ສະພາຕໍ່າອາເມລິກາ ລົງມະຕິຖອດຖອນທ່ານ ທຣຳ ພົ້ນຕຳແໜ່ງປະທານາທິບໍດີ
ກອງປະຊຸມສະພາຜູ້ແທນລາຊະດອນອາເມລິກາ ເຊິ່ງໃຊ້ເວລາ 6 ຊົ່ວໂມງ ນັບແຕ່ວັນທີ 18 ທັນວາ ຈົນເຖິງເຊົ້າວັນທີ 19 ທັນວາ ຕາມເວລາຢູ່ລາວ ໃນການປະກອບຄຳຄິດເຫັນຖອດຖອນປະທານາທິບໍດີ ໂດນັລ ທຣຳ ໃນ 2 ຂໍ້ຫາ ໄດ້ແກ່ ການໃຊ້ອຳນາດໃນທາງບໍ່ຖືກຕ້ອງ ແລະ ຂັດຂວາງຂະບວນການສອບສວນຂອງສະພາສູງ.
ຫລ້າສຸດ ກອງປະຊຸມສະພາຕໍ່າອາເມລິກາ ມີມະຕິຂໍ້ຫາການໃຊ້ອຳນາດໃນທາງບໍ່ຖືກຕ້ອງຂອງທ່ານ ທຣຳ ດ້ວຍຄະແນນ 230-197, ສ່ວນຂໍ້ຫາທີ 2 ຄືການຂັດຂວາງຂະບວນການສອບສວນຂອງສະພາສູງ ລົງມະຕິດ້ວຍຄະແນນ 229-198.
ຫລັງຈາກສະມາຊິກສະພາຕໍ່າລົງມະຕິເຫັນພ້ອມວ່າ: ປະທານາທິບໍດີ ໂດນັລ ທຣຳ ມີການໃຊ້ອຳນາດໃນທາງບໍ່ຖືກຕ້ອງ ແລະ ຂັດຂວາງການປະຕິບັດໜ້າທີ່ຂອງສະພາສູງແລ້ວ ຂັ້ນຕອນຕໍ່ໄປ ວຸດທິສະພາອາເມລິກາຈະມີການສອບສວນປະທານາທິບໍດີ ທຣຳ ໃນເດືອນໜ້າ.
ເຖິງຢ່າງໃດກໍດີ, ການທີ່ພັກລີພັບບລິກັນຄອງສຽງສ່ວນຫລາຍໃນວຸດທິສະພາ ເຮັດໃຫ້ປະທານາທິບໍດີ ທຣຳ ມີທ່າອ່ຽງຫລຸດພົ້ນຈາກການຖືກຖອດຖອນໃນການລົງມະຕິໃນວຸດທິສະພາ.
ການຜ່ານຍັດຕິຂໍຖອດຖອນທ່ານ ທຣຳ ຄັ້ງນີ້ ເຮັດໃຫ້ທ່ານ ທຣຳ ກາຍເປັນປະທານາທິບໍດີຄົນທີ 3 ໃນປະຫວັດສາດການເມືອງອາເມລິກາ ທີ່ຖືກສະພາຕໍ່າຂໍຖອດຖອນ ໂດຍໃນປະຫວັດສາດມີປະທານາທິບໍດີຖືກຂໍຖອດຖອນໃນສະພາຕໍ່າມາແລ້ວ 2 ຄັ້ງຄື: ອະດີດປະທານາທິບໍດີ ແອນດຣູ ຈອນສັນ ໃນກາງສະຕະວັດທີ 19 ແລະ ອະດີດປະທານາທິບໍດີ ບິລ ຄລິນຕັນ ເຊິ່ງທັງສອງຖືກສະພາຕໍ່າທີ່ເຮັດໜ້າທີ່ຄືໄອຍະການຕັ້ງຂໍ້ຫາເພື່ອຖອດຖອນ, ແຕ່ວຸດທິສະພາ ເຊິ່ງເຮັດໜ້າທີ່ຄືສານລົງມະຕິບໍ່ເຫັນພ້ອມຕໍ່ຂໍ້ກ່າວຫາ.
