ຮອງນາຍົກ ບຸນທອງ ຈິດມະນີ ເນັ້ນຫລາຍບັນຫາໃຫ້ຄະນະຮັບຜິດຊອບສ້າງທາງລົດໄຟລາວ-ຈີນ ຢູ່ແຂວງຫລວງພະບາງຮີບຮ້ອນແກ້ໄຂ
ໃນໂອກາດເຄື່ອນໄຫວຕິດຕາມ ແລະ ຊຸກຍູ້ວຽກງານກໍ່ສ້າງເສັ້ນທາງລົດໄຟລາວ-ຈີນ ຢູ່ບັນດາແຂວງພາກເໜືອ ເມື່ອບໍ່ດົນມານີ້ ຂອງທ່ານຮອງນາຍົກລັດຖະມົນຕີ ບຸນທອງ ຈິດມະນີ ທັງເປັນປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ເປັນຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟ ລາວ-ຈີນ ແລະ ທ່ານຮອງນາຍົກ ໄດ້ຮັບຟັງລາຍງານຈາກຄະນະຮັບຜິດຊອບໂຄງການກໍ່ສ້າງທາງລົດໄຟຜ່ານແຂວງດັ່ງກ່າວວ່າ: ທາງລົດໄຟ ລາວ-ຈີນ ສະເພາະຜ່ານແຂວງຫລວງພະບາງມີຄວາມຍາວ 80 ກິໂລແມັດ ໂດຍຜ່ານ 2 ເມືອງ 1 ນະຄອນ ແລະ 28 ບ້ານ, ມີຄອບຄົວຖືກຜົນກະທົບທີ່ໄດ້ປະກອບເອກະສານຢັ້ງຢືນເພື່ອເບີກຈ່າຍຄ່າຊົດເຊີຍລວມມີມູນຄ່າທັງໝົດ 98,5 ຕື້ກວ່າກີບ. ມາຮອດປັດຈຸບັນໄດ້ຮັບງົບປະມານຈາກໂຄງການ ແລະ ລັດຖະບານໃນ 2019 ທັງໝົດ 4 ງວດ ແລະ ໄດ້ເບີກຈ່າຍໃຫ້ຜູ້ໄດ້ຮັບຜົນກະທົບແລ້ວຈໍານວນ 18 ບ້ານ, 337 ຄອບຄົວ ຕົກເປັນມູນຄ່າກວ່າ 70 ຕື້ກີບ ເທົ່າກັບ 75% ຂອງມູນຄ່າຊົດເຊີຍ ແລະ ສ່ວນທີ່ຍັງຄ້າງກວ່າ 24 ຕື້ກີບ ເຊິ່ງຈະໄດ້ຊຸກຍູ້ໃຫ້ເຂົາເຈົ້າເລັ່ງປະກອບເອກະສານໃຫ້ຄົບຖ້ວນເພື່ອເບີກຈ່າຍໃຫ້ສໍາເລັດຕາມກໍານົດເວລາ.
ໃນໂອກາດນີ້, ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມຊີ້ນໍາ ໂດຍເນັ້ນໃຫ້ຄະນະຮັບຜິດຊອບສືບຕໍ່ເອົາໃຈໃສ່ບາງບັນຫາສໍາຄັນຄື: ໃຫ້ຮີບຮ້ອນປຶກສາຫາລືກ່ຽວກັບວິທີການແກ້ໄຂການກໍ່ສ້າງຂົວ ແລະ ທາງໃນໄລຍະທີ່ບໍລິສັດຂອງລາວໄດ້ຮັບມາປະຕິບັດທີ່ເຫັນວ່າມີຄວາມຊັກຊ້າ, ພ້ອມທັງກວດຄືນຈຸດທີ່ຍັງຄ້າງຄາ, ບໍ່ຄ່ອງຕົວ ແລະ ບໍ່ລົງລອຍກັນ ໃຫ້ກວດການັບແຕ່ສັນຍາຮັບເໝົາກັບບໍລິສັດແມ່ ໂດຍເກັບກໍາຂໍ້ມູນ, ວິເຄາະວິໄຈ ຫາເຫດຜົນແທ້ຈິງ ເພື່ອພ້ອມກັນແກ້ໄຂໃຫ້ລຸລ່ວງໄປດ້ວຍດີ ເພື່ອຮັບປະກັນໃຫ້ການກໍ່ສ້າງດໍາເນີນໄປຕໍ່ເນື່ອງ. ສໍາລັບບັນຫາການຊົດເຊີຍຜົນກະທົບຕ່າງໆກໍໃຫ້ມີຄວາມເໝາະສົມເປັນທໍາ, ສ່ວນການສ້າງເຮືອນຈັດສັນໃໝ່ໃຫ້ປະຊາຊົນແມ່ນໃຫ້ກວດຄືນການອອກແບບ ເພື່ອໃຫ້ສອດຄ່ອງກັບເງື່ອນໄຂ ແລະ ວິຖີຊີວິດຂອງປະຊາຊົນ, ທັງສະດວກຕໍ່ການຄຸ້ມຄອງຂອງອໍານາດການປົກຄອງທ້ອງຖິ່ນ ແລະ ຕິດພັນກັບການປົກປັກຮັກສາສະພາບແວດລ້ອມ ແລະ ສ້າງຄວາມສະດວກໃຫ້ແກ່ການດໍາລົງຊີວິດ ແລະ ທໍາມາຫາກິນຂອງປະຊາຊົນໄດ້ດີຂຶ້ນ.
