕອນເຊົ້າວັນທີ 8 ມັງກອນນີ້ ຫລັງຈາກອີຣານເປີດສາກຍິງລູກສອນໄຟຖະຫລົ່ມຖານທັບອາກາດອາເມລິກາໃນອີຣັກ ເພື່ອຕອບໂຕ້ອາເມລິກາສັງຫານຜູ້ບັນຊາການທະຫານຄົນສຳຄັນຂອງອີຣານ.
ເມື່ອເວລາ 08:04 ໂມງ ຕາມເວລາຢູ່ລາວ ສັນຍານ້ຳມັນດິບເວສເທັກຊັສ ສົ່ງມອບເດືອນກຸມພາ ເຊິ່ງມີການຊື້ຂາຍທີ່ຕະຫລາດໄນເມັກເພີ່ມຂຶ້ນ 2,74 ໂດລາ ຫລື 4,37% ບັນລຸ 65,44 ໂດລາຕໍ່ບາເຣລ.
ສ່ວນລາຄາຄໍາໃນຕະຫລາດເພີ່ມສູງເຖິງ 1.588,13 ໂດລາສະຫະລັດຕໍ່ອອນ ໃນໄລຍະໜຶ່ງຂອງການຊື້ຂາຍວັນທີ 6 ມັງກອນ. ຖືເປັນສະຖິຕິສູງສຸດນັບແຕ່ເດືອນເມສາ 2013 ເຊິ່ງການກວາດຊື້ຄຳທີ່ຖືເປັນໜຶ່ງໃນ “ສິນຊັບປອດໄພ” ຂອງບັນດານັກລົງທຶນທົ່ວໂລກ ຍິ່ງບົ່ງບອກເຖິງຄວາມກັງວົນຂອງຕະຫລາດທີ່ມີຕໍ່ສະຖານະການໃນຕາເວັນອອກກາງ ເຊິ່ງເຄັ່ງຕຶງສູ່ລະດັບສູງສຸດໃນຮອບຫລາຍທົດສະວັດ ຈາກການທີ່ກອງທັບອາເມລິກາໂຈມຕີທາງອາກາດໃກ້ສະໜາມບິນນາໆຊາດແບກແດດ ໃນວັນທີ 2 ມັງກອນ ສັງຫານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດ “ຄຸດສ໌” ຂອງກອງກຳລັງພິທັກປະຕິວັດອີຣານ (IRGC) ແລະ ທ່ານ ອາບູ ມາດີ ອັລ-ມູຮັນດິສ ຮອງຜູ້ບັນຊາການກອງກຳລັງຮັດ ຫລື PMF ເຊິ່ງເປັນເຄືອຂ່າວນັກຮົບຊີອະໃນອີຣັກທີ່ມີຄວາມໃກ້ຊິດກັບອີຣານ.
