IMF ຮຽກຮ້ອງອິນເດຍແກ້ໄຂບັນຫາການຂະຫຍາຍຕົວຊ້າຂອງເສດຖະກິດ
ກອງທຶນການເງິນສາກົນ ຫລື IMF ຮຽກຮ້ອງໃຫ້ລັດຖະບານອິນເດຍດຳເນີນການຢ່າງຮີບດ່ວນ ເພື່ອແກ້ໄຂບັນຫາການຂະຫຍາຍຕົວຊ້າທາງເສດຖະກິດ, ຫລັງລາຍງານປະຈຳປີຂອງ IMF ລະບຸວ່າ: ບັນຫາການບໍລິໂພກ ແລະ ການລົງທຶນທີ່ຫລຸດລົງ ລວມທັງລາຍຮັບຈາກພາສີຫລຸດລົງ ແລະ ປັດໄຈອື່ນໆ ກຳລັງເຮັດໃຫ້ເສດຖະກິດຂອງອິນເດຍ ເຊິ່ງເປັນໜຶ່ງໃນປະເທດທີ່ມີເສດຖະກິດເຕີບໃຫຍ່ໄວທີ່ສຸດໃນໂລກ ເກີດສະພາບຂະຫຍາຍຕົວຊ້າ.
IMF ພາກພື້ນອາຊີ ແລະ ປາຊີຟິກ ລະບຸວ່າ: ອິນເດຍ ເຊິ່ງຫາກໍຍົກລະດັບຄົນນັບລ້ານໃຫ້ພົ້ນຈາກຄວາມທຸກຍາກໄດ້ສຳເລັດ ກຳລັງຕົກຢູ່ທ່າມກາງການຂະຫຍາຍຕົວຊ້າທາງເສດຖະກິດ ແລະ ການຈະແກ້ໄຂບັນຫາດັ່ງກ່າວບໍ່ແມ່ນເລື່ອງງ່າຍ ເພາະການຈະກະຕຸ້ນການໃຊ້ຈ່າຍເພື່ອຮອງຮັບການເຕີບໃຫຍ່ຈະຍິ່ງເພີ່ມພາລະໜີ້ ແລະ ພາລະດອກເບ້ຍທີ່ສູງຢູ່ແລ້ວ.
ຂໍ້ມູນຂອງລັດຖະບານອິນເດຍລະບຸວ່າ: ໃນໄລຍະເດືອນກໍລະກົດຫາເດືອນກັນຍາຜ່ານມາ, ເສດຖະກິດຂອງອິນເດຍມີການເຕີບໃຫຍ່ຊ້າທີ່ສຸດໃນຮອບກວ່າຫົກປີ ໂດຍມີການເຕີບໃຫຍ່ພຽງ 4,5% ຈາກ 7% ໃນປີຜ່ານມາ. ຂະນະທີ່ ທະນາຄານກາງໄດ້ປັບຫລຸດການຄາດຄະເນການເຕີບໃຫຍ່ປະຈຳປີລົງເຫລືອ 5% ຈາກທີ່ເຄີຍຄາດຄະເນໄວ້ 6,1% ເນື່ອງຈາກອຸປະສົງຂອງຜູ້ບໍລິໂພກ ແລະ ການຜະລິດທີ່ຫລຸດລົງ.
