ເຮືອບິນໂບອິ້ງ 737 ຕົກໃນອີຣານຜູ້ໂດຍສານເສຍຊີວິດທັງໝົດ
ໃນເຊົ້າວັນທີ 8 ມັງກອນນີ້, ເກີດເຫດເຮືອບິນ ໂບອິ້ງ 737 ຕົກຢູ່ອີຣານ ເຮັດໃຫ້ຜູ້ໂດຍສານ ແລະ ຈຸບິນເສຍຊີວິດທັງໝົດ.
ໂຄສົກປະຈຳອົງການການບິນພົນລະເຮືອນອີຣານ ກ່າວວ່າ: ຜູ້ໂດຍສານມີຢ່າງໜ້ອຍ 180 ຄົນ ເສຍຊີວິດທັງໝົດ.
ສຳນັກຂ່າວ ISNA ຂອງອີຣານ ລາຍງານວ່າ: ເຮືອບິນໂບອິ້ງ 737-800 ລຳດັ່ງກ່າວ ເປັນຂອງສາຍການບິນ ອູແກຣນ ແອລາຍ ທີ່ພວມມຸ່ງໜ້າສູ່ນະຄອນຫລວງກຽບ ປະເທດອູແກຣນ. ພ້ອມລະບຸວ່າ: ເຫດການຄັ້ງນີ້ເກີດຂຶ້ນຈາກຂໍ້ຜິດພາດທາງເຕັກນິກ.
ຂໍ້ມູນຈາກເວັບໄຊ FlightRadar24 ລະບຸວ່າ: ຖ້ຽວບິນ PS752 ຂອງເຮືອບິນໂບອິ້ງລຳດັ່ງກ່າວ ອອກເດີນທາງຈາກສະໜາມບິນນາໆຊາດເຕຮາລານ ອິມາມ ໂຄໄມນີ ໃນນະຄອນຫລວງເຕຮາລານ ເມື່ອເວລາ 9:12 ໂມງ ກ່ອນຈະຂາດການຕິດຕໍ່ນັບແຕ່ເວລາ 9:14 ກ່ອນຈະມີລາຍງານເຫດເຮືອບິນຕົກໃນເວລາຕໍ່ມາ.
ເຫດເຮືອບິນຕົກຄັ້ງນີ້ ເກີດຂຶ້ນໃນໄລຍະທີ່ການພົວພັນທາງການເມືອງລະຫວ່າງ ອີຣານ-ອາເມລິກາ ຢູ່ໃນສະພາບເຄັ່ງຕຶງ, ຫລັງຈາກປະທານາທິບໍດີ ໂດນັລ ທຣຳ ອອກຄຳສັ່ງລອບສັງຫານ ພົນຕີ ກັສເຊັມ ໂຊໄລມານີ ນາຍທະຫານລະດັບສູງຂອງອີຣານ, ກ່ອນທີ່ສຳນັກງານບໍລິຫານການບິນແຫ່ງຊາດອາເມລິກາຈະປະກາດໃຫ້ສາຍການບິນອາເມລິກາງົດບິນເໜືອນ່ານຟ້າຂອງອີຣານ.
