ສົ່ງອອກ ສ.ເກົາຫລີ ໄປອາຊຽນຂະຫຍາຍຕົວສອງເທົ່າ
ເຊຈົງ 31 ພຶດສະພາ: ສຳນັກຂ່າວຍອນຮັບລາຍງານໂດຍອ້າງຂໍ້ມູນຈາກຂໍ້ມູນຂອງລັດຖະບານ ສ.ເກົາຫລີ ລະບຸວ່າ: ມູນຄ່າການສົ່ງອອກໄປກຸ່ມປະເທດສະມາກສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ ຫລື ອາຊຽນ 10 ປະເທດ ຂະຫຍາຍຕົວສອງເທົ່າໃນໄລຍະທົດສະວັດຜ່ານມາ ເປັນຜົນມາຈາກການເຮັດຂໍ້ຕົກລົງການຄ້າເສລີ.
ກະຊວງການຄ້າ, ອຸດສາຫະກຳ ແລະ ພະລັງງານຂອງ ສ.ເກົາຫລີ ລາຍງານຂໍ້ມູນການສົ່ງອອກຂອງປະເທດ ລະບຸວ່າ: ການສົ່ງອອກໄປ 10 ປະເທດສະມາຊິກອາຊຽນໃນປີ 2016 ມີມູນຄ່າ 74.520 ລ້ານໂດລາສະຫະລັດ, ເມື່ອທຽບໃສ່ປີ 2006 ທີ່ມີມູນຄ່າ 32.100 ລ້ານໂດລາສະຫະລັດ ເປັນຜົນມາຈາກການເຮັດຂໍ້ຕົກລົງການຄ້າເສລີ ສ.ເກົາຫລີ-ອາຊຽນ ໃນປີ 2007 ເຊິ່ງຊ່ວຍຂັບເຄື່ອນຂະແໜງການສົ່ງອອກເຕີບໃຫຍ່ສະເລ່ຍ 7,5% ຕໍ່ປີໃນໄລຍະທົດສະວັດຜ່ານມາ, ຂະນະທີ່ສົ່ງອອກ ສ.ເກົາຫລີ ຂະຫຍາຍຕົວ 3,3% ຕໍ່ປີ.
+ ການຄ້າ ມຽນມາ-ອາຊຽນ ບັນລຸ 9.600 ລ້ານໂດລາສະຫະລັດໃນປີຜ່ານມາ
+ ສ.ເກົາຫລີ ສົ່ງເຂົ້າຊ່ວຍກຳປູເຈຍ-ມຽນມາ ພາຍໃຕ້ຂອບການຮ່ວມມືອາຊຽນ +3
ສ່ວນການນຳເຂົ້າ ສ.ເກົາຫລີ ໃນປີຜ່ານມາມີມູນຄ່າ 44.320 ລ້ານໂດລາສະຫະລັດ ຂະຫຍາຍຕົວສະເລ່ຍ 3,3% ໃນທົດສະວັດຜ່ານມາ ສົ່ງຜົນໃຫ້ ສ.ເກົາຫລີ ມີດຸນການຄ້າເກີນດຸນກັບອາຊຽນມູນຄ່າທັງໝົດ 30.200 ລ້ານໂດລາສະຫະລັດ. ໃນປີຜ່ານມາ ມູນຄ່າການຄ້າລະຫວ່າງ ສ.ເກົາຫລີ ແລະ ອາຊຽນ ເພີ່ມຂຶ້ນສະເລ່ຍ 5,7% ຕໍ່ປີ ໄປຢູ່ລະດັບ 118.800 ລ້ານໂດລາສະຫະລັດ ເຮັດໃຫ້ອາຊຽນກາຍເປັນຄູ່ຄ້າທີ່ໃຫຍ່ເປັນອັນດັບ 2 ຂອງ ສ.ເກົາຫລີ.
