ເຜີຍແຜ່ວັນສ້າງຕັ້ງອົງການກາແດງລາວ ຄົບຮອບ 65 ປີ
ໃນວັນທີ 24 ທັນວາ ນີ້, ຄະນະໂຄສະນາອົບຮົມສູນກາງພັກ ຮ່ວມກັບ ອົງການກາແດງລາວ ໄດ້ເຜີຍແຜ່ວັນສ້າງຕັ້ງອົງການກາແດງລາວ ຄົບຮອບ 65 ປີ (01/01/1955-01/01/2019) ໃຫ້ການເຜີຍແຜ່ໂດຍ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ມີ ທ່ານ ຄຳເຈນ ວົງໂພສີ ຮອງຫົວໜ້າຄະນະໂຄສະນາອົບຮົມສູນກາງພັກ, ພ້ອມດ້ວຍພະນັກງານ-ລັດຖະກອນ ເຂົ້າຮ່ວມຢ່າງພ້ອມພຽງ.
ເພື່ອແນໃສ່ເຮັດໃຫ້ພະນັກງານ-ລັດຖະກອນ ພາຍໃນຄະນະໂຄສະນາອົບຮົມສູນກາງພັກ ຮັບຮູ້ເຂົ້າໃຈຢ່າງເລີກເຊິ່ງ ກ່ຽວກັບສິດ, ພາລະບົດບາດ ແລະ ໜ້າທີ່ ຂອງອົງການກາແດງລາວໃຫ້ຫລາຍຂຶ້ນ ໂດຍສະເພາະ ແມ່ນການຮັບບໍລິຈາກເລືອດ ແນໃສ່ປຸກລະດົມໃຫ້ມວນຊົນໃນຂອບເຂດທົ່ວປະເທດ ຫັນມາມີສ່ວນຮ່ວມບໍລິຈາກເລືອດຊ່ວຍເຫລືອສັງຄົມ ກໍຄື ຊ່ວຍເຫລືອຄົນເຈັບທີ່ມີຄວາມຕ້ອງການເລືອດໃຫ້ຫລາຍຂຶ້ນ.
ໃນໂອກາດນີ້, ທ່ານ ຄຳຮຸ່ງ ເຮືອງວົງສີ ໄດ້ຍົກໃຫ້ເຫັນເຖິງ ການຮ່ວມສຳພັນບັນດາການຈັດຕັ້ງ
ຂອງມວນມະ ນຸດທົ່ວໂລກ ທີ່ມີນໍ້າໃຈມະນຸດສະທຳ, ເມດຕາ, ເອື້ອເຟື້ອເພື່ອແຜ່,
ອຸທິຕົນຊ່ວຍເຫລືອຜູ້ອື່ນ ໃນເວລາປະ ສົບໄພພິບັດ ໂດຍບໍ່ຫວັງສິ່ງຕອບແທນ
ແລະ ສະແຫວງຫາຜົນກຳໄລ, ເຊິ່ງອົງການກາແດງລາວ
ເຮັດໜ້າທີ່ໃນການຊ່ວຍເຫລືອບັນເທົາທຸກເບື້ອງຕົ້ນ ແກ່ປະຊາຊົນຜູ້ດ້ອຍໂອກາດ
ແລະ ຜູ້ປະສົບໄພພິບັດຕ່າງໆ, ປຸກລະດົມການບໍລິຈາກເລືອດ ແລະ ສະໜອງເລືອດປອດໄພໃຫ້ແກ່ສັງຄົມ,
ສົ່ງເສີມສຸຂະພາບຂັ້ນພື້ນຖານ ໃຫ້ແກ່ຜູ້ດ້ອຍໂອກາດ, ທຸກຍາກ, ເສຍອົງຄະ ຕາມຊຸມຊົນຕ່າງໆ
ນັບທັງເມືອງ ແລະ ຊົນ ນະບົດ ອີກຍັງສະໜອງການບໍລິການດ້ານປະຖົມພະຍາບານ ແລະ ອື່ນໆ.
ທ່ານ ຄຳຮຸ່ງ ເຮືອງວົງສີ ຍັງໃຫ້ຮູ້ອີກວ່າ: ນັບແຕ່ວັນສ້າງຕັ້ງມາຮອດປັດຈຸບັນ ອົງການກາແດງລາວ ນັບມື້ເຕີບໃຫຍ່ຂະຫຍາຍຕົວທາງດ້ານການຈັດຕັ້ງ ແລະ ການເຄື່ອນໄຫວຢ່າງເປັນລະບົບ ປະ ກອບສ່ວນເຂົ້າໃນການວຽກງານ ພັດທະນາຊົນນະບົດ ແກ້ໄຂຄວາມທຸກຍາກ ຕາມທິດ 3 ສ້າງຂອງພັກ, ລັດ ເປັນຕົ້ນແມ່ນ ວຽກງານສຸຂະອະນາໄມຢູ່ເຂດຫ່າງໄກສອກຫລີກ ແລະ ອື່ນໆ.
