10 ເຫດການການເມືອງພົ້ນເດັ່ນຢູ່ປະເທດເຮົາໃນປີ 2019
ປີ 2019 ເປັນປີທີ່ມີຫລາຍເຫດການທາງການເມືອງຢູ່ປະເທດເຮົາ ຊຶ່ງ ໜັງສືພິມລາວພັດທະນາ ໄດ້ຄັດຈ້ອນເອົາ 10 ເຫດການທີ່ພົ້ນເດັ່ນມາສະເໜີຄື:
1. ພິທີເປີດປີທ່ອງທ່ຽວ ລາວ-ຈີນ 2019 ໄດ້ຈັດຂຶ້ນໃນວັນທີ 25 ມັງກອນ ທີ່ຫໍວັດທະນະທຳແຫ່ງຊາດ ເພື່ອສ້າງເງື່ອນໄຂສະດວກໃຫ້ແກ່ປະຊາຊົນສອງຊາດໄດ້ມີໂອກາດໄປມາຫາສູ່ຢ້ຽມຢາມເຊິ່ງກັນ ແລະ ກັນ ທັງເປັນການສ້າງຄວາມຮັບຮູ້ທາງດ້ານປະເພນີ, ວັດທະນະທຳ ແລະ ການພັດທະນາເສດຖະກິດ-ສັງຄົມຂອງແຕ່ລະປະເທດອີກດ້ວຍ.
2. ໃນທ້າຍເດືອນມັງກອນ, ບໍລິສັດ ໂລສບາລາໂບນ ເອັກສະປອດ ຂອງຣັດເຊຍ ໄດ້ມອບຍົນລຸ້ນຍັກ 130 ຈຳນວນ 4 ລຳ ໃຫ້ກອງທັບປະຊາຊົນລາວ ເພື່ອນຳໃຊ້ເຂົ້າໃນກຳລັງປະກອບອາວຸດຂອງລາວມີຄວາມເຂັ້ມແຂງ, ທັນສະໄໝ ເພື່ອປົກປັກຮັກສາເຂດນ້ຳແດນດິນ ແລະ ນ່ານຟ້າຂອງ ສປປ ລາວ ໄວ້ໄດ້ຢ່າງໝັ້ນຄົງ.
3. ງານສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949 – 20 ມັງກອນ 2019) ໃນພິທີ ທ່ານປະທານປະເທດ ບຸນຍັງ ວໍລະຈິດ ໄດ້ກ່າວສູນທອນພົດວ່າ: ຕະຫລອດໄລຍະ 70 ປີຜ່ານມາ, ກອງທັບປະຊາຊົນລາວ ໄດ້ເຮັດໜ້າທີ່ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ.
4. ໃນວັນທີ 9 ເມສາ ໄດ້ມີພິທີເປີດອະນຸສອນສະຖານທ່ານ ໜູຮັກ ພູມສະຫວັນ ອະດີດການນຳຂັ້ນສູງຂອງລາວ ທີ່ບ້ານສະພານທອງ ເມືອງສີສັດຕະນາກ ນະຄອນຫລວງວຽງຈັນ ເພື່ອເປັນສະຖານມໍລະດົກອັນລ້ຳຄ່າຂອງຊາດ ແລະ ເປັນສະຖານທີ່ທ່ອງທ່ຽວທາງປະຫວັດສາດທີ່ມີຄວາມໝາຍສຳຄັນ ເຊິ່ງກາຍເປັນບ່ອນສຶກສາຮໍ່າຮຽນຂອງພະນັກງານ-ລັດຖະກອນ, ນັກຮຽນຮູ້, ນັກສຶກສາ ແລະ ປະຊາຊົນບັນດາເຜົ່າ ໄດ້ສຶກສາຮຽນຮູ້ແບບແຜນການດຳລົງຊີວິດ, ວິທີເຮັດວຽກ ແລະ ຄຸນສົມບັດສິນທຳປະຕິວັດອັນໃສແຈ້ງຂອງທ່ານ ໜູຮັກ ພູມສະຫວັນ.
5. ກອງປະຊຸມຄັ້ງທີ 8 ຂອງຄະນະບໍລິຫານງານສູນກາງພັກ ສະໄໝທີ 10 ໄດ້ດຳເນີນແຕ່ວັນທີ 6-14 ພຶດສະພາ ພາຍໃຕ້ການເປັນປະທານຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໂດຍກອງປະຊຸມໄດ້ເນັ້ນໃຫ້ທຸກຂະແໜງການສືບຕໍ່ສ້າງການຫັນປ່ຽນໃໝ່ທີ່ຕັ້ງໜ້າ ເພື່ອແກ້ໄຂບັນຫາຄົງຄ້າງຕ່າງໆໃນການພັດທະນາປະເທດ.
6. ກອງປະຊຸມລັດຖະບານເປີດກວ້າງ ຄັ້ງທີ 1 ປີ 2019 ໄດ້ຈັດຂຶ້ນໃນວັນທີ 26-27 ມິຖຸນາ ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ເພື່ອປຶກສາຫາລືການຜັນຂະຫຍາຍມະຕິຂອງກອງປະຊຸມສູນກາງພັກ ແລະ ກອງປະຊຸມສະພາແຫ່ງຊາດ ໂດຍສະເພາະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນການລົງທຶນຂອງລັດ ແລະ ແຜນງົບປະມານແຫ່ງລັດ ປະຈຳປີ 2020.
7. ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ໄດ້ດຳເນີນແຕ່ວັນທີ 5-25 ມິຖຸນາ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ. ກອງປະຊຸມໄດ້ມີມະຕິຮັບຮອງວຽກງານສຳຄັນຂອງລັດຖະບານໃນການຊີ້ນຳບັນດາຂະແໜງການ, ອົງການປົກຄອງທ້ອງຖິ່ນ ແລະ ປະຊາຊົນບັນດາເຜົ່າສູ້ຊົນຜ່ານຜ່າຂໍ້ຫຍຸ້ງຍາກທາງດ້ານເສດຖະກິດ-ການເງິນ ແລະ ໄດ້ຮັບຮອງເອົາການແຕ່ງຕັ້ງທ່ານ ວິດົງ ໄຊຍະສອນ ເປັນລັດຖະມົນຕີປະຈຳສຳນັກງານນາຍົກ ແລະ ຮັບຮອງເອົາທ່ານ ຄຳພາ ແສງດາຣາ ເປັນປະທານສານປະຊາຊົນສູງສຸດ ຕາມການສະເໜີຂອງນາຍົກລັດຖະມົນຕີ, ພ້ອມທັງໄດ້ຮັບຮອງເອົາການສ້າງ ແລະ ປັບປຸງກົດໝາຍ 10 ສະບັບ.
8. ໃນວັນທີ 10 ກັນຍາ, ກະຊວງຍຸຕິທຳໄດ້ນຳສະເໜີປຶ້ມປະມວນກົດໝາຍອາຍາສະບັບທຳອິດຂອງ ສປປ ລາວ ພາຍຫລັງຮ່ວມມືກັບສະຫະພາບເອີຣົບ (EU) ແລະ ປະເທດລຸກຊຳບວກ ສ້າງປຶ້ມດັ່ງກ່າວຂຶ້ນ ໂດຍໄດ້ປັບປຸງກົດໝາຍອາຍາປີ 2005 ແລະ ກົດໝາຍສະບັບອື່ນໆ ທີ່ກຳນົດການກະທຳຜິດທາງອາຍາ ແລະ ໂທດ ເພື່ອໃຫ້ສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດຂອງປະເທດ ແລະ ສອດຄ່ອງກັບສົນທິສັນຍາສາກົນທີ່ລາວເປັນພາຄີ.
9. ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນແຕ່ວັນທີ 7 ພະຈິກ ຫາ 6 ທັນວາ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໂດຍໄດ້ພິຈາລະນາຄົ້ນຄວ້າຫລາຍບັນຫາສຳຄັນຂອງຊາດ ໂດຍສະເພາະແຜນພັດທະນາເສດຖະກິດ-ສັງຄົມ, ແຜນງົບປະມານ 2019-2020. ກອງປະຊຸມໄດ້ຮັບຮອງເອົາທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຄວບຕຳແໜ່ງລັດຖະມົນຕີກະຊວງແຜນການ ແລະ ການລົງທຶນ ແລະ ຮັບຮອງທ່ານ ກິແກ້ວ ໄຂຄຳພິທູນ ເປັນລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມທັງຮັບຮອງເອົາກົດໝາຍສ້າງໃໝ່ ແລະ ປັບປຸງທັງໝົດ 8 ສະບັບ ແລະ ໄດ້ດຳເນີນການປະເມີນຜົນຄັ້ງທຳອິດຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງ.
10. ສະເຫລີມສະຫລອງວັນມູນເຊື້ອທະຫານອາສາສະໝັກ ແລະ ຊ່ຽວຊານຫວຽດນາມປະຕິບັດໜ້າທີ່ສາກົນຊ່ວຍເຫລືອການປະຕິວັດລາວ ຄົບຮອບ 70 ປີ ໃນວັນທີ 26 ທັນວາ ທີ່ນະຄອນຫລວງວຽງຈັນ. ໃນພິທີ ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດລາວ ໄດ້ຍົກໃຫ້ເຫັນຄຳເວົ້າຂອງປະທານ ໄກສອນ ພົມວິຫານ ອະດີດການນຳສູງສຸດຂອງລາວວ່າ: ການປະຕິວັດລາວສາມາດຍາດເອົາໄຊຊະນະອັນຍິ່ງໃຫຍ່ເປັນຂັ້ນໆມາໄດ້ນັ້ນແມ່ນຍ້ອນມີພັກມາກ-ເລນິນນຳພາ. ກ່ອນໜ້ານີ້ແມ່ນພັກອິນດູຈີນ ເປັນຕົ້ນແມ່ນການພົວພັນອັນແໜ້ນແຟ້ນທີ່ສຸດທີ່ມີລັກສະນະພິເສດລະຫວ່າງພັກເຮົາກັບພັກຄົນງານຫວຽດນາມ, ລະຫວ່າງການປະຕິວັດລາວ ແລະ ການປະຕິວັດຫວຽດນາມ ເປັນພື້ນຖານທີ່ຮັບປະກັນທຸກໄຊຊະນະຂອງການປະຕິວັດລາວ.
ທັງໝົດນີ້ແມ່ນເຫດການດ້ານການເມືອງພົ້ນເດັ່ນໃນປີ 2019 ຜ່ານມາຢູ່ປະເທດເຮົາ ເຊິ່ງໄດ້ສະແດງໃຫ້ເຫັນເຖິງການເອົາໃຈໃສ່ນຳພາປະເທດຂອງພັກ-ລັດຖະບານລາວ ເພື່ອເຮັດໃຫ້ປະຊາຊົນບັນດາເຜົ່າມີຄວາມຜາສຸກ, ປະເທດໄດ້ຮັບການພັດທະນາ ແລະ ບົດບາດຂອງ ສປປ ລາວ ສູງເດັ່ນຂຶ້ນໃນເວທີສາກົນເທື່ອລະກ້າວ.
