ໂຮງໝໍມະໂຫສົດ ພ້ອມປັບປຸງຕົນເອງ ເພື່ອການບໍລິການປິ່ນປົວທີ່ມີຄຸນນະພາບສູງ

ໃນໂອກາດພິທີມອບ-ຮັບ ສາລາພັກເຊົາພີ່ນ້ອງຄົນເຈັບຢູ່ທີ່ໂຮງໝໍມະໂຫສົດ ນະຄອນຫຼວງວຽງຈັນ, ໃນວັນທີ 30 ທັນວາ ນີ້, ລະຫວ່າງ ທ່ານ ສົມສະຫວາດ ເລັ່ງສະຫວັດ ທີ່ປຶກສາລັດຖະບານ, ອະດີດຮອງນາຍົກ ລັດຖະມົນຕີ, ປະທານຄະນະທີ່ປຶກສາ ສະໂມສອນກ໊ອບ ອາວຸໂສລາວ ແລະ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ເພື່ອເປັນການຫຼຸດຜ່ອນຄວາມແອອັດ ແລະ ອຳນວຍຄວາມສະດວກໃຫ້ແກ່ພີ່ນ້ອງຄົນເຈັບທີ່ມາເຝົ້າຄົນເຈັບຢູ່ໂຮງໝໍມະໂຫສົດ ໃຫ້ມີບ່ອນພັກເຊົາ, ບ່ອນນັ່ງຫຼິ້ນ ທີ່ກວ້າງຂວາງສາມາດຮອງຮັບຜູ້ມາເບິ່ງແຍງຢຽມຢາມຄົນເຈັບໄດ້ເພີ່ມຂຶ້ນ.

ຊຶ່ງສາລາດັ່ງກ່າວເປັນການລະດົມທຶນຈາກສະມາຊິກຂອງສະໂມສອນກ໊ອບອາວຸໂສລາວ ລວມມູນຄ່າການກໍ່ສ້າງຫຼາຍກວ່າ  40 ລ້ານກວ່າກີບ ແລະ ໃນໂອກາດນີ້, ທ່ານ ພິສິດ ພຸດສະຫວັດ ຜູ້ອໍານວຍການໃຫຍ່ ໂຮງໝໍມະໂຫສົດ ໃຫ້ສໍາພາດນັກຂ່າວໜັງສືພິມ ລາວພັດທະນາ ພວກເຮົາວ່າ: ປັດຈຸບັນ ໂຮງໝໍມະໂຫສົດ ຢູ່ໃນໄລຍະການຈັດຕັ້ງປະຕິບັດໂຄງການ ຊ່ວຍເຫຼືອຂອງລັດຖະບານຈີນ ເພື່ອກໍ່ສ້າງໂຮງໝໍຂະໜາດ 600 ຕຽງ, ຊຶ່ງຄາດວ່າຈະໃຫ້ສໍາເລັດການກໍ່ສ້າງພ້ອມທັງເປີດໃຫ້ບໍລິການເຕັມຮູບແບບໃນທ້າຍປີ 2021. ດັ່ງນັ້ນໃນປັດຈຸບັນ ທາງໂຮງໝໍກໍໄດ້ມີການປັບປຸງການບໍລິການ ແລະ ຊັບຊ້ອນສະຖານທີ່ເຮັດວຽກໃໝ່ບາງອັນ ເພື່ອຮັບປະກັນໃຫ້ການບໍລິການສັງຄົມໄດ້ສະດວກສະບາຍ ໂດຍສະເພາະ ໄດ້ເປີດສູນການແພດໂປຼຄລີນິກ ບໍລິການກວດ, ບົ່ງມະຕິ ແລະ ປິ່ນປົວພະຍາດ ຕະຫຼອດ 24 ຊົ່ວໂມງ (ບໍລິການກວດເຂດນອກ) ໄປຄຽງຄູ່ກັບຄົນເຈັບສຸກເສີນ ຊຶ່ງເມື່ອກ່ອນຈະເປີດໃຫ້ບໍລິການສະເພາະໃນໂມງລັດສະການເທົ່ານັ້ນ ແລະ ເຫັນວ່າປະຊາຊົນມາໃຊ້ບໍລິການເພີ່ມຂຶ້ນ.

ທ່ານ ອໍານວຍການ ໃຫ້ຮູ້ອີກວ່າ: ເພື່ອກະກຽມໃຫ້ແກ່ໂຮງໝໍຫຼັງໃໝ່ ທີ່ຈະໄດ້ເປີດໃຫ້ບໍລິການໃນໄວໆນີ້, ທາງໂຮງໝໍກໍໄດ້ມີການກະກຽມຄວາມພ້ອມຫຼາຍດ້ານ ຄື: ອາຄານສະຖານທີ່, ອຸປະກອບການແພດທີ່ທັນສະໄໝ ແລະ ຄວາມພ້ອມຂອງບຸກຄະລາກອນໃນແຕ່ລະຂະແໜງການໃຫ້ມີຄວາມສາມາດ ດໍາເນີນການຮ່ວມມືກັບ ຊ່ຽວຊານ ແລະ ແພດໝໍ ສປ ຈີນ ໃຫ້ມີຄວາມເຂັ້ມແຂງ. ນອກນີ້ຍັງໄດ້ກໍານົດວິໄສທັດ, ພັນທະກິດ ແລະ ກໍານົດຍຸດທະສາດ ເພື່ອເຮັດໃຫ້ການພັດທະນາບັນລຸຕາມນະໂຍບາຍຂອງກະຊວງສາທາລະນະສຸກວາງອອກ ກໍຄືນະໂຍບາຍຮັບຮອງຄຸນນະພາບການບໍລິການສຸຂະພາບ 5 ດີ 1 ພໍໃຈ ໃຫ້ປະກົດຜົນເປັນຈິງ.

ຄຽງຄູ່ກັນນີ້, ທາງດ້ານວິຊາການກໍໄດ້ພັດທະນາ ໂດຍສະເພາະແມ່ນການຜ່າຕັດຜ່ານທໍ່ ແລະ ຜ່າຕັດປ່ຽນວາວຫົວໃຈໄດ້, ນີ້ເປັນສິ່ງທີ່ໄດ້ພັດທະນາຂຶ້ນມາຄຽງບ່າຄຽງໄລ່ກັບບັນດາປະເທດເພື່ອບ້ານ, ດັ່ງນັ້ນພວກເຮົາພ້ອມແລ້ວທີ່ຈະເຂົ້າໄປຢູ່ໂຮງໝໍໃໝ່ ເພື່ອເຮັດໃຫ້ແຕ່ລະຂະແໜງເປັນສູນການແພດ ແລະ ເປັນຕົວແບບໃຫ້ແກ່ບັນດາໂຮງໝໍຕ່າງໆຢູ່ໃນລາວ. ເພື່ອຫຼຸດຜ່ອນການໄປປິ່ນປົວຢູ່ປະເທດເພື່ອນບ້ານ, ຊຶ່ງໄດ້ວາງແຜນ ໂດຍເອົາຄົນເຈັບເປັນຈຸດສູນກາງໃຫ້ແກ່ການບໍລິການ ແລະ ປະຊາຊົນມີທາງເລືອກໃນການບໍລິການປິ່ນປົວ ໂດຍສາມາດເລືອກທ່ານໝໍ ຫຼືພະຍາບານ ທີ່ຕົນເອງມັກ ແລະ ຢາກປິ່ນປົວນໍາໄດ້.