ພະຍາດອະຫິວາໝູອາຟຣິກາລະບາດໜັກທົ່ວອາຊີ
ສຳນັກຂ່າວ BBC ລາຍງານວ່າ: ກະຊວງກະສິກຳຂອງອິນໂດເນເຊຍລະບຸວ່າ: ມີໝູເກືອບ 30.000 ໂຕ ຕ້ອງຕາຍເພາະຕິດເຊື້ອພະຍາດອະຫິວາອາຟຣິກາໃນໝູຢູ່ແຂວງສຸມາດຕາເໜືອ.
ສ່ວນອົງການພະຍາດລະບາດສັດສາກົນ ຫລື OIE (World Organisation for Animal Health) ລະບຸວ່າ: ເຖິງວ່າເຊື້ອນີ້ຈະບໍ່ເປັນອັນຕະລາຍຕໍ່ມະນຸດ, ແຕ່ເຮັດໃຫ້ໝູຈຳນວນຫລາຍຕາຍພາຍໃນ 2-3 ວັນໄດ້ ອັດຕາການລອດຊີວິດຂອງໝູເກືອບເປັນສູນ.
ມາຮອດປັດຈຸບັນ ການລະບາດຮຸນແຮງທີ່ສຸດເກີດຂຶ້ນຢູ່ຈີນ, ແຕ່ມີຄວາມກັງວົນວ່າ: ອາດເກີດການແຜ່ລະບາດໄປທົ່ວອາຊີຕາເວັນອອກສຽງໃຕ້ ໂດຍຈຸດທີ່ພົບການລະບາດຮຸນແຮງທີ່ສຸດບາງສ່ວນໃນພາກພື້ນນີ້ຢູ່ “ຫວຽດນາມ ແລະ ຟີລິບປິນ”.
ນັກວິເຄາະຢູ່ຣາໂບແບງ ຂອງໂຮນລັງ ຄາດວ່າ: ປີນີ້ ຜົນຜະລິດຊີ້ນໝູຂອງຫວຽດນາມຈະຫລຸດລົງ 21% ແລະ ປີໜ້າຈະຫລຸດລົງເພີ່ມອີກ 8%. ນອກຈາກນີ້ ຍັງລະບຸວ່າ: ຟີລິບປິນອາດມີປະຊາກອນໝູຫລຸດລົງ 13% ໃນປີໜ້າ, ສ່ວນຈຳນວນໝູຢູ່ຈີນຫລຸດລົງ 55% ໃນປີນີ້.
ທ່ານ ຊາຣູລ ຍາຊິນ ລິມໂປ ລັດຖະມົນຕີກະຊວງກະສິກຳຂອງອິນໂດເນເຊຍ ກ່າວວ່າ: ປັດຈຸບັນຍັງພົບການລະບາດຂອງໄວຣັສນີ້ຢູ່ໃນຫລາຍພື້ນທີ່ຂອງສຸມາດຕາເໜືອເທົ່ານັ້ນ.
ທ່ານ ລິມໂປ ກ່າວວ່າ: “ກຳລັງຮັບມືຕໍ່ເລື່ອງນີ້ຢ່າງຈິງຈັງ ລວມທັງການແຍກພື້ນທີ່ທີ່ເປັນບັນຫາເຫລົ່ານັ້ນອອກມາ”.
ອົງການອາຫານ ແລະ ກະສິກຳແຫ່ງສະຫະປະຊາຊາດ (UN Food and Agriculture Organisation) ລະບຸວ່າ: ຍັງພົບການລະບາດຂອງພະຍາດອະຫິວາອາຟຣິກາໃນໝູຢູ່ມົງໂກລີ, ກຳປູເຈຍ, ສ.ເກົາຫລີ, ສປປ ເກົາຫລີ, ມຽນມາ ແລະ ຕິມໍຕາເວັນອອກ. ສ່ວນນອກພາກພື້ນອາຊີ ລະບຸວ່າ: ພົບພະຍາດອະຫິວາອາຟຣິກາໃນໝູຢູ່ຫລາຍພື້ນທີ່ຂອງເອີຣົບຕາເວັນອອກ ແລະ ຊັບຊາຮາຣາຂອງອາຟຣິກາ.
ເຖິງຢ່າງໃດກໍຕາມ, ອົດສະຕຣາລີກຳລັງກັງວົນຕໍ່ສະຖານະການລະບາດທີ່ຂະຫຍາຍວົງກວ້າງ ແລະ ໄດ້ເພີ່ມມາດຕະການຄວາມປອດໄພດ້ານຊີວະພາບ ເພື່ອບໍ່ໃຫ້ເຊື້ອພະຍາດອະຫິວາອາຟຣິກາໃນໝູເຂົ້າມາໃນປະເທດ.
