ຕິດຕັ້ງເຄື່ອງຈັບຈຸດພິກັດ (GPS) ໃສ່ລົດຈັກເມຍໂດຍບໍ່ໄດ້ຕັ້ງໃຈ
ລູເມືອງພວນ
ເມຍຂອງຂ້ອຍຫາກໍຊື້ລົດຈັກຄັນໜຶ່ງໃໝ່ໆ, ມູນຄ່າ 30,000,000. ກີບ, ອາດເວົ້າໄດ້ວ່ານີ້ຄືຊັບສົມບັດທີ່ມີມູນຄ່າສູງສຸດໃນຄອບຄົວຂອງຂ້ອຍກໍວ່າໄດ້. ພາຍຫຼັງໃສ່ປ້າຍທະບຽນຮຽບຮ້ອຍແລ້ວ, ຂ້ອຍກໍເອົາໄປລ້າງຢູ່ຮ້ານແຫ່ງໜຶ່ງເພື່ອໃຫ້ມັນດູດີຂຶ້ນ. ບັງເອີນເຈົ້າຂອງຮ້ານເລີຍແນະນຳໃຫ້ຂ້ອຍຕິດຕັ້ງເຄື່ອງຈັບຈຸດພິກັດ (GPS) ໃສ່ຕື່ມອີກ, ຂ້ອຍກໍເລີຍເຫັນດີໃຫ້ເຈົ້າຂອງຮ້ານຕິດຕັ້ງໃຫ້, ຈຸດປະສົງແມ່ນກັນຂະໂມຍ, ເມື່ອລົດເສຍຈຶ່ງຮູ້ທີ່ນຳ, ແຕ່ບໍ່ໄດ້ບອກໃຫ້ເມຍຮູ້.
ປົກະຕິແລ້ວ, ເມຍຂອງຂ້ອຍມີແຕ່ຂີ່ໄປການແລ້ວ ກໍກັບມາເຮືອນ, ເຖິງແມ່ນໄປກໍໄປແຕ່ຮ້ານຊັບພະສິນຄ້າຊື້ເຄື່ອງ ຫຼື ຈອດໃສ່ນໍ້າມັນຢູ່ປໍ້າເທົ່ນນັ້ນ. ເວົ້າແທ້, ຕິດຕັ້ງເຄື່ອງຈັບຈຸດພິກັດໃສ່ລົດກໍມີອັນດີຄືກັນ, ນັ່ງຢູ່ເຮືອນກໍຮູ້ວ່າເມຍໄປໃສມາໃສ. ຂ້ອຍຕິດຕັ້ງເຄື່ອງຈັບຈຸດພິກັດໃສ່ລົດຂອງເມຍ ບໍ່ແມ່ນເພື່ອຕິດຕາມເມຍ, ບາງຄັ້ງຄາວເປີດເບິ່ງກໍພັດມີຄວາມສຸກໄປແບບໜຶ່ງ.
ມື້ນີ້, ກ່ອນຈະເລີກການຂ້ອຍເປີດເບິ່ງ, ກໍເຫັນລົດຈັກຂອງເມຍໄປຈອດຢູ່ຮ້ານກາເຟແຫ່ງໜຶ່ງ, ຫ່າງຈາກບ່ອນເຮັດວຽກຂອງເມຍ 3 ກິໂລແມັດ ແຕ່ຂ້ອຍກໍບໍ່ໄດ້ສົງໄສຫຍັງ. ກ່ອນຈະອອກຈາກຫ້ອງການກັບເມືອເຮືອນຂ້ອຍເປີດເບິ່ງອີກຄັ້ງ, ແຕ່ເທື່ອນີ້ເຫັນລົດຍ້າຍບ່ອນໄປຈອດຢູ່ບ່ອນທີ່ແປກປະຫຼາດ, ເມື່ອຊູມເບິ່ງຄັກໆ ເລີຍເຫັນລົດຂອງເມຍໄປຈອດຢູ່ທີ່ເຮືອນພັກແຫ່ງໜຶ່ງ ທີ່ປາກົດຂຶ້ນຢູ່ເທິງແຜ່ນທີ່ດາວທຽມໃນໜ້າຈໍໂທລະສັບຂອງຂ້ອຍ.
ເວລານັ້ນ, ຂ້ອຍມືດແປດດ້ານ. ຄິດວ່າເມຍນັດຜູ້ບ່າວຢູ່ຮ້ານກາເຟແລ້ວ ຫຼັງຈາກນັ້ນ ພາກັນໄປບ້ານພັກ. ຂ້ອຍຕໍ່ສາຍຫາເມຍ ກໍບໍ່ສາມາດຈະຕິດຕໍ່ໄດ້, ຂ້ອຍແຮງຮ້ອນຮົນເໝືອນຄົນເປັນບ້າ.
ທັນທີທັນໃດນັ້ນ, ຂ້ອຍກໍໂທຫາເອື້ອຍ ແລະ ອ້າຍເຂີຍຂອງເມຍ ທີ່ຢູ່ບ້ານດຽວກັບຂ້ອຍ ຈຸດປະສົງແມ່ນພາພວກເຂົາໄປຈັບເອົາເມຍໃຫ້ຄາໜັງຄາເຂົາ.
ເມື່ອພວກຂ້ອຍໄປຮອດສະຖານທີ່ເຮືອນພັກ ກໍເຫັນລົດຂອງເມຍຈອດຢູ່ແຈເຮືອນບ້ານພັກ ແລະ ຖືກປົກດ້ວຍ ຜ້າຢາງໄວ້ເປັນຢ່າງດີ. ຂ້ອຍໄປຖາມເຈົ້າຂອງບ້ານພັກວ່າ: ເຈົ້າຂອງລົດຄັນດັ່ງກ່າວຢູ່ຫ້ອງໃດ, ຄົນຮັບໃຊ້ກໍເລີຍບອກໃຫ້ພວກຂ້ອຍຮູ້.
ພວກຂ້ອຍບຸກເຂົ້າໄປໃນຫ້ອງ, ເຫັນຊາຍສອງຄົນກຳລັງຫຼີ້ນເກມໂທລະສັບຢູ່, ນອກຈາກນັ້ນຂ້ອຍຍັງເຫັນໂທລະສັບຂອງເມຍວາງໄວ້ເທິງໜ້າໂຕະຕື່ມອີກ. ບາງເອີນໃນເວລານັ້ນ ໂທລະສັບຂອງຂ້ອຍດັງຂຶ້ນ ເມື່ອເປີດເບິ່ງສາຍເຫັນໝາຍເລກໂທລະສັບທີ່ບໍ່ຄຸ້ນເຄີຍ ຍົກຂຶ້ນຟັງກໍໄດ້ຍິນສຽງທັງຮ້ອງທັງໄຫ້ຂອງເມຍວ່າ: “ຜົວເອີຍ, ຕາຍແລ້ວ ລົດນ້ອງເສຍແລ້ວ, ນ້ອງຕາຍຄັກໆອ້າຍເອີຍ”
ເມື່ອເຫັນເມຍຮ້ອງໄຫ້ອັນເປັນໜ້າສົງສານ, ຂ້ອຍຈຶ່ງຕັ້ງເອົາສະຕິຄືນມາ ເພື່ອຖາມເລື່ອງລາວກັບເມຍໃຫ້ຈະແຈ້ງ ຈຶ່ງເຂົ້າໃຈຕົ້ນປາຍສາເຫດຂອງບັນຫາ, ນັ້ນກໍຄື: ເມຍຂອງຂ້ອຍໄປຊື້ເຂົ້າຈີ່ຢູ່ຮ່ອມບ້ານແຫ່ງໜຶ່ງ ແຕ່ຍ້ອນຮ່ອມຄັບແຄບ ຈຶ່ງຈອດລົດປະໄວ້ປາກຮ່ອມ ແລ້ວ ຍ່າງເຂົ້າໄປ, ຢູ່ທາງຂ້າງຮ້ານກາເຟ ທີ່ຂ້ອຍເຫັນຢູ່ໃນໂທລະສັບຂອງຂ້ອຍ. ເມື່ອເມຍອອກມາລົດກໍຫາຍໄປແລ້ວ, ໂທລະສັບຂອງເມຍທີ່ເອົາປະໄວ້ໃນລົດຈັກກໍຫາຍໄປນຳກັນ. ເມຍຂອງຂ້ອຍຈຶ່ງໄດ້ຢືມໂທລະສັບຄົນອື່ນໂທຫາຂ້ອຍ
ເມື່ອເປັນເຊັ່ນນັ້ນ, ຂ້ອຍ ແລະ ອ້າຍເຂີຍຂອງເມຍຈຶ່ງໄດ້ຈັບເອົາຊາຍທັງສອງຄົນນັ້ນໄປມອບໃຫ້ເຈົ້າໜ້ທີ່ຕຳຫຼວດ. ຫຼັງຈາກນັ້ນຂ້ອຍ ແລະ ອ້າຍເຂີຍໄດ້ຂີ່ລົດກັບບ້ານ, ເອົາລົດກັບໄປໃຫ້ເມຍທີ່ຮັກຂອງຂ້ອຍ.
ແຕ່ນັ້ນມາ, ເມຍຂ້ອຍ ແລະ ຂ້ອຍກໍເກີດສົງຄາມເຢັນນຳກັນ, ເມຍຂອງຂ້ອຍເວົ້າວ່າຂ້ອຍບໍ່ມີຄວາມເຊື່ອໝັ້ນຕໍ່ເຂົາ ຈຶ່ງຕິດຕັ້ງ ເຄື່ອງຈັບຈຸດພິກັດໃສ່ລົດຂອງເຂົາ, ດຽວນີ້ເຂົາບໍ່ມີຄວາມໄວ້ວາງໃຈກັບຂ້ອຍເລີຍ ແລະ ເຂົາບໍ່ມີຄວາມພໍໃຈເປັນຢ່າງຍິ່ງ.
ຈື່ງຂໍຄຳແນະນຳຈາກທ່ານຜູ້ອ່ານທັງຫຼາຍວ່າ ເຮັດແນວໃດຈຶ່ງຈະເອົາຄວາມເຊື່ອໝັ້ນຂອງເມຍກັບຄືນມາໄດ້?
