ຂ່າວປອມໃນປີ 2019

ລູກເມືອງພວນ

ເມື່ອເວົ້າເຖິງຂ່າວປອມ ບໍ່ສະເພາະມີຢູ່ແຕ່ ສປປ ລາວເທົ່ນນັ້ນ, ບັນຫາຂ່າວປອມໄດ້ກາຍເປັນບັນຫາຂອງທົ່ວໂລກໄປແລ້ວ. ປັດຈຸບັນລັດຖະບານຫຼາຍປະເທດໄດ້ ໄດ້ອອກກົດໝາຍວ່າດ້ວຍການຕ້ານ ແລະ ສະກັດກັ້ນຂ່າວປອມຢ່າງຈິງຈັງ, ໃນນັ້ນບັນດາປະເທດໃນແຖບອາຊີຈະມີກົດໝາຍຕ້ານ ແລະ ສະກັດກັ້ນຂ່າວປອມເປັນປະຈັກຕາຫຼາຍກ່ວາບັນດາປະເທດໃນແຖບຕາເວັນຕົກ ໂດຍສະເພາະຢ່າງຍິ່ງ ແມ່ນບັນດາປະເທດໃນອາຊີຕາເວັນອອກສ່ຽງໃຕ້ ເກືອບວ່າທຸກປະເທດລ້ວນແຕ່ມີກົດໝາຍ ຫຼື ຂໍ້ກຳນົດ ກົດລະບຽບວ່າດ້ວຍການຕ້ານ ແລະ ສະກັດກັ້ນຂ່າວປອມ.

ຂ່າວປອມໄດ້ກາຍເປັນປາກົດການໃໝ່ຂອງໂລກ ເຊິ່ງຫາກໍເກີດມາໄດ້ 4-5 ປີມານີ້. ຂ່າວປອມມີພະລັງມ້າງທີ່ມະຫາສານ ເໝືອນປະລາມະນູທີ່ບໍ່ມີສຽງ, ມັນສາມາດທຳລາຍຄວາມໝັ້ນຄົງແຫ່ງຊາດ ຫຼື ຄວາມປອງດອງຊາດໃນຊົ່ວທິບຕາ. ດັ່ງນັ້ນ, ຂ່າວປອມຈຶ່ງເປັນໄພຂົ່ມຂູ່ທີ່ອັນຕະລາຍຂອງທຸກໆຊາດໃນໂລກ ແລະ ໄດ້ກາຍເປັນອາວຸດອັນແຫຼມຄົມຂອງອິດທິກຳລັງປໍລະປັກຊຶ່ງກັນ ແລະ ກັນ, ຂ່າວປອມຍັງເປັນທັງຍຸດທະສາດ, ທັງເປັນວິທີການ ແລະ ເປັນນະໂຍບາຍທີ່ອັນຕະລາຍທີ່ຄາດບໍ່ເຖິງໃນຍຸກປັດຈຸບັນ.

ໜຶ່ງປີຜ່ານມາຂ່າວປອມ ໄດ້ເກີດຂຶ້ນຢູ່ຫຼາຍປະເທດ ອັນໄດ້ສົ່ງຜົນກະທົບກະເທືອນເຖິງສັນຕິພາບ ແລະ ຄວາມໝັ້ນຄົງຂອງໂລກ, ເຊັ່ນກໍລະນີຂ່າວລືວ່າຈະເກີດສົງຄາມໂລກຄັ້ງທີ່ 3 ລະຫ່ວາງສະຫະລັດ ແລະ ເກົາຫຼີເໜືອຢ່າງແນ່ນອນ, ລະຫ່ວາງຈີນກັບຫວຽດນາມໃນບັນຫາທະເລຈີນໃຕ້, ບັນຫາອີຣານ ກັບສະຫະລັດຈະຕ້ອງເກີດສົງຄາມກັນແນ່ນອນ, ອີຣານກັບ ອິດສະລາແອນ ຫຼື ບັນຫາຕາເວັນອອກກາງຈະເກີດສົງຄາມລຸກເປັນໄຟ ທຳລາຍພິນາດບັນດາຊາດໃນອາຣັບ…ທັງໝົດທັງປວງນັ້ນ ລ້ວນແຕ່ໄດ້ສ້າງກະແສສັ່ນຄອນເຖິງສັນຕິພາບໂລກ ແລະ ຄວາມໝັ້ນຄົງ, ຄວາມບໍ່ໄວ້ວາງໃຈຊຶ່ງກັນ ແລະ ກັນຂອງປະຊາຊາດໃນໂລກ, ແບ່ງແຍກຄວາມສາມັກຄີລະຫ່ວາງ ຕາເວັນອອກ ກັບຕາເວັນຕົກ. ກໍລະນີໃສ່ຮ້າຍປ້າຍສີປະທານາທິບໍດີ ຊາເວດ ເວເນຊູເອລາວ່າ ສໍ້ລາດບັງຫຼວງ ຊຶ່ງນຳໄປເຖິງການປະທ້ວງໂຄ່ນລົ້ມປະທານາທິບໍດີຊາເວດ ອອກຈາກຕຳແໜ່ງ ຫຼື ເຫດການຂອງ ໂບລີເວຍກໍເຊັ່ນດຽວກັນ, ປະທານາທິບໍດີກໍຖືກໂຄ່ນລົ້ມ ແລະ ໄປລີ້ໄພຢູ່ແມັກຊິກໂກ.

ສຳລັບຢູ່ ສປປ ລາວຂອງພວກເຮົາກໍເກີດມີກະແສຂ່າວປອມຂຶ້ນມາເປັນໄລຍະໆ, ອັນໄດ້ສ້າງຄວາມແຕກຕື່ນໃຫ້ສັງຄົມ, ສ້າງຄວາມບໍ່ເຊື່ອໝັ້ນຕໍລັດຖະບານ, ສ້າງກະແສສັບສົນ ແລະ ເຂົ້າໃຈຜິດຂອງປະຊາຊົນຕໍ່ລັດຖະບານ, ໃສ່ຮ້າຍປ້າຍສີວ່າລັດຖະບານລາວຂາຍດິນຂາຍດອນ ຂາຍປະເທດຊາດໃຫ້ຄົນຕ່າງປະເທດໝົດແລ້ວ, ຂົ່ມຂູ່ ແລະ ໄລ່ປະຊາຊົນອອກຈາກແລວທາງລົດໄຟລາວ-ຈີນ ໂດຍບໍ່ມີການໃຊ້ແທນ, ບຸກຄົນໃນລັດຖະບານຢຶດດິນດອນຕ່ອນຫຍ້າມາເປັນຂອງຕົນເອງ, ລັດຖະບານລາວສໍ້ໂກງເອົາຊັບສົມບັດຂອງປະເທດຊາດມາເປັນຂອງຕົນເອງ ປະຊາຊົນຈຶ່ງທຸກຍາກກາກກຳ ຈົນບໍ່ສາມາດລຶບລ້າງຄວາມທຸກຍາກຂອງປະຊາຊົນອອກຈາກສະຖານະຄວາມດ້ອຍພັດທະນາຕາມເປົ້າ, ລັດຖະບານລາວຈົງໃຈເຮັດໃຫ້ເຂື່ອນໄຟຟ້າເຊປຽນ ເຊນໍ້ານ້ອຍ ເມືອງສະໜາມໄຊແຕກຫັກ ເພາະຖືກພວກນາຍທຶນຕ່າງຊາດຊື້ຈ້າງ, ຕູ່ຫາວ່າລັດຖະບານລາວກອບໂກຍເອົາເຄື່ອງຂອງເງິນຄຳທີ່ພີ່ນ້ອງຊາວລາວ ແລະ ຊາວຕ່າງປະເທດໃຫ້ການຊ່ວຍເຫຼືອປະຊາຊົນລາວໃນໄລຍະຜ່ານມາຈົນໝົດ, ໃນໄລຍະລະດູຝົນກໍປ່ອຍຂ່າວອອກມາຢ່າງລຽນຕິດວ່າ: ເຂື່ອນໄຟຟ້າໃນລາວ ມີຫຼານເຂື່ອນບໍ່ໄດ້ມາດຕະຖານ, ມີຫຼາຍເຂື່ອນກຳລັງເກີດຮອຍແຫງ ໂດຍສະເພາະແມ່ນເຂື່ອນນໍ້າຄານ 2. ໃນລະຫ່ວາງໄລຍະກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ກໍມີຂ່າວປ່ອຍອອກມາຢ່າງຄຶກໂຄມ ຈະມີການປັບປຸງຊັບຊ້ອນພະນັກງານການນຳລະດັບສູງຫຼາຍຕຳແໜ່ງ, ຊຶ່ງໃນຂ່າວນັ້ນໄດ້ລະບຸຊື່ບຸກຄົນທີ່ຖືກຈັດວາງ, ໜ້າທີ່, ຕຳແໜ່ງ ແລະ ບ່ອນປະຈຳການຢ່າງຄັກແນ່, ແຕ່ໃນຕົວຈິງແລ້ວ ສະພາສາມາດຮັບຮອງເອົາຢ່າງເປັນທາງການພຽງແຕ່ 2 ຕຳແໜ່ງເທົ່ານັ້ນ, ຊ່ວງລະຫ່ວາງເດືອນກໍລະກົດຫາເດືອນສິງຫາຜ່ານມາ ກໍມີກຸ່ມຄົນບໍ່ດີປ່ອຍຂ່າວອອກມາວ່າ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຖືກລອບສັງຫານ, ຖືກຍິງເຂົ້າໃສ່ກາງຫຼັງສອງນັດ ບາດເຈັບສາຫັດ ຈົນໄດ້ເຂົ້າກູ້ຊີວິດຢູ່ໂຮງໝໍ 103 ທີ່ນະຄອນຫຼວງວຽງຈັນ ຫຼື ຂ່າວປອມວ່າ: ຫວຽດນາມໄດ້ຢຶດເອົາດິນແດນສ່ວນໜຶ່ງຂອງລາວຢູ່ແຂວງຫົວພັນ, ທະຫານກຳປູເຈຍຍິງທະຫານຊາຍແດນຂອງລາວຕາຍ 8 ຄົນ ແລະ ພວກເຂົາສາມາດຢຶດພື້ນທີ່ຂອງລາວໄວ້ໄດ້…

ທັງໝົດທັງປວງນີ້ ລ້ວນແຕ່ແມ່ນກະແສຂ່າວປອມ ເພື່ອສ້າງຄວາມສັບສົນ ແລະ ຄວາມລະແວງສົງໃສຂອງສັງຄົມຕໍ່ພັກ-ລັດຖະບານ, ສ້າງຄວາມບໍ່ເຊື່ອໝັ້ນຂອງປະຊາຊົນຕໍ່ການນຳພັກ-ລັດ, ສ້າງຄວາມແຕກແຍກຄວາມປອງດອງແຫ່ງຊາດ, ສ້າງຄວາມແຕກແຍກຄວາມສາມັກຄີລະຫ່ວາງລາວກັບຕ່າງປະເທດ, ສ້າງຄວາມສົງໄສ ແລະ ບໍ່ໄວ້ວາງໃຈກັນ. ເຮັດໃຫ້ບົດບາດອິດທິພົນຂອງລັດຖະບານລາວຕົກຕໍ່າ ແລະ ຕັດການຊ່ວຍເຫຼືອຈາກຕ່າງປະເທດໃຫ້ ສປປ ລາວ.

ນະໂອກາດນິ້, ພວກເຮົາໃນນາມສື່ມວນຊົນລາວ ສຳນັກຂ່າວໜັງສືພິມ “ລາວພັດທະນາ” ຂໍຮຽກຮ້ອງມາຍັງຜູ້ບໍລິໂພກສື່ທັງຫຼາຍຈົ່ງມີສະຕິລະວັງຕົວ, ມີວິຈາລະຍານ, ຕີລາຄາ ແລະ ເບິ່ງບັນຫາໃຫ້ຖ່ອງແທ້ ດ້ວຍສາຍຕາສັດຈະວິພາກ ແລະ ຄວາມເປັນຈິງ ຢ່າໄດ້ເຮັດຫູເບົາເຊື່ອງ່າຍຂ່າວໃນສື່ອອນລາຍ. ເມື່ອໄດ້ຮັບຂໍ້ມູນຂ່າວສານໃດໆ ກໍຂໍໃຫ້ມີສະຕິໃນການກົດໄລ້, ກົດແຊຣ, ຄອມເມັ້ນ ແລະ ໂຟໂລ…